Bybelleesrooster – Dag 37

₁Die Here het met Moses gepraat in die tent van ontmoeting in die Sinaiwoestyn. Dit was op die eerste dag van die tweede maand, in die tweede jaar nadat Israel uit Egipte weggetrek het. _2-3Die Here het gesê: “Jy en Aäron moet al die Israeliete man vir man tel volgens afkoms en familie; skryf die name op van elke manlike persoon van twintig jaar en ouer, elkeen in Israel wat vir militêre diens geskik is en wat in leërafdelings ingedeel is. ₄Julle moet hierin bygestaan word deur persone wat hoofde is van hulle families, een uit elke stam. ₅En dit is die name van die manne wat vir julle moet bystaan:

₁₆Hulle was die manne wat uit die vergadering aangewys is, leiers van die stamme van hulle voorvaders en stamhoofde van Israel.

₁₇Moses en Aäron het hierdie manne wie se name genoem is, laat kom. ₁₈Op die eerste dag van die tweede maand het hulle toe die hele volk bymekaargeroep. Daarna het elke weerbare man sy afkoms volgens stam en familie opgegee, almal van twintig jaar en ouer. ₁₉Moses het hulle in die Sinaiwoestyn getel, soos die Here hom beveel het.

_20-43Die manlike afstammelinge van die onderskeie stamvaders was:

Dit was in die geval van elke stam die getal weerbare manne van twintig jaar en ouer, getel volgens afkoms en familie.

_44-46Dit was dan die getal van die manne wat deur Moses, Aäron en die twaalf Israelitiese stamhoofde getel is. Altesaam was die getelde Israeliete 603 550. Dit was die weerbare manne van twintig jaar en ouer, getel volgens families.

₄₇Die Leviete is nie as afsonderlike stam bygetel nie. ₄₈Die Here het naamlik vir Moses gesê: ₄₉“Die stam Levi moet jy nie tel nie en hulle getal moet jy nie by dié van die Israeliete voeg nie. ₅₀Jy moet die Leviete aanstel om toesig te hou oor die tabernakel met die getuienis, oor al sy gereedskap en al sy toebehore. Hulle moet die tabernakel en sy gereedskap dra; net húlle moet daarmee werk; en hulle moet hulle tente rondom die tabernakel opslaan. ₅₁As die tabernakel verskuif moet word, moet die Leviete dit uitmekaarhaal; en as dit opgeslaan moet word, moet hulle dit opslaan. 'n Onbevoegde persoon wat nader kom om te help, moet doodgemaak word.

₅₂“Die ander stamme van Israel moet hulle tente opslaan, elke stam op sy eie staanplek, rondom sy eie vaandel, ingedeel by sy eie leërafdeling, ₅₃maar die Leviete moet hulle tente rondom die tabernakel met die getuienis opslaan, sodat my toorn nie oor die Israeliete kom nie. So moet die Leviete dan vir die tabernakel met die getuienis sorg.”

₅₄Die Israeliete het alles presies gedoen soos die Here vir Moses beveel het.

₁Die Here het met Moses en Aäron gepraat en gesê: ₂“Die Israeliete moet kamp opslaan, elkeen by sy vaandel, by sy familieteken. Hulle moet die kamp rondom die tent van ontmoeting opslaan, so 'n entjie daarvandaan.

₃“Aan die ooste, sonop se kant, moet die stam Juda kamp opslaan. Hy moet dit doen by sy vaandel en ingedeel in leërafdelings. Nagson seun van Amminadab is die leier van die stam. ₄Die getal van Juda se weerbare manne is 74 600. ₅Die stam Issaskar moet langs Juda kamp opslaan. Netanel seun van Suar is sy leier. ₆Die getal van sy weerbare manne is 54 400. ₇Daarna volg die stam Sebulon met Eliab seun van Gelon as leier. ₈Die getal van sy weerbare manne is 57 400. ₉Die hele kamp onder leiding van Juda, ingedeel in leërafdelings, is altesaam 186 400 weerbare manne.

“Hierdie drie stamme moet altyd eerste versit.

₁₀“Aan die suidekant moet die stam Ruben kamp opslaan. Hy moet dit doen by sy vaandel en ingedeel in leërafdelings. Elisur seun van Sedeür is die leier van die stam. ₁₁Die getal van Ruben se weerbare manne is 46 500. ₁₂Die stam Simeon moet langs Ruben kamp opslaan. Selumiël seun van Suri-Saddai is die leier van die stam. ₁₃Die getal van sy weerbare manne is 59 300. ₁₄Daarna volg die stam Gad met Eljasaf seun van Reüel as leier. ₁₅Die getal van sy weerbare manne is 45 650. ₁₆Die hele kamp onder leiding van Ruben, ingedeel in leërafdelings, is altesaam 151 450 weerbare manne.

“Hierdie stamme moet altyd tweede versit.

₁₇“Die kamp van die Leviete met die tent van ontmoeting moet altyd in die middel van die ander kampe bly wanneer hulle trek. In dieselfde orde waarin die stamme kamp opslaan, moet hulle ook die kamp opbreek, elkeen op sy eie plek en by sy eie vaandel.

₁₈“Aan die westekant moet die stam Efraim kamp opslaan. Hy moet dit doen by sy vaandel en ingedeel in leërafdelings. Elisama seun van Ammihud is die leier van die stam. ₁₉Die getal van die weerbare manne is 40 500. ₂₀Die stam Manasse moet langs Efraim wees. Gamliël seun van Pedasur is sy leier. ₂₁Die getal van sy weerbare manne is 32 200. ₂₂Daarna volg die stam Benjamin met Abidan seun van Gidoni as leier. ₂₃Die getal van sy weerbare manne is 35 400. ₂₄Die hele kamp onder leiding van Efraim, ingedeel in leërafdelings, is altesaam 108 100 weerbare manne.

“Hierdie stamme moet altyd derde versit.

₂₅“Aan die noordekant moet die stam Dan kamp opslaan. Hy moet dit doen by sy vaandel en ingedeel in leërafdelings. Agiëser seun van Ammi-Saddai is die leier van hierdie stam. ₂₆Die getal van Dan se weerbare manne is 62 700. ₂₇Die stam Aser moet langs Dan kamp opslaan. Pagiël seun van Okran is leier van die stam. ₂₈Die getal van Aser se weerbare manne is 41 500. ₂₉Daarna volg die stam Naftali met Agira seun van Enan as leier. ₃₀Die getal van sy weerbare manne is 53 400. ₃₁Die hele kamp onder leiding van Dan is altesaam 157 600 weerbare manne.

“Hierdie stamme moet met hulle vaandels die laaste versit.”

₃₂Dit was dan die groottotaal van al die Israeliete, getel volgens families. Al die geteldes van die kampe, ingedeel in leërafdelings, was 603 550 man. ₃₃Die Leviete is nie onder die getal van Israel bygereken nie, soos die Here vir Moses beveel het. ₃₄Die Israeliete het presies gedoen soos die Here vir Moses beveel het. Hulle het kamp opgeslaan, elkeen by sy eie vaandel, en elke keer weer weggetrek, elke stam ingedeel volgens sy familiegroepe.

₁Toe die Here destyds met Moses op Sinaiberg gepraat het, het Aäron en Moses reeds afstammelinge gehad. ₂Die name van die seuns van Aäron was Nadab, die oudste, Abihu, Eleasar en Itamar. ₃Dit was die name van Aäron se seuns, gesalfde priesters, vir wie Moses in die priesteramp aangestel het. ₄Maar die Here het vir Nadab en Abihu laat sterwe omdat hulle in die Sinaiwoestyn ongeoorloofde vuur voor Hom neergesit het. Hulle het geen seuns gehad nie. Eleasar en Itamar het toe die priesterdiens verrig onder die toesig van Aäron, hulle pa.

₅Die Here het verder vir Moses gesê: ₆“Stel die stam Levi tot beskikking van die priester Aäron, dat hulle hom kan help. ₇Hulle moet vir Aäron in die gemeente diensbeurte waarneem in die tent van ontmoeting deur die werk wat hulle in die tabernakel doen. ₈Hulle moet sorg vir al die toebehore van die tent van ontmoeting; hulle moet die diensbeurte vir die volk Israel waarneem deur die werk wat hulle in die tabernakel doen. ₉Jy moet die Leviete tot beskikking van Aäron en sy seuns stel; uit die volk Israel is hulle die mense wat volkome aan Aäron se diens gewy is. ₁₀Net aan Aäron en sy seuns is dit opgedra om die priesterdiens te verrig; 'n onbevoegde persoon wat nader kom om dit te doen, moet doodgemaak word.”

₁₁Die Here het weer met Moses gepraat en gesê: ₁₂“Kyk, Ek het die Leviete uit die volk vir My geneem in die plek van al Israel se eersgeborenes; hulle behoort aan My. ₁₃Al die eersgeborenes is Myne: die dag toe Ek al die eersgeborenes van die Egiptenaars omgebring het, het Ek dié van Israel, van mens en dier, vir My opgeëis; hulle behoort aan My. Ek is die Here.”

₁₄Die Here het in die Sinaiwoestyn vir Moses gesê: ₁₅“Tel die Leviete volgens hulle afkoms en families, almal van 'n maand en ouer wat manlik is.”

₁₆Moses het hulle getel presies soos die Here hom beveel het.

₁₇Levi se seuns was Gerson, Kehat en Merari. ₁₈Die Gersongroep was Libni en Simi. ₁₉Die Kehatgroep was Amram, Jishar, Hebron en Ussiël. ₂₀Die Merarigroep was Magli en Musi. Dit was die afstammelinge van Levi volgens familieverband. ₂₁Die afstammelinge van Gerson was die familiegroepe Libni en Simi. Hulle was die Gersoniete. ₂₂Hulle manlike persone van 'n maand en ouer wat so getel is, was altesaam sewe duisend vyf honderd.

₂₃Die Gersongroep het aan die westekant agter die tabernakel kamp opgeslaan ₂₄met Eljasaf seun van Lael as leier. ₂₅Die taak van die Gersoniete by die tent van ontmoeting was die versorging van die tabernakel: die tent met sy dekseile, die gordyn by die deur van die tent van ontmoeting, ₂₆die gordyn van die ingang van die voorhof, die gordyne van die voorhof wat rondom die tabernakel en die altaar was, al die toue, met alles wat dié diens insluit.

₂₇Die Kehatgroep was Amram, Jishar, Hebron en Ussiël. Hulle was die Kehatiete. ₂₈Hulle manlike persone van 'n maand en ouer was altesaam ag duisend ses honderd. Hulle taak was om die heiligdom te versorg. ₂₉Die Kehatgroep het aan die suidekant van die tabernakel kamp opgeslaan ₃₀met Elisafan seun van Ussiël as leier. ₃₁Hulle taak was die versorging van die ark, die tafel, die kandelaar, die altare, die gereedskap wat in die heiligdom gebruik word, sowel as die voorhangsel, met alles wat dié diens insluit. ₃₂Eleasar seun van die priester Aäron was die leier van die familiehoofde van Levi, en as sodanig opsigter oor almal wat in die heiligdom diens doen.

₃₃Merari was die hoof van die familiegroepe Magli en Musi. Hulle was die Merariërs. ₃₄Hulle manlike persone van 'n maand en ouer wat so getel is, was altesaam ses duisend twee honderd. ₃₅Suriël seun van Abigajil was leier van die Merarigroep wat aan die noordekant van die tabernakel kamp opgeslaan het. ₃₆Die Merarigroep was verantwoordelik vir die versorging van die rame, dwarslatte, style en voetstukke van die tabernakel, en ook van al sy gereedskap, met alles wat dié diens insluit; ₃₇ook van die style rondom die voorhof, met voetstukke, penne en toue.

₃₈Moses, Aäron en Aäron se seuns het aan die oostekant voor die tabernakel, voor die tent van ontmoeting, kamp opgeslaan. Aäron en sy seuns het die diens van die tabernakel in belang van Israel waargeneem. 'n Onbevoegde persoon wat nader gekom het om te help, moes doodgemaak word.

₃₉Die manlike Leviete van 'n maand en ouer wat deur Moses en Aäron op bevel van die Here volgens families getel is, was altesaam twee en twintig duisend.

₄₀Die Here het ook vir Moses gesê: “Tel al die manlike eersgeborenes van die Israeliete van 'n maand en ouer, en maak 'n lys van hulle name. ₄₁In die plek van al die eersgeborenes uit Israel moet jy die Leviete vir my diens beskikbaar stel, en ook die Leviete se vee in die plek van al die eerstelinge onder die vee van die Israeliete. Ek is die Here.”

₄₂Moses het toe volgens die bevel van die Here al die eersgeborenes van die Israeliete getel. ₄₃Die manlike eersgeborenes van 'n maand en ouer wie se name opgeskryf is, was twee en twintig duisend twee honderd drie en sewentig.

₄₄Die Here het verder vir Moses gesê: ₄₅“Stel die Leviete beskikbaar vir my diens in die plek van al Israel se eersgeborenes; neem ook die Leviete se vee in die plek van die Israeliete s'n. Die Leviete behoort aan My. Ek is die Here. ₄₆Die twee honderd drie en sewentig eersgeborenes uit die Israeliete wat daar meer is as Leviete, moet losgekoop word. ₄₇Jy moet vyf silwerstukke per kop invorder; bereken volgens die standaardgewig van die heiligdom is dit elf gram per silwerstuk. ₄₈Die geld vir hierdie groter getal eersgeborenes van die Israeliete moet jy as losprys aan Aäron en sy seuns gee.”

₄₉Moses het toe die loskoopgeld ingevorder vir dié eersgeborenes wat daar meer was as dié wat reeds met Leviete losgekoop is. ₅₀Hierdie geld het hy geneem van die eersgebore Israeliete, vyftien en 'n half kilogram silwer. ₅₁Dit het Moses in opdrag van die Here aan Aäron en sy seuns gegee, soos die Here hom beveel het.