Bybelleesrooster – Dag 238

₁Die regverdige kom om,

en daar is niemand

wat dit ter harte neem nie;

dié wat aan die verbond getrou is,

sterf sonder dat iemand begryp

dat dit deur die boosheid in die wêreld is

dat die regverdiges sterf.

₂Dié wat die reguit pad loop,

kom waar daar vrede is,

hulle rus in die graf.

₃Maar kom julle nader hierheen,

kinders van 'n towerheks,

julle wat gebore is uit owerspel en hoerery!

₄Met wie wil julle spot?

Teen wie wil julle grootpraat,

vir wie wil julle tong uitsteek?

Julle is niks anders as 'n klomp rebelle nie,

'n broeisel leuenaars!

₅Julle dien die afgode

met julle wellus onder die groot bome,

onder elke groen boom.

Julle offer julle kinders in die laagtes

en onder die oorhangende rotse.

₆Julle verkies die afgodsbeelde in die laagte,

daar soek julle julle deel.

Vir hulle bring julle drankoffers

en offer julle graanoffers.

Moet Ek My hiervoor oor julle ontferm?

₇Op die hoë berge het jy 'n plek ingerig vir jou onsedelikheid

en daarheen opgeklim om offers te bring.

₈Agter jou deure en aan jou kosyne

het jy beeldjies opgehang.

In jou ontrou aan My het jy jou kaal uitgetrek,

op jou bed geklim en vir jou minnaars plek gemaak.

Jy het jou verbind aan dié saam met wie jy graag geslaap het.

Jy het hulle naaktheid geniet.

₉Jy het na Molek toe gegaan met olie

en met baie wierook;

jy het jou boodskappers na ver plekke toe gestuur,

selfs tot by die doderyk!

₁₀Jou soekery het jou moeg gemaak;

tog het jy nie gesê: “Dit is sinloos!” nie.

Jou wellus het jou aanhou oorweldig,

daarom het jy nie opgehou nie.

₁₁Vir wie was jy so bang en bevrees

dat jy vals geword het?

Jy dink nie meer aan My nie,

jy steur jou nie meer aan My nie.

Ek het lank geswyg

toe jy My nie meer gedien het nie,

₁₂maar nou sal Ek jou skynheiligheid aan die kaak stel,

alles wat jy gedoen het,

en jou gode sal jou nie kan help nie.

₁₃As jy om hulp roep,

moet jou spul gode jou kom red,

maar 'n wind waai hulle almal weg,

'n yl luggie vat hulle weg.

Maar wie by My skuil, sal die land besit

en my heilige berg as eiendom ontvang.

Vul die pad op, vul dit op, maak dit gereed!

Verwyder die struikelblokke uit die pad van my volk.

₁₅So sê Hy wat hoog en verhewe is,

Hy wat ewig leef en wie se Naam die Heilige is:

Ek woon in 'n hoë en heilige plek

en Ek is by hom wat verdruk en nederig is.

Ek gee nuwe krag aan die nederiges,

Ek gee nuwe krag aan die verdruktes.

₁₆Ek reken nie vir altyd sondes toe nie,

Ek bly nie vir altyd toornig nie,

want anders sou dit die einde beteken van die mens,

die mens aan wie Ek die asem gegee het.

₁₇Ek het toornig geword oor my volk se sonde en hebsug,

Ek het hom geslaan en hom verlaat

omdat Ek toornig was.

Hy was opstandig en het sy eie koers ingeslaan.

₁₈Ek het gesien wat met hom gebeur,

en Ek sal hom genees.

Dié van hom wat treur,

sal Ek lei en terugbring;

Ek sal vir hulle uitkoms gee.

₁₉Ek stel hulle in staat om My weer te loof.

Vrede vir dié wat ver is, vrede vir dié wat naby is,

sê die Here.

Ek sal hulle genees.

₂₀Maar die goddeloses is soos die onstuimige see

wat nie tot rus kan kom nie

en waarvan die golwe aanhou om slyk en modder uit te stoot.

₂₁Vir die goddeloses is daar geen vrede nie,

sê my God.

Roep uit volle bors,

moet niks verswyg nie!

Laat jou stem hoor, duidelik soos 'n ramshoring!

Wys my volk op hulle oortredinge,

die afstammelinge van Jakob op hulle sondes.

₂Hulle vra wel elke dag na my wil,

asof hulle graag wil weet wat Ek van hulle verwag.

Hulle gee voor dat hulle 'n nasie is wat doen wat reg is

en hom aan die bepalings van sy God hou.

Hulle vra My wel om regverdige beslissings

asof hulle van my teenwoordigheid hou.

₃Hulle vra:

“Waarom vas ons, maar U sien dit nie, verootmoedig ons ons, maar U gee nie aandag daaraan nie?”

Dit is omdat julle op die vasdae doen wat julle wil

en die mense wat vir julle werk, nog harder laat werk.

₄Julle vasdae loop uit op twis en rusie,

julle dam mekaar met die vuis by.

Julle kan nie op hierdie manier vas

en dan verwag dat julle gebed verhoor sal word in die hemel nie.

₅Is dit ál wat Ek op 'n vasdag wil hê:

net dat 'n mens homself verneder,

dat hy sy nek buig soos 'n biesie

en in sak en as sit?

Noem jy dít 'n vasdag,

'n dag waarvan die Here hou?

₆Is die vas wat Ek wil hê, nie dít nie:

om dié wat onregverdig gevange gehou word, te bevry,

om die juk wat op mense druk, af te haal,

om verdruktes vry te maak,

om elke juk te breek?

₇Is dit nie dat jy vir dié wat honger is,

van jou brood gee nie,

dat jy aan die armes en die dakloses 'n blyplek gee nie,

dat wanneer jy iemand sonder klere sien,

jy vir hom klere gee nie,

dat jy jou medemens nie aan sy lot oorlaat nie?

₈Dan sal die lig vir jou deurbreek soos die rooidag,

jy sal gou herstel.

Hy wat jou red, sal voor jou uit gaan,

die mag van die Here sal agter jou aankom.

₉Dan sal jy roep, en die Here sal antwoord,

jy sal om hulp roep, en Hy sal sê: Hier is Ek!

As jy sorg dat mense nie meer by jou verdruk word nie,

nie meer gedreig en vals beskuldig word nie,

₁₀as jy jou wy aan dié wat honger het,

as jy voorsien in die behoeftes van dié wat in nood is,

sal die lig vir jou skyn wanneer dit donker is,

sal wat vir jou nag is, word soos die helder middag.

₁₁Die Here sal jou altyddeur lei;

selfs in dor streke sal Hy in jou behoeftes voorsien.

Hy sal jou sterk maak.

Jy sal wees soos 'n tuin met volop water,

soos 'n fontein waarvan die water nie opdroog nie.

₁₂Jou mense sal die ou puinhope herbou,

die fondamente herstel wat al geslagte lank bestaan.

Jy sal bekend staan as 'n volk wat sy afgebreekte mure herbou,

wat sy strate herstel sodat daar weer mense kan woon.

₁₃As jy nie op die sabbat oortree nie,

op my heilige dag doen net wat jy wil nie,

as jy die sabbat 'n vreugde noem,

as jy die heilige dag van die Here in ere hou,

as jy dit eer deur nie jou gewone gang te gaan nie,

nie te doen net wat jy wil nie,

en nie handel dryf nie,

₁₄sal jy vreugde vind in die Here.

Ek sal jou die land weer in besit laat neem,

Ek sal jou laat eet van die opbrengs van die land van jou vader Jakob.

Ek, die Here, het dit gesê.

₁Die arm van die Here is nie te kort om te help nie

en sy oor is nie te doof om te hoor nie.

₂Dit is julle oortredinge wat skeiding gebring het

tussen julle en julle God,

dit is julle sondes wat maak dat Hy Hom nie aan julle steur nie

en nie na julle wil luister nie.

₃Julle hande is met bloed bevlek,

julle vingers met onreg.

Julle praat net leuens,

julle bedink net onreg.

₄Niemand stel sy saak eerlik nie,

geen uitspraak is betroubaar nie.

Almal vertrou op leë woorde,

wat hulle sê, is nie waar nie,

hulle is swanger van kwaad,

hulle bring onreg voort.

₅Hulle broei slangeiers uit,

hulle weef spinnerakke.

Wie van daardie eiers eet, sterf;

as dit oopgebreek word, kom daar slange uit.

₆Hulle spinnedrade deug nie vir klere nie,

hulle kan hulle nie toemaak met wat hulle gemaak het nie;

hulle dade is misdade,

hulle pleeg net geweld.

₇Hulle is daarop uit om kwaad te doen,

hulle aarsel nie om onskuldige bloed te vergiet nie.

Hulle planne is bose planne:

oral waar hulle gaan, is daar verwoesting en ondergang.

₈Hulle ken nie so iets soos 'n pad van vrede nie,

waar hulle loop, is daar geen reg nie;

hulle loop krom paaie,

wie hulle volg, sal nie vrede ken nie.

₉Daarom is daar geen sprake

van reg en geregtigheid vir ons nie.

Ons wag op lig, maar dit bly donker,

ons wag op 'n straaltjie lig, maar ons pad bly pikdonker.

₁₀Ons tas teen die mure soos blindes,

ons tas rond soos mense wat geen oë het nie.

Ons struikel helder oordag soos in die skemer,

ons is soos dooies onder gesonde mense.

₁₁Ons is almal soos grommende bere,

soos duiwe wat kla en kla.

Ons wag op reg, maar daar is geen reg nie,

op redding, maar dit bly ver van ons af.

₁₂Ons oortredings teen U is baie,

ons sondes kla ons aan.

Ons oortredings bly ons by,

ons bly bewus van ons sondes:

₁₃die oortreding en die geveinsdheid teenoor die Here,

die ontrou teenoor ons God,

die beplanning van onderdrukking, die verdraaiing van die reg,

die uitdink en rondvertel van leuens.

₁₄Die reg het van die toneel verdwyn,

die geregtigheid is ver van ons af,

want die waarheid struikel waar daar reg gespreek word,

eerlikheid kan nie daar inkom nie.

₁₅Die waarheid het verdwyn,

wie ophou om kwaad te doen, word daaroor vervolg.

Die Here het dit gesien

en dit is verkeerd in sy oë dat daar geen reg is nie.

₁₆Hy sien dat daar niemand tussenbeide tree nie,

Hy is verbaas daaroor.

Daarom tree Hy self op

en laat Hy self sy geregtigheid geld.

₁₇Hy trek geregtigheid aan soos 'n pantser

en redding is die helm op sy kop;

Hy trek straf aan as klere,

Hy hang woede om Hom soos 'n mantel.

₁₈Hy vergeld volgens verdienste:

toorn vir sy teëstanders,

straf vir sy vyande,

vergelding vir die eilande soos hulle verdien.

₁₉Van oos tot wes sal die Naam

en die mag van die Here geëer word.

Wanneer die teëstander aanstorm soos 'n rivier,

jaag die Gees van die Here hom op loop.

₂₀Die Here kom na Sion toe as Verlosser,

na dié toe in Jakob wat hulle van hulle sonde bekeer.

So sê die Here.

₂₁Wat My betref, sê die Here,

dit is my verbond met die volk:

my Gees wat op jou is

en my woorde wat Ek in jou mond lê,

sal nie uit jou mond en uit die mond van jou kinders

en jou kindskinders verdwyn nie, sê die Here,

nie nou nie en nooit nie.