Bible Society of South Africa
Leesplanne
Dagboek 2021
Dagboek 2021 – 15 Junie

Dagboek 2021 – 15 Junie

Is dit tyd, of is dit tyd, of is dit altwee?

Bybelteks(te)

HANDELINGE 2

Die uitstorting van die Heilige Gees

1Toe die dag van die pinksterfees aanbreek, was hulle almal op een plek bymekaar. 2Skielik was daar 'n geluid uit die hemel soos van 'n geweldige stormwind, en dit het die hele vertrek gevul waar hulle gesit het. 3Hulle het iets soos vuur gesien wat in tonge verdeel en op elkeen van hulle gekom het. 4Almal is met die Heilige Gees vervul en hulle het in ander tale begin praat soos die Heilige Gees dit aan hulle gegee het om onder sy leiding te doen.

5Daar het godsdienstige Jode uit al die nasies onder die son in Jerusalem gewoon. 6Toe die mense die geluid hoor, het 'n groot skare saamgedrom. En omdat elkeen gehoor het hoe daar in sy eie taal gepraat word, het hulle nie geweet hoe hulle dit het nie. 7Verras en verbaas sê hulle toe: “Die mense wat daar praat, is tog almal Galileërs. 8Hoe hoor elkeen van ons dan sy eie moedertaal? 9Perse, Mediërs en Elamiete, sowel as die inwoners van Mesopotamië, Judea en Kappadosië, Pontus en die provinsie Asië, 10Frigië en Pamfilië, Egipte en die dele van Libië om Sirene, mense uit Rome, 11Jode sowel as heidene wat die Joodse geloof aangeneem het, Kretensers en Arabiere – ons hoor hulle in ons eie tale praat oor die groot dinge wat God gedoen het.”

12Hulle was almal verbaas en uit die veld geslaan. Party het vir mekaar gevra: “Wat kan dit tog beteken?”

13Maar party het gespot en gesê: “Hulle is dronk.”

HANDELINGE 2:1-13AFR83Maak oop in die Bybelleser

Daar is tyd en daar is tyd. Daar is tyd soos dié op ons horlosie en kalender, en dan is daar tyd soos in die tyd het aangebreek – ’n baie belangrike moment. Die uitstorting van die Heilige Gees val in die tweede kategorie. Dié tyd het nie slegs te doen met 50 dae na Paasfees nie, maar eerder met God se kragtige ingryping in die geskiedenis van die mensdom. Dit is nie asof die Heilige Gees tot in daardie stadium in die geskiedenis van die mensdom afwesig was nie. Ons weet die Gees van God was reeds van Genesis 1 af teenwoordig. Dalk het hierdie ingryping van God op so ’n indrukwekkende manier gebeur sodat die mens ’n bietjie kon stilstaan, dink, besef en dan gaan optree.

Ons glo dat God deur sy Gees op aarde aan die werk is. Wat hier gebeur, is dat daar baie mense uit baie lande rondom die Middellandse See in Jerusalem teenwoordig was. Die mense is daar om een van die drie groot feeste van die jaar, die oesfees, te vier om die Here te dank vir die oes wat ingesamel is. Met Jesus se kruisiging, opstanding en hemelvaart is daar ook, sonder dat mense dit besef, ’n groot oes wat ingesamel gaan word: die oes van die volgelinge van God. Die uitstorting van die Heilige Gees is om vir die arbeiders te sê die oes is gereed, gaan na almal toe en samel God se oes in, en onthou, die Gees van God sal saam met julle wees.

Op daardie moment in die geskiedenis ontvang die dissipels en al Jesus se volgelinge die opdrag en toerusting om die “groot oes van God” te gaan insamel. Dit gaan gepaard met wondergebeure: Die dissipels praat met elkeen in hul moedertaal nadat hulle die Gees ontvang het. Hulle word met “vuur” gedoop en uitgestuur. Ja, daar sal altyd die ongelowiges wees, dié wat fout soek met alles en diegene wat eerder skinderstories aandra as om tot inkeer te kom.

Ds Hannes Janse van Rensburg, Zuurfontein

Bible Society of South Africav.4.26.9
VOLG ONS