Bybelleesrooster – Dag 134

₁Kinders, neem die opvoeding wat 'n vader julle gee, ter harte;

slaan daarop ag, sodat julle kan leer wat insig is,

₂want wat ek julle leer, is goed;

moenie die onderrig wat ek gee, versmaai nie.

₃Ek was ook eenkeer 'n kind,

my moeder se oogappel, haar enigste.

₄My vader het my toe ook geleer en vir my gesê:

“Wat ek jou sê, moet jy vashou,

my voorskrifte moet jy uitvoer, sodat jy werklik kan lewe.

₅Sorg dat jy wysheid bekom, en insig!

Moenie my woorde vergeet en daarvan afwyk nie;

₆maak die wysheid jou metgesel, dit sal jou beskerm;

as jy dit liefhet, sal dit jou veilig bewaar.

₇Die wysheid kom eerste.

Sorg dat jy wysheid bekom,

gee alles wat jy het, om insig te kry!

₈Slaan dit hoog aan, dan sal dit aan jou aansien gee.

Dit sal jou 'n man van betekenis maak as jy dit vasgryp.

₉Dit sal jou lewe versier,

dit sal vir jou 'n sierlike kroon wees.”

₁₀Luister, my seun, en aanvaar wat ek jou sê;

dit sal jou lewensjare baie maak.

₁₁Ek sal jou leer wat die pad van die wysheid is

en jou die regte koers laat loop.

₁₂As jy loop, sal daar niks in jou pad wees nie,

en as jy hardloop, sal jy nie struikel nie.

₁₃Hou vas aan wat ek jou leer, moet dit nie laat los nie;

bly daarby, want dit is jou lewe.

₁₄Moenie agter die goddeloses aanloop nie,

vermy die pad van slegte mense.

₁₅Los dit, moenie daarop loop nie,

draai weg, vermy die slegte mense;

₁₆hulle kan nie slaap

as hulle nie kwaad gedoen het nie;

hulle lê wakker

as hulle nie iemand se ondergang bewerk het nie.

₁₇Misdaad is hulle kos,

geweld hulle drank.

₁₈Die pad van die regverdiges is soos helder oggendlig

wat groei en sterker word tot dit heeltemal dag is;

₁₉die pad van die goddeloses is soos die donker:

hulle weet nie waaroor hulle sal struikel nie.

₂₀My seun, hoor wat ek vir jou sê,

luister goed na my woorde!

₂₁Moet dit nie vergeet nie,

hou dit altyd in gedagte,

₂₂want dit beteken lewe vir dié wat daarna luister,

'n volle lewe vir hom wat dit besit.

₂₃Wees veral versigtig met wat in jou hart omgaan,

want dit bepaal jou hele lewe.

₂₄Weerhou jou van leuens,

moenie mense mislei nie.

₂₅Hou jou oë op die pad vorentoe,

kyk reg voor jou uit.

₂₆Baken jou koers af,

dan sal jy seker wees van elke tree.

₂₇Moenie links of regs wegdraai nie,

weerhou jou van die verkeerde koers.

₁My seun, slaan ag op die wysheid wat ek jou leer,

luister na my goeie raad.

₂Dan sal jy self ook met oorleg kan optree

en met die nodige kennis praat.

₃Die slegte vrou se lippe drup van die heuning,

haar tong is gladder as olie,

₄maar agterna is alles so bitter soos wildeals;

sy is so gevaarlik soos die skerpste swaard.

₅Haar pad is dié van die dood,

elke stap saam met haar bring die ondergang nader.

₆Sy hou jou weg van die pad van die lewe af,

sy laat jou dwaal, en jy weet dit nie.

₇Luister na my, my seun,

bly by wat ek jou sê:

₈Bly weg van haar af,

moenie naby haar huis se deur kom nie

₉dat jy nie jou mooiste jare verspil nie,

jou beste jare aan 'n hartelose mens gee nie,

₁₀dat vreemdes hulle nie vol eet

aan die vrug van jou arbeid nie,

dat dit waarvoor jy gewerk het,

nie in die huis van 'n ander beland nie.

₁₁Jy sal lê en kreun as jou einde nader,

met die vleis aan jou liggaam weggevreet,

₁₂en jy sal sê: “Ek het my opvoeding versmaai,

ek het my nie gesteur aan die onderrig nie.

₁₃As ek maar geluister het na my leermeesters

en my ore oopgemaak het toe hulle my geleer het!

₁₄Hier sit ek nou in die grootste ellende

voor die oë van almal.”

₁₅Jy het tog self 'n vrou, jy het tog self 'n put met water:

drink die strome uit jou eie fontein.

₁₆Moet jou fonteine dan ook die wêreld vol loop,

jou strome water oral heen vloei?

₁₇Hulle is tog net joune,

en jy sal hulle nie met 'n ander wil deel nie.

₁₈Sing die lof van jou eie fontein,

verheug jou oor jou eie vrou,

₁₉so vol liefde, so mooi

soos 'n takbok, soos 'n ribbok.

Geniet voluit van haar liefkosings,

laat dit jou deurentyd bedwelm.

₂₀Waarom sou jy jou laat bedwelm deur 'n slegte vrou, my seun,

waarom sou jy in die arms van 'n ander vrou gaan lê?

₂₁'n Mens se lewe lê oop voor die Here,

elke tree wat jy gee, sien Hy.

₂₂Die oortreding van die goddelose agterhaal hom,

hy draai hom vas in sy sonde.

₂₃Hy sterf deur sy gebrek aan selfbeheersing,

sy dwaasheid het hom op die verkeerde pad gebring.

₁As jy vir iemand borg gestaan het, my seun,

as jy jou verbind het vir 'n ander,

₂verstrik geraak het deur wat jy gesê het

en vasgevang is deur jou eie woorde,

₃doen dan dít, my seun,

en red jouself só as jy in 'n ander se mag beland het:

gaan soebat hom, gaan pleit by hom;

₄moenie gaan slaap nie, bly wakker,

₅red jou uit sy mag soos 'n wildsbok uit 'n strik,

soos 'n voëltjie uit die net van 'n voëlvanger.

₆Gaan kyk na die mier, luiaard,

kyk hoe hy werk, en leer by hom.

₇Hy het nie 'n leier nie,

nie 'n opsigter of 'n regeerder nie,

₈tog maak hy sy kosvoorraad reg in die somer,

versamel hy sy voedsel in die oestyd.

₉Hoe lank gaan jy nog lê, luiaard,

wanneer gaan jy opstaan?

₁₀Nog 'n bietjie slaap, nog 'n bietjie sluimer,

nog 'n bietjie handevou en bly lê,

₁₁en daar oorval die armoede jou soos 'n rower,

daar oorrompel die gebrek jou soos 'n inbreker.

₁₂Dit is 'n nikswerd mens, 'n mens vol onreg,

wat altyd reg is om te lieg,

₁₃om te bedrieg deur met die oog te knik,

met die voet te beduie,

met die vingers tekens te gee,

₁₄wat altyd met 'n skelmstreek kom

en voortdurend op kwaad uit is.

Hy maak moeilikheid waar hy gaan.

₁₅So 'n mens se ondergang kom skielik;

hy stort ineen, en daar is nie herstel nie.

₁₆Die Here haat ses dinge,

nee, daar is sewe waarvan Hy 'n afsku het:

₁₇oë wat straal van hoogmoed,

'n tong wat lieg,

hande wat met bloed bevlek is,

₁₈gedagtes wat met komplotte besig is,

voete wat net een koers ken, dié van die kwaad,

₁₉'n getuie wat lieg

en iemand wat rusie stook tussen broers.

₂₀My seun, hou vas aan wat jou vader jou voorskryf;

wat jou moeder jou leer,

moet jy nie in die wind slaan nie.

₂₁Dit moet jou altyd bybly,

daarmee moet jy saamleef;

₂₂dit sal vir jou leiding gee in wat jy doen,

dit sal jou beskerm as jy slaap

en jou lei sodra jy wakker word.

₂₃Wat ek jou voorskryf, is 'n lamp,

my onderrig is 'n lig;

wie hom laat teregwys,

is op die pad na die lewe toe.

₂₄My onderrig sal jou beskerm

teen die slegte vrou van 'n ander

wat jou met haar gladde tong wil verlei.

₂₅Moenie dat haar skoonheid jou begeerte wek nie,

moenie dat sy jou vang met haar oë nie.

₂₆Jy kan 'n prostituut kry vir 'n stuk brood,

maar owerspel kan jou lewe kos.

₂₇Kan jy kole vuur in die vou van jou klere inhark

sonder dat jou klere aan die brand raak?

₂₈Kan jy op brandende kole loop

sonder dat jy jou voete verbrand?

₂₉Net so min kan jy by 'n ander man se vrou slaap

sonder om gestraf te word,

jy sal nie vry kom as jy met haar lol nie.

₃₀'n Dief word verag as hy steel,

ook al steel hy om sy honger te stil,

₃₁en as hy uitgevind word, moet hy sewevoudig teruggee,

selfs al kos dit hom alles wat hy besit.

₃₂Maar 'n man wat owerspel pleeg,

moet van sy verstand af wees,

iemand wat dit doen, verwoes sy lewe.

₃₃Hy sal slae op die lyf loop en verneder word,

sy skande sal nooit uitgewis word nie.

₃₄Die woede van die vrou se man is 'n gloeiende vuur,

sy wraak ken nie perke nie;

₃₅hy laat hom nie afkoop nie,

geen betaling is vir hom genoeg nie.

₁Maak wat ek vir jou sê jou eie, my seun,

hou by wat ek jou voorskryf,

₂maak wat ek jou voorskryf jou eie, dat jy kan lewe,

maak wat ek jou leer jou eie,

so eie soos die appel van jou oog.

₃Sorg dat jy dit altyd onthou,

maak dit 'n deel van jou lewe.

₄Sê vir die wysheid: “Jy is my suster,”

maak die insig familie van jou.

₅Dit sal jou weghou van die slegte vrou af,

die vrou met die verleidelike praatjies.

₆Ek kyk uit by my huis, by die tralievenster uit

₇en ek sien mense wat nog baie moet leer;

ek merk onder hulle veral een onverstandige jongman

₈wat oor die straathoek stap

en die pad na 'n vrou se huis toe kies.

₉Dit is skemeraand, die nag se donker slaan toe.

₁₀Daar kom die vrou hom tegemoet;

sy dra die klere van 'n prostituut,

sy is 'n vrou met listige planne.

₁₁Sy is luidrugtig en uitdagend,

haar huis is te nou vir haar;

₁₂sy maak haar ronde in die strate, op die stadspleine,

sy staan op loer by elke hoek.

₁₃Sy gryp die jongman en soen hom,

onbeskaamd sê sy vir hom:

₁₄“Ek moes maaltydoffers bring

en ek het vandag juis my geloftes betaal.

₁₅Daarom het ek jou kom soek,

ek was op die uitkyk na jou en nou het ek jou gekry.

₁₆Ek het 'n deken oor my bed gegooi,

'n deken van bont Egiptiese linne;

₁₇ek het my bed besprinkel

met mirre, aalwyn en kaneel.

₁₈Kom ons drink van die liefde tot die môre toe,

ons gee ons oor aan die liefdeslus.

₁₉My man is nie tuis nie,

hy is op 'n lang reis;

₂₀hy is weg met 'n vol beurs

en kom eers met volmaan terug.”

₂₁So laat sy die jongman swig vir haar listigheid,

so verlei sy hom met haar gladde tong.

₂₂Hy loop sonder weerstand agter haar aan

soos 'n bees op pad slagpale toe.

Soos 'n dwaas word hy in die strik gevang

₂₃en netnou kloof 'n pyl sy lewer.

Soos 'n voël wat reg in 'n net in vlieg,

so is hy daarmee heen voor hy dit weet.

₂₄Luister na my, my seun,

slaan ag op wat ek sê.

₂₅Moet jou nie met so 'n vrou ophou nie,

moenie haar pad loop nie.

₂₆Sy het die val van baie op haar kerfstok,

sy het al sterk manne laat ondergaan.

₂₇In haar huis is jy op pad na die doderyk toe,

by haar is jy op pad na jou dood toe.