AMARHUBO 12

₂Siza Somnini!

Abathembekileko abasekho!

Ngambala, abaqotho banyamalele ebantwini!

₃Bakhohlisana bodwa,

banamalimu ambaqambili

begodu babomalakazi.

₄Kwanga uSomnini angaqunta amalimu ambaqambili,

iye, umlomo okhuluma ngokuzigqaja,

₅walabo abathi: “Ngelimu lethu sinamandla,

thina sinomlomo wokuzikhulumela,

ngubani osiphetheko na?”

₆USomnini uthi:

“Ngebanga lokobana abadududu bayadlelezelwa,

abachakileko bayabubula,

mina ngizakusikima kwanjesi,

ngizabanikela isindiso abayifisako.”

₇Amezwi kaSomnini atsengileko,

anjengesiliva elicoliswe

emgodini wekehla yomlilo,

iye, elihlanjululwe kalikhomba.

₈Wena Somnini, uzakulondoloza abadududu,

uzabavikela esizukulwanenesi nini nanini.

₉Iinkhohlakali zizula yoke indawo

namanyala akhulile hlangana nabantu.