Bybelleesrooster – Dag 110

₂Julle wat mag besit, is julle uitsprake werklik regverdig?

Is julle beslissings in die sake tussen mense billik?

₃Nee, julle optrede in die land is die ene korrupsie,

met geweld gaan julle deur die lewe.

₄Slegte mense loop van hulle geboorte af 'n verkeerde pad,

vandat hulle in die wêreld gekom het, dwaal hierdie bedrieërs af.

₅Hulle is soos giftige slange,

soos adders wat hulle doof hou,

₆wat hulle nie steur aan die stem van die slangbesweerder nie,

hoe vernuftig hy ook mag wees.

₇Ruk hulle tande uit hulle mond uit, o God!

Slaan dié leeus se slagtande uit, Here!

₈Laat hulle verdwyn soos water wat wegsyfer,

laat hulle fyngetrap word soos droë gras.

₉Laat hulle wegraak soos slakke wat net slym agterlaat,

laat hulle word soos misgeboortes, sonder lewe.

₁₀Laat hulle, voor hulle dit weet, uitgeroei wees soos onkruid,

laat 'n gloeiende wind hulle wegwaai in die fleur van hulle lewe.

₁₁Die regverdige sal bly wees as hy sien daar is vergelding,

as die bloed van die goddeloses oor sy voete loop.

₁₂Die mense sal sê: Daar is tóg 'n beloning vir die regverdige,

daar is tóg 'n God wat reg op die aarde laat geskied!

₂Red my van my vyande, my God,

beskerm my teen my teëstanders,

₃red my van die mense wat onreg doen,

bevry my van hierdie moordenaars!

₄Die geweldenaars lê my voor om my dood te maak,

hulle wil my aanval.

Maar ek het nie gesondig nie,

ek het nie oortree nie, Here!

₅Ek is onskuldig en tog bestorm hulle my en val hulle my aan.

Kom help my tog! Kyk wat doen hulle!

₆U is die Here God, die Almagtige, die God van Israel!

Gryp tog in en straf al hierdie vyandige nasies!

Moenie genade betoon aan sulke lae verraaiers nie. Sela

₇Hulle kom altyd in die aand terug,

hulle grom soos honde en loop in die stad rond.

₈Die skuim staan om hulle bekke,

en hulle wys hulle tande,

want hulle dink niemand hoor hulle nie.

₉Maar U, Here, U lag hulle uit,

U spot met al die nasies!

₁₀Ek wil my hoop op U gevestig hou, U, my Sterkte,

want U is my veilige vesting!

₁₁My God sal my te hulp kom in sy trou,

God sal my laat neersien op my teëstanders.

₁₂Moet hulle nie nou al doodmaak nie,

sodat hulle straf nie ongemerk aan my volk verbygaan nie.

Breek hulle stadig af deur u mag

en laat hulle ondergaan, Here, ons Beskermer,

₁₃oor hulle woorde, die sonde uit hulle mond.

Laat hulle gevang word deur hulle hoogmoed,

deur die vervloekings wat hulle uitspreek,

en die leuens wat hulle praat.

₁₄Vernietig hulle in u toorn,

wis hulle heeltemal uit.

Dan sal almal weet dat God oor sy volk Jakob en oor die hele aarde regeer. Sela

₁₅Hulle kom altyd in die aand terug,

hulle grom soos honde en loop in die stad rond.

₁₆Hulle dwaal rond agter prooi aan

en as hulle nie genoeg kry nie, tjank hulle.

₁₇Maar ék sal sing van u mag,

elke môre sal ek jubel oor u trou,

want U is vir my 'n veilige vesting,

'n skuilplek in tyd van nood.

₁₈Tot u eer wil ek sing, U, my Sterkte,

want U is my veilige vesting,

U is my troue God.

₃U het ons verstoot, o God,

ons uitmekaar geskeur.

U was kwaad vir ons.

Laat dit tog weer met ons goed gaan.

₄U het die land laat bewe en dit oopgekloof.

Genees tog die wonde, want ons gaan tot niet.

₅U het 'n ramp oor u volk gebring,

U het ons wyn laat drink wat ons laat steier het.

₆Trek tog u dienaars saam onder u vaandel

dat hulle veilig kan wees teen die boog van die vyand. Sela

₇Red ons deur u groot mag, en help ons,

sodat hulle vir wie U liefhet, gered kan word.

₈God het in sy heilige woning gesê:

“As oorwinnaar sal Ek Sigem verdeel

en die Sukkotlaagte uitdeel!

₉Aan My behoort Gilead, aan My behoort Manasse!

Efraim is my vernaamste vesting,

Juda my koninklike gebied.

₁₀Moab is tot my beskikking,

Edom neem Ek in besit,

oor Filistea juig Ek as oorwinnaar.”

₁₁Wie sal ons na Edom toe lei,

ons bring na sy versterkte stad?

₁₂U het ons verstoot, o God,

U trek nie saam met ons leërs uit nie, o God!

₁₃Help U ons tog teen die vyand,

want die hulp van mense – dit is niks.

₁₄Met God aan ons kant sal ons oorwin,

Hy self sal ons vyande vertrap.

₂Hoor tog my hulpgeroep, o God,

slaan tog ag op my gebed.

₃Ver uit die vreemde uit, in wanhoop, roep ek na U.

Bring my op 'n rots waar ek veilig sal wees.

₄U is vir my 'n toevlug,

'n sterk vesting buite bereik van die vyand.

₅Laat my by U 'n blywende tuiste vind.

Laat my skuil onder u vleuels. Sela

₆U, o God, hoor my geloftes,

U vervul die wens van hulle wat u Naam eer.

₇Laat die koning lank lewe,

laat sy lewensjare oor geslagte strek.

₈Mag hy sy lewe lank regeer voor God,

mag u liefde en trou hom bewaar!

₉Dan sal ek u Naam altyd besing

en dag na dag my geloftes betaal.

₂Net by God vind ek rus,

van Hom kom my redding.

₃Net Hy is my rots en my redding,

my veilige vesting, sodat ek vas en stewig staan.

₄Hoe lank wil julle almal nog beskuldigings bly slinger

en my probeer doodmaak,

'n man wat reeds is soos 'n muur wat wil omval,

'n klipmuur wat omgestoot word?

₅Hulle probeer my uitwerk;

hulle skep behae in leuens;

met die mond seën hulle,

in die hart vervloek hulle. Sela

₆Net by God vind ek rus,

want op Hom vertrou ek.

₇Net Hy is my rots en my redding,

my veilige vesting, sodat ek stewig staan.

₈God is my redding en my krag.

Hy is my rots, my sterkte,

God is my toevlug.

₉Vertrou altyd op Hom, my volk,

stort julle hart voor Hom uit!

God is vir ons 'n toevlug. Sela

₁₀Mense is verganklik,

mense is niks:

op 'n skaal wys hulle geen gewig nie,

saam is hulle minder as niks.

₁₁Moenie op geweld vertrou nie;

roof sal jou niks in die sak bring nie.

As jou rykdom toeneem,

moenie dat dit jou te na aan die hart lê nie.

₁₂Een ding het ek God hoor sê,

nee, twee:

dat net God mag het ₁₃en 'n mens net op U, Here, kan vertrou,

en dat U met elkeen handel volgens sy verdienste.

₂Ek soek U, o God, my God,

ek dors na U;

ek smag na U

soos in 'n dor en droë land,

'n land sonder water.

₃Ek wil by U in die heiligdom wees

om daar u mag en grootheid te ondervind.

₄U troue liefde is meer werd as die lewe;

daarom sal ek U prys.

₅Ek sal U my lewe lank loof,

my hande ophef om u Naam te prys.

₆Soos elke keer wanneer ek u goeie gawes geniet,

sal ek U altyd roem met jubelende mond.

₇As ek aan U dink op my bed,

oor U peins in die nag, dan weet ek:

₈U is vir my 'n hulp,

en dan juig ek oor die beskerming onder u vleuels.

₉Ek bly altyd naby U,

u hand ondersteun my.

₁₀Maar hierdie mense wat my ondergang soek,

mag hulle wegsink in die dieptes van die aarde!

₁₁Mag hulle aan die swaard oorgegee word

en aas vir die jakkalse word!

₁₂Laat die koning hom in God verbly,

laat elkeen wat hom op God verlaat, Hom prys.

Die mond van die vals mens word toegestop.

₂Hoor my as ek kla, o God,

beskerm my lewe teen die bedreiging van die vyand!

₃Bewaar my van die komplotte van kwaadwilliges,

van die kwaadstokery van mense wat onreg doen,

₄wat met skerp tonge vir swaarde

en giftige woorde vir pyle

₅uit hinderlae lostrek op 'n onskuldige mens.

Uit die bloute trek hulle selfversekerd op hom los.

₆Hulle smee bose planne

en kom ooreen om strikke te stel.

Hulle dink niemand sien hulle nie.

₇Hulle beplan skelmstukke en sê:

“Ons het 'n volmaakte komplot gesmee,

want wat binne in 'n mens is,

wat hy uitgedink het, is 'n geheim.”

₈Dan tref God hulle met 'n pyl,

en meteens is hulle daarmee heen:

₉hulle eie tonge het hulle tot 'n val gebring!

Elkeen wat dit sien, knik met voldoening die kop.

₁₀Met groot ontsag getuig almal dan van die dade van God

omdat hulle insig gekry het in wat Hy doen.

₁₁Laat die regverdige hom in die Here verbly

en sy toevlug by Hom soek,

laat al die opregtes Hom prys.

₂Aan U, o God, kom 'n lofsang toe in Sion:

geloftes moet betaal word ₃aan U wat die gebed verhoor.

Na U toe sal alle mense kom ₄om hulle skuld te bely.

Ons sondes het ons ingehaal, maar U maak ons daarvan vry.

₅Dit gaan goed met die mens vir wie U uitkies

en laat naderkom om in u tempel te bly.

Laat ons die goeie dinge in u huis in oorvloed geniet,

die goeie dinge in u heilige woning.

₆In u trou antwoord U ons met kragtige dade,

o God, ons Verlosser,

op wie ook die mense in afgeleë lande

en op verre seë vertrou.

₇U is met mag omgewe,

U laat deur u krag die berge vas bly staan;

₈U laat die gedruis van die see,

die geraas van die golwe,

die rumoer van die nasies bedaar,

₉sodat ook die mense in afgeleë lande

ontsag kry vir die tekens van u mag;

in die ooste en in die weste

laat U die mense juig.

₁₀U sorg vir die land en gee oorvloed,

U maak dit baie vrugbaar.

Die groot riviere is vol water,

U laat die koring welig staan.

Alles is u werk!

₁₁U maak die ploegvore vol water en die kluite nat,

U laat hulle sag word van die reëns,

U laat alles welig groei.

₁₂U kroon die jaar met u goeie gawes.

Waar U ook gaan, is daar oorvloed!

₁₃Daar is volop weiding in die woestyn;

die bulte juig,

₁₄die velde wemel van die kleinvee,

die vlaktes staan vol koring;

hulle juig en hulle sing.