Bible Society of South Africa
Leesplanne
Dagboek 2021
Dagboek 2021 – 19 Junie

Dagboek 2021 – 19 Junie

Glo die teendeel

Bybelteks(te)

HABAKUK 3

Habakuk se gebed

1'n Gebed van die profeet Habakuk. Op die wysie van 'n klaaglied.

2Here, ek het gehoor wat van U vertel is

en ek is vervul met ontsag vir wat U gedoen het.

Doen dit tog ook in ons tyd,

laat u dade ook in ons tyd ervaar word,

ontferm U selfs in u toorn.

3God kom van Teman af,

die Heilige kom van Paranberg af. Sela

Die hemelruim is vol van sy majesteit,

die aarde vol van sy roem.

4Hy kom met die glans van die lig,

weerligte blits uit sy hand,

sy hand so vol mag.

5Voor Hom uit gaan die pes,

in sy voetstappe volg die dood.

6Wanneer Hy staan, skud die aarde;

wanneer Hy kyk, bewe die nasies.

Die eeue-oue berge verkrummel,

die ou-ou heuwels val inmekaar,

die berge waaroor Hy van ouds af gewandel het!

7Ek het gesien hoe onheil die tente van Kusan tref,

hoe die tentdoeke van Midian bewe.

8Was U kwaad vir die riviere, Here?

Het u toorn teen die strome ontvlam?

Het die see U woedend gemaak

dat U op u perde gery het,

op die strydwaens waarmee U oorwin?

9U het u boog uitgehaal

en met 'n eed die opdrag aan die pyle bevestig. Sela

U het die aarde oopgebreek en riviere laat stroom.

10Toe die berge U sien, het hulle gebewe,

stormwaters het verbygespoel,

die diep water het gedreun

en sy golwe hoog laat opslaan.

11Toe u vlieënde pyle blits

en u blink spies flikker,

het die son en die maan gaan stilstaan op hulle plek.

12In u gramskap stap U oor die aarde,

in u toorn vertrap U die nasies.

13U het uitgegaan om u volk te red,

om u gesalfde koning te red.

U verpletter die aanvoerder van die goddeloses,

U stroop hulle kaal van kop tot tone. Sela

14Met sy eie pyle deurboor U die aanvoerder

wanneer sy manskappe uitstorm om ons te verstrooi

terwyl hulle jubel soos dié wat die

ellendiges in hulle skuilplekke verslind.

15U trek deur die see met u perde

sodat die magtige waters bruis.

16Toe ek hierdie dinge hoor, het ek gesidder,

my lippe het gebewe,

my hele liggaam het lam geword,

my bene het aan die ruk gegaan.

Tog sal ek geduldig wag

dat die dag van die oordeel

moet kom oor die volk deur wie ons aangeval is.

17Al sou die vyeboom nie bot nie

en daar geen druiwe aan die wingerde wees nie,

al sou die olyfoes misluk

en die lande geen oes lewer nie,

al sou daar geen kleinvee in die kampe meer wees nie

en die beeskrale sonder beeste wees,

18nogtans sal ek in die Here jubel,

sal ek juig in God, my Redder.

19Die Here my God gee vir my krag.

Hy maak my voete soos dié van 'n ribbok,

op hoë plekke laat Hy my veilig loop.

Vir die koorleier. Met snarespel.

HABAKUK 3AFR83Maak oop in die Bybelleser

Die eerste twee hoofstukke van die boek bestaan uit ʼn tweegesprek tussen Habakuk en God. Die profeet kla dat die wet nie meer krag het nie en dat reg nie meer in Israel geskied nie. Slegte mense het die oorhand oor die goeies, en so word die reg verkrag. Die Here antwoord: Habakuk moet geduldig wees. Al duur dit lank, die regstelling kom vir seker. Niemand kan so ongebreideld optree en dink daar sal geen gevolge wees nie.

Hoofstuk 3 is ʼn gebed van die profeet. Dit is ʼn klaaglied, maar ʼn dreigende klaaglied. Dit verwys na God se ontsagwekkende grootheid – Hy kom van Paranberg af, weerlig blits uit sy hand, die pes gaan voor Hom uit en in sy voetstappe volg die dood. Hy kom om sy volk te red, maar selfs dié wat gered word, slaan met beklemming en heilige ontsag God se ingrype gade.

God se sweep van buite kom seker, profeteer Habakuk. Die Galdeërs gaan niemand en niks ontsien nie. Hul manier was om boorde en landerye aan die brand te steek en te verniel. Vee is gebuit. Mense is weggevoer na vreemde lande. Maar dit alles het ’n hoër doel. Al sou die vyeboom nie bot nie en die wingerd nie dra nie en die olyfoes misluk en daar geen vee wees nie, nogtans sal hy jubel in die Here en juig in God, sy Redder. Want God se ingrype spel redding vir die Godvresende, en die herstel van reg en geregtigheid.

Die lied getuig van doelbewuste geloof:

Téén die verval;
 téén die plundering;
 téén natuurrampe;
 téén persoonlike benoudheid en angs;
 sal ek
 kies om in God te jubel en juig;
 kies om op God te vertrou vir krag;
 kies om die toekoms aan God toe te vertrou;
 want Hy hou my veilig in alle gevaar.

So getuig ons ook in aansluiting by Habakuk: Al moet ons deur swaar tye gaan, sal ons jubel en juig in die Here, want Hy verdra nie onreg nie en Hy kom om te red en die reg te herstel. Op daardie redding wag ons geduldig.

Bible Society of South Africav.4.25.3
VOLG ONS