Bible Society of South Africa
Leesplanne
Dagboek 2021
Dagboek 2021 – 10 April

Dagboek 2021 – 10 April

Hoe getuig ons?

Bybelteks(te)

DIE OPENBARING 5

Die Lam is waardig om die boek oop te maak

1In die regterhand van Hom wat op die troon sit, het ek 'n boekrol gesien wat aan die voor- en aan die agterkant vol geskrywe was en wat met sewe seëls goed verseël was. 2Toe het ek 'n sterk engel gesien wat met 'n harde stem uitroep: “Wie is waardig om die boek oop te maak deur die seëls daarvan te breek?”

3Maar niemand in die hemel of op die aarde of onder die aarde was in staat om die boek oop te maak en daarin te kyk nie. 4Ek het baie gehuil omdat daar niemand gekry is wat waardig was om die boek oop te maak en daarin te kyk nie. 5Toe sê een van die ouderlinge vir my: “Moenie huil nie. Kyk, die Leeu uit die stam van Juda, die Afstammeling van Dawid, het die oorwinning behaal en kan die boek met die sewe seëls oopmaak.”

6Toe het ek voor die troon wat omring was deur die vier lewende wesens, tussen die troon en die ouderlinge, 'n Lam sien staan, die Een wat geslag was. Hy het sewe horings en sewe oë gehad. Die sewe oë is die sewe Geeste van God, wat oor die hele aarde uitgestuur is. 7Hy het toe gegaan en die boek ontvang uit die regterhand van Hom wat op die troon sit.

8Net toe die Lam die boek neem, het die vier lewende wesens en die vier en twintig ouderlinge voor Hom gekniel. Elkeen van hulle het 'n siter gehad en 'n goue bak vol wierook, die gebede van die gelowiges. 9Toe sing hulle 'n nuwe lied:

“U is waardig om die boek te neem en die seëls daarvan oop te maak omdat U geslag is en met u bloed mense vir God losgekoop het uit elke stam en taal en volk en nasie.

10U het hulle 'n koninkryk en priesters vir ons God gemaak en hulle sal oor die aarde regeer.”

11Toe het ek rondom die troon en die lewende wesens en die ouderlinge 'n groot menigte engele gesien. Daar was duisende der duisende, ja, miljoene der miljoene. Ek het hulle hard hoor 12uitroep:

“Die Lam wat geslag was, is waardig om die mag en rykdom, die wysheid en sterkte, die eer, heerlikheid en lof te ontvang.”

13Die hele skepping, alles in die hemel en op die aarde en onder die aarde en op die see, ja, alles wat daar is, het ek hoor sê:

“Aan Hom wat op die troon sit, en aan die Lam, behoort die lof en die eer, die heerlikheid en die krag, tot in alle ewigheid.”

14Die vier lewende wesens het gesê: “Amen!” En die ouderlinge het gekniel en God aanbid.

DIE OPENBARING 5AFR83Maak oop in die Bybelleser

Openbaring stel die sewe gemeentes aan wie dit gerig is, asook ons as gelowiges, voor ’n keuse. Nêrens kom hierdie keuse duideliker voor nie as in Openbaring 5. Hier word vertel hoe daar gesoek word na iemand waardig genoeg om ’n boekrol te neem en die seëls daarvan oop te breek (Op 5:2-3). Aanvanklik blyk dit dat daar niemand is wat waardig is om hierdie taak te verrig nie (Op 5:4), maar dan tree iemand na vore en vertel wie dit is wat waardig is om dit te doen. Hierdie hemelse ouderling vertel dat die Leeu uit die stam van Juda, die loot van Dawid (Op 5:5, NDV), die Een is wat waardig is om die boekrol te neem.

Hierdie getuienis sluit aan by Israel se tipiese verwagting van wie die verlosser van die wêreld sou wees. Dit is ’n magtige en sterk persoon (’n Leeu), ’n koninklike figuur (die loot van Dawid). Dit sou die messias wees wat met ’n ysterhand regeer en die vyande van Israel vernietig. Johannes getuig egter van ’n ander verstaan van wie God se Messias is. Dit is toe nie ’n leeu nie, dit was nog nooit ’n leeu nie, maar ’n Lam, soos een wat geslag is, maar staande (Op 5:6). Die Messias is toe nie Een wat oorwin deur geweld en mag nie, maar deur ʼn liefdesoffer, deur nederigheid en deur getrou aan God te wees tot die dood toe.

So roep Johannes ook sy gemeentes op om te getuig van die evangelie van God, ’n evangelie van oorwinning deur liefde en genade. Dit is die evangelie van die oorwinning van en oor die dood. Ons word ook so opgeroep om hierdie keuse te maak, en wanneer ons kies om die getuienis van die Lam voort te sit, hoor ons weer die woorde van die harde stem uit die hemel: Húlle het hom oorwin op grond van die bloed van die Lam en op grond van hulle getuienis (Op 12:11, NDV).

Ds Robert van Niekerk, Noordelike Pretoria

Bible Society of South Africav.4.25.3
VOLG ONS