Bybelleesrooster – Dag 176

₂Daar kom 'n tyd dat die berg

waarop die huis van die Here is,

'n blywende plek sal hê bokant die bergtoppe

en sal uitstaan bo die heuwels.

Al die nasies sal daarheen stroom,

₃baie volke sal daarnatoe gaan en sê:

“Kom, laat ons optrek na die berg van die Here toe,

na die huis van die God van Jakob

sodat Hy ons sy wil kan leer,

en ons daarvolgens kan lewe,

want uit Sion kom die openbaring,

uit Jerusalem die woord van die Here.”

₄Hy sal oordeel tussen die nasies,

regspreek oor baie volke.

Hulle sal van hulle swaarde ploegskare smee

en van hulle spiese snoeiskêre.

Die een nasie sal nie meer die swaard teen die ander opneem nie,

en hulle sal nie meer leer om oorlog te maak nie.

₅Kom, volk van Jakob,

laat ons lewe in die lig wat van die Here af kom.

₆U het u volk Jakob verstoot:

hulle gee hulle oor aan die waarsêery van die ooste,

beoefen towery soos die Filistyne

en hou saam met vreemdes vas aan bygeloof;

₇hulle land lê vol silwer en goud,

daar is geen einde aan hulle skatte nie;

hulle land loop vol perde,

daar is geen einde aan die getal van hulle strydwaens nie;

₈hulle land is vol afgode,

hulle buig voor die maaksel van hulle hande,

voor wat hulle vingers gemaak het.

₉So het mense hulleself verneder

en tot 'n val gekom.

U moet hulle dit nie vergewe nie.

₁₀Vlug die rotse in,

kruip weg in die grond

vir die verskrikking wat van die Here kom

en vir die glans van sy majesteit.

₁₁Die hoogmoediges sal tot 'n val kom,

die selfversekerdes sal verneder word.

Op dié dag sal net die Here hoog wees.

₁₂Die Here die Almagtige het 'n dag bepaal

teen al wat trots en hoog is,

teen alles, hoog en laag,

₁₃teen al die hoë en verhewe seders van die Libanon

en teen al die groot bome van Basan;

₁₄teen al die hoë berge

en teen al die steil rante;

₁₅teen elke hoë toring

en teen elke skansmuur;

₁₆teen al die handelskepe

en teen al die vaartuie vol kosbaarhede.

₁₇Die hoogmoediges sal verneder word,

die selfversekerdes sal tot 'n val kom.

Op dié dag sal net die Here hoog wees.

₁₈Die afgode sal heeltemal verdwyn.

₁₉As die Here die aarde begin skud,

vlug die mense in grotte in die rotse

en in gate in die grond in

vir die verskrikking wat van Hom kom

en vir die glans van sy majesteit.

₂₀Daardie dag sal die mense

die afgode van silwer en goud

wat hulle gemaak het om voor te buig,

weggooi vir die rotte en die vlermuise.

₂₁As die Here die aarde begin skud,

sal hulle die rotsholtes en die klipskeure invlug

vir die verskrikking wat van Hom kom

en vir die glans van sy majesteit.

₂₂Moenie op mense staatmaak nie:

hulle blaas so maklik die laaste asem uit.

Hulle is min werd.

₁Die Here die almagtige God

gaan uit Jerusalem en Juda

elke stut en steunpilaar verwyder:

almal wat sorg vir brood en water,

₂elke weerbare burger, elke soldaat, regter, profeet, waarsêer, leier,

₃offisier, hoë amptenaar, raadgewer, kundige vakman en ervare besweerder.

₄Die Here sal aan onvolwassenes gesag gee oor die volk,

wispelturige mense sal oor hulle heers.

₅Die volk sal mekaar te lyf gaan,

man teen man, vriend teen vriend;

seuns sal grysaards te lyf gaan,

en dié wat nie gesag het nie, die vooraanstaandes.

₆As iemand sy broer in die ouerhuis pak en sê:

“Jy het darem nog behoorlike klere, wees ons leier

en regeer oor hierdie vervalle spul,”

₇sal hy op daardie dag uitroep:

“Ek wil nie die leiding neem nie!

Daar is nie kos

en ook nie behoorlike klere in my huis nie;

moet my nie aanstel as leier van die volk nie.”

₈Jerusalem het gewaggel,

Juda het in duie gestort

omdat hulle hulle met woord en daad

teen die Here en teen sy gesag verset het.

₉Hulle partydigheid in die regspraak getuig teen hulle.

Hulle sondig openlik soos Sodom,

hulle steek niks weg nie.

Ellende wag vir hulle,

hulle het die ramp verdien!

₁₀Sê vir die regverdiges met húlle sal dit goed gaan;

hulle sal die vrug van hulle dade geniet.

₁₁Maar ellende wag vir die skuldiges;

wat hulle gedoen het,

sal aan húlle gedoen word.

₁₂My volk het kinders as regeerders,

vrouens as heersers.

My volk, jou leiers verlei jou

en bring jou van koers af.

₁₃Die Here is gereed vir die regsaak,

Hy staan klaar om oor die volk te oordeel.

₁₄Die Here begin die saak

teen die leiers en die hoë amptenare van sy volk:

Julle het die wingerde gestroop;

wat van die hulpeloses geroof is,

lê in julle huise.

₁₅Wat besiel julle dat julle my volk vertrap

en die hulpeloses verdruk?

vra die Here my God, die Almagtige.

₁₆Verder het die Here gesê:

Omdat die vrouens van Sion hoogmoedig is

en kop in die lug rondloop

terwyl hulle ogies maak,

wegstap met trippelgang

en hulle enkelringe laat rinkel,

₁₇sal Ek, die Here, hulle hare afskeer.

Ja, die Here sal hulle koppe kaalskeer.

₂₄In plaas van reukwater sal daar stank wees,

in plaas van 'n gordel 'n tou,

in plaas van gekrulde hare 'n kaalkop,

in plaas van 'n fyn kledingstuk 'n harige roukleed,

in plaas van skoonheid die brandmerk van 'n slaaf.

₂₅Jerusalem, jou manne sal deur die swaard val

en jou jongmanne in die oorlog.

₂₆Jou poorte sal treur en rou,

en jy sal sonder mense sit.

₁Daardie dag sal sewe vrouens

een man beetpak

en sê: “Ons sal ons eie brood eet

en self vir ons klere sorg.

Laat ons net jou naam dra,

neem ons smaad weg!”