Bybelleesrooster – Dag 120

Dit gaan goed met elkeen wat die Here dien,

wat al sy vreugde vind in die gebooie van die Here.

₂Sy nageslag is 'n sterk krag in die land,

die geslag van die opregte word geseën:

₃daar is oorvloed en rykdom in sy huis.

Wat hy doen, is reg en blywend:

₄hy laat sy lig in die donker uitstraal vir die opregtes,

hy is genadig, barmhartig en regverdig.

₅Dit is 'n goeie mens wat hom ontferm en wat uitleen

en in al sy sake reg optree.

₆Die regverdige sal nooit wankel nie,

hy sal altyd onthou word.

₇Vir slegte tyding is hy nie bevrees nie,

hy is gerus, hy vertrou op die Here.

₈Hy voel hom veilig, hy is nie bevrees nie:

hy sal die neerlaag van sy vyande aanskou.

₉Hy gee mildelik vir die armes.

Wat hy doen, is reg en blywend.

Hy geniet hoë aansien.

₁₀Die goddelose sien dit en raak ontsteld,

hy kners op sy tande van magteloosheid.

Van die begeertes van die goddelose kom daar niks.

Prys, dienaars van die Here,

prys die Naam van die Here!

₂Die Naam van die Here moet geloof word,

nou en vir altyd.

₃Van waar die son opkom tot waar dit ondergaan,

moet die Naam van die Here geprys word!

₄Hoog bo al die nasies heers die Here,

sy mag strek selfs oor die hemele.

_5-6Wie in die hemel of op die aarde

is soos die Here ons God,

wat hoog woon en hier onder alles sien?

₇Die geringe help Hy op uit die stof,

die arme laat Hy van die ashoop af opstaan

₈om hom by vernames te laat sit,

by die vernames van sy volk.

₉Aan die kinderlose skenk Hy 'n huisgesin,

sy word 'n gelukkige moeder van kinders.

Prys die Here!

₁Toe Israel uit Egipte getrek het,

toe die nageslag van Jakob getrek het,

weg van die volk met die onverstaanbare taal af,

₂het Juda sy gewyde besit geword

en Israel sy magsgebied.

₃Die see het dit gesien en op die vlug geslaan,

die Jordaan het teruggedraai,

₄die berge het rondgespring soos ramme,

die rante soos lammers.

₅Wat is dit met jou, see, dat jy op die vlug slaan,

wat is dit, Jordaan, dat jy terugdraai,

₆berge, dat julle soos ramme rondspring,

en julle, rante, soos lammers?

₇Bewe, aarde, as die Here verskyn,

as die God van Jakob verskyn,

₈Hy wat rots in waterkuile verander,

harde klip in fonteine.

₁Nie aan ons nie, Here, nie aan ons nie,

maar aan u Naam kom die eer toe,

want dit is U wat liefde en trou bewys.

₂Waarom sou die heidene kan sê:

“Waar is hulle God nou?”

₃En dit terwyl ons God in die hemel is!

Alles wat Hy wil, doen Hy.

₄Wat húlle het, is afgode, van silwer en goud,

die werk van mensehande.

₅'n Mond het hulle, maar praat kan hulle nie,

oë het hulle, maar sien kan hulle nie;

₆ore het hulle, maar hoor kan hulle nie;

'n neus het hulle, maar ruik kan hulle nie.

₇Hulle hande, daarmee kan hulle nie voel nie,

hulle voete, daarmee kan hulle nie loop nie.

Daar kom geen geluid uit hulle keel nie.

₈Wie hulle maak en op hulle vertrou,

sal net soos hulle word.

₉Israel, vertrou op die Here!

Hy help en beskerm jou.

₁₀Huis van Aäron, vertrou op die Here!

Hy help en beskerm jou.

₁₁Julle wat die Here dien, vertrou op die Here!

Hy help en beskerm julle.

₁₂Die Here dink aan ons: Hy seën,

Hy seën die huis van Israel,

Hy seën die huis van Aäron,

₁₃Hy seën dié wat Hom dien,

klein en groot.

₁₄Mag die Here julle talryk maak,

julle én julle kinders.

₁₅Mag die Here julle seën,

Hy wat hemel en aarde gemaak het.

₁₆Die hemel is net vir die Here,

maar die aarde het Hy aan die mense gegee.

₁₇Nie die dooies prys die Here nie,

nie dié wat die graf in is nie,

₁₈maar óns, ons prys die Here, nou en vir altyd!

Prys die Here!

₁Ek het die Here lief,

want Hy verhoor my smeekgebede.

₂Hy het na my geluister toe ek Hom aangeroep het.

₃Bande van die dood het my omsluit,

doodsangs het my aangegryp,

ek het benoud en bekommerd geword.

₄Toe het ek die Naam van die Here aangeroep:

“Here, red my tog!”

₅Die Here is genadig en regverdig,

ons God ontferm Hom oor ons.

₆Die Here beskerm die hulpeloses:

ek was magteloos, maar Hy het my gered.

₇Ek moet nou tot rus kom,

die Here het goed aan my gedoen:

₈U het my van die dood gered,

U het 'n einde gemaak aan my trane,

U het gesorg dat ek nie weer struikel nie.

₉Ek kon voor die Here bly wandel

in die land van die lewendes.

₁₀Ek het in U bly glo,

selfs toe ek gedink het dit is klaar met my

₁₁en toe ek in my vertwyfeling besef het:

ek kan op geen mens staatmaak nie.

₁₂Hoe sal ek die Here vergoed

vir al sy weldade aan my?

₁₃Met 'n drankoffer sal ek van sy redding getuig

en die Naam van die Here aanroep.

₁₄My geloftes aan die Here sal ek betaal

in die teenwoordigheid van sy hele volk.

₁₅Vir die Here is die dood van sy troue dienaars geen geringe saak nie.

₁₆Ek is u dienaar, Here,

van my geboorte af is ek al u dienaar:

U het my vrygemaak.

₁₇Ek wil U loof met 'n dankoffer,

ek wil die Naam van die Here aanroep.

₁₈My geloftes aan die Here sal ek betaal

in die teenwoordigheid van sy hele volk,

₁₉in die voorhowe van die huis van die Here,

binne-in jou, Jerusalem!

Prys die Here!

₁Prys die Here, alle nasies,

loof Hom, alle volke,

₂want sy liefde vir ons is sterk,

aan die trou van die Here is daar geen einde nie!

Prys die Here!

₁Loof die Here, want Hy is goed,

₂Israel moet getuig:

₃Die huis van Aäron moet getuig:

₄Dié wat die Here dien, moet getuig:

₅In my nood het ek na die Here geroep,

die Here het my gebed verhoor en my bevry.

₆Die Here is by my, ek ken geen vrees nie;

wat kan 'n mens aan my doen?

₇Die Here is by my, Hy help my:

ek sal neerkyk op dié wat my haat.

₈Om by die Here te skuil,

is beter as om op mense te vertrou.

₉Om by die Here te skuil,

is beter as om op hoë mense te vertrou.

₁₀Nasies het van alle kante af op my afgestorm.

In die Naam van die Here het ek hulle aanval afgeslaan.

₁₁Hulle het my omsingel, my van alle kante bestorm.

In die Naam van die Here het ek hulle aanval afgeslaan.

₁₂Hulle het soos bye om my gepak,

maar hulle het verdwyn soos doringtakke in 'n vuur.

In die Naam van die Here het ek hulle aanval afgeslaan.

₁₃My vyande wou my platloop en my ondergang bewerk,

maar die Here het my gehelp.

₁₄Die Here is my krag en my beskerming.

Dit is Hy wat my gered het!

₁₅Hoor die gejuig in die laer van die oorwinnaars:

“Die Here doen kragtige dade,

₁₆die Here triomfeer,

die Here doen kragtige dade!”

₁₇Ek sal nie sterwe nie, ek sal lewe

en van die dade van die Here getuig.

₁₈Die Here het my swaar gekasty,

maar my nie aan die dood oorgegee nie.

₁₉Maak die tempelpoort vir my oop:

ek wil ingaan en die Here loof.

₂₀Dit is die poort na die Here toe;

regverdiges mag daardeur ingaan.

₂₁Ek wil U loof omdat U my gebed verhoor

en my gered het.

₂₂Die klip wat deur die bouers afgekeur is,

juis hy het die belangrikste klip in die gebou geword.

₂₃Dit is deur die Here gedoen

en is 'n wonder in ons oë!

₂₄Dit is die dag wat die Here gemaak het;

laat ons daaroor juig en bly wees.

₂₅Red tog, Here,

gee tog voorspoed, Here!

₂₆Prys hom wat in die Naam van die Here kom!

Ons seën julle uit die huis van die Here.

₂₇Die Here is God; Hy skenk ons die lewe.

Begin die fees! Wuif met takke!

Gaan tot by die horings van die altaar.

₂₈U is my God, U wil ek loof;

my God, u grootheid wil ek besing.

₂₉Loof die Here, want Hy is goed,

₁Dit gaan goed met dié wat onberispelik lewe,

dié wat wandel volgens die woord van die Here.

₂Dit gaan goed met dié wat sy verordeninge gehoorsaam,

dié wat met hulle hele hart sy wil doen,

₃geen onreg pleeg nie

en in sy weë wandel.

₄U het u bevele gegee

dat dit ten volle uitgevoer moet word.

₅As ek tog maar net op 'n vaste koers kan bly

en my aan u voorskrifte kan hou!

₆As ek al u gebooie in ag neem,

sal ek nooit raad-op wees nie.

₇U bepalings is regverdig;

as ek hulle ter harte neem,

sal ek U loof met 'n opregte hart.

₈Ek sal my aan u voorskrifte hou:

moet my tog nooit verlaat nie.

₉Hoe kan 'n jongmens sy lewe skoon hou?

Deur hom te hou aan u woord!

₁₀Ek wil aan U gehoorsaam wees met my hele hart,

laat my nie afwyk van u gebooie nie.

₁₁Aan u beloftes hou ek vas,

dit weerhou my van sonde teen U.

₁₂Aan U kom die lof toe, Here,

leer my u voorskrifte.

₁₃Al u bepalings wil ek een vir een opnoem.

₁₄Om volgens u verordeninge te lewe,

gee my meer vreugde as al die rykdom van die wêreld.

₁₅U bevele bly my altyd by.

Ek gee ag op die pad wat U aanwys.

₁₆Ek verlustig my in u voorskrifte,

u woord vergeet ek nie.

₁₇Doen goed aan u dienaar, dan sal ek lewe

en u woord gehoorsaam.

₁₈Maak my oë oop

dat ek die kragtige werking van u wet ervaar.

₁₉Hier op aarde is ek net op u beskerming aangewese:

laat my tog nie sonder u gebooie wees nie.

₂₀Ek kwyn weg van verlange na u bepalings.

₂₁U straf die hovaardiges,

die vervloektes wat van u gebooie afwyk.

₂₂Keer tog dat ek nie beledig of gesmaad word nie,

want ek kom u verordeninge na.

₂₃Selfs al smee mense wat mag het, komplotte teen my,

ek sal my hou aan wat U neergelê het.

₂₄U verordeninge is my vreugde,

hulle is my raadgewers.

₂₅Ek verkeer in doodsgevaar,

gee my nuwe lewe soos U in u woord beloof het.

₂₆Ek het my lewensloop aan U bekend gemaak

en U het my gebed verhoor;

leer my u voorskrifte.

₂₇Leer my hoe om u bevele uit te voer.

Ek wil van u magtige dade vertel.

₂₈Ek kwyn weg van kommer,

skenk my krag soos U in u woord beloof het.

₂₉Hou valsheid ver van my af,

wees my genadig, leer my u wet.

₃₀Ek kies die betroubare pad,

ek lewe volgens u bepalings.

₃₁Ek hou vas aan u verordeninge, Here,

moet tog nie dat my lewe 'n teleurstelling word nie.

₃₂Ek is gretig om u gebooie te gehoorsaam,

want U verryk my lewe.