Bible Society of South Africa
Leesplanne
Dagboek 2021
Dagboek 2021 – 1 April

Dagboek 2021 – 1 April

Eensaam tussen vriende

Bybelteks(te)

MATTEUS 26

Petrus sal Jesus verloën

31Toe sê Jesus vir hulle: “Julle almal sal My vannag nog in die steek laat. Daar staan immers geskrywe:

“ ‘Ek sal die herder doodmaak,

en die skape van sy kudde sal uitmekaar gejaag word.’

32“Maar nadat Ek uit die dood opgewek is, sal Ek julle vooruitgaan na Galilea toe.”

33Daarop het Petrus vir Hom gesê: “Al sal hulle U ook almal in die steek laat, ék sal U nooit in die steek laat nie.”

34Toe sê Jesus vir hom: “Dit verseker Ek jou: Vannag nog, voordat die haan kraai, sal jy My drie maal verloën.”

35Petrus sê vir Hom: “Al moet ek saam met U sterwe, ek sal U beslis nie verloën nie!”

Al die ander dissipels het ook so gesê.

Jesus in Getsemane

36Daarna kom Jesus met sy dissipels by 'n plek met die naam Getsemane, en Hy sê vir hulle: “Sit hier terwyl Ek daar gaan bid.”

37Hy het vir Petrus en die twee seuns van Sebedeus saamgeneem. Toe het Hy bedroef en beangs geword 38en vir hulle gesê: “Ek voel doodsbenoud. Bly hier en waak saam met My.”

39Hy het 'n entjie verder gegaan en daar gekniel met die gesig teen die grond en gebid: “My Vader, as dit moontlik is, laat hierdie lydensbeker by My verbygaan. Moet nogtans nie doen soos Ek wil nie, maar soos U wil.”

40Daarna kom Hy na die dissipels toe terug en kry hulle aan die slaap. Hy sê toe vir Petrus: “Kon julle nie eens een uur lank saam met My waak nie? 41Waak en bid, sodat julle nie in versoeking kom nie. Die gees is gewillig, maar die vlees is swak.”

42'n Tweede keer het Hy gaan bid en gesê: “My Vader, as hierdie lydensbeker nie by My kan verbygaan sonder dat Ek dit drink nie, laat u wil geskied.”

43Toe Hy terugkom, kry Hy hulle weer aan die slaap, want van die vaak kon hulle nie hulle oë oophou nie.

44Hy het hulle weer alleen laat bly en 'n derde keer gaan bid en dieselfde woorde gesê. 45Toe kom Hy na die dissipels toe terug en sê vir hulle: “Slaap en rus julle nog? Die uur het gekom. Die Seun van die mens word in die hande van sondaars oorgegee. 46Staan op, kom ons loop. Kyk, die man wat My verraai, is hier naby.”

MATTEUS 26:31-46AFR83Maak oop in die Bybelleser

Ken jy die gevoel dat jy omring is van mense, maar tog oneindig eensaam? Mense wat vrolik rondom jou gesels en opgewonde lugkastele bou, en jy sit tussen hulle met spanning wat meedoënloos aan jou knaag. Oor ’n verhouding, of ’n transaksie, of inkomste, of ’n hangende hofgeding, of ’n beursaansoek of werksgeleentheid. Die ergste is as jy met jou ouers of eggenoot, jou familie of vriende probeer praat, maar hulle verstaan eenvoudig nie die diepte van jou worsteling nie.

So moes Jesus in sy krisisuur gevoel het. Hy het reeds vir sy dissipels gesê dat Hy aan mense oorgelewer gaan word om doodgemaak te word, dat een van dié wat vir oulaas saam met Hom eet, Hom sou verraai. Maar elkeen van hulle bepleit net sy eie onskuld. Dan sê Hy: Julle almal sal My vannag nog in die steek laat. Heftig ontken hulle dit; Petrus sweer hy sal Jesus om die dood nie verloën nie.

Al wat dan oorbly, is om te gaan bid. In Getsemane vat Jesus vir Petrus en die twee seuns van Sebedeus saam as Hy Hom afsonder om in sy uur van nood te bid. Sekerlik moes sy dissipels teen dié tyd die erns en diepte van sy spanning gesien het. Hulle het mos die opbouende spanning van herhaalde konflik met die Joodse leiers beleef – hulle moes wéét watter risiko dit ingehou het. Jesus bid… en hulle dut. Drie maal. Jesus is tussen sy dissipels, en tog absoluut alleen.

Dit is ’n besondere aspek van Jesus se lyding: sy eensaamheid selfs in die kring van sy intiemste vriende, juis wanneer sy hemelse Vader nie sy desperate smeekgebed beantwoord nie. Dink jy jy is eensaam? Voel jy of God nie jou gebed verhoor nie? Die Here Jesus het dit self ervaar. Sy Gees tree vir jou in.

Verlate van u vriende, verlate Worstelaar;
 verlate van die Vader – verlate Middelaar!
 Net pyn en dors en duister is by U in u nood;
 ontdaan van aardse luister, oorwin U tog die dood!
 (Gesang 387:2)

Dr Wouter van Wyk, Sinodaal

Bible Society of South Africav.4.26.9
VOLG ONS