Bible Society of South Africa
Leesplanne
Dagboek 2021
Dagboek 2021 – 2 Mei

Dagboek 2021 – 2 Mei

As God vir ons wegkruip

Bybelteks(te)

PSALMS 44

Kom ons tog te hulp

1Vir die koorleier. Van die Koragiete. 'n Gedig.

2Met ons eie ore het ons gehoor, o God,

ons vaders het ons dit vertel,

dat U in die ou dae,

in die gryse verlede, 'n groot daad gedoen het.

3U het nasies met u eie hand verdryf,

maar u volk 'n vaste woonplek gegee.

U het nasies se mag verbreek

om aan u volk vryheid te gee.

4Dit is nie met die swaard

dat u volk die land in besit geneem het nie,

nie deur hulle eie mag

dat hulle die oorwinning behaal het nie,

maar deur u krag, u mag en u teenwoordigheid,

omdat U hulle liefgehad het.

5U is my koning, o God;

gee tog aan Jakob se nageslag die oorwinning.

6Met u hulp sal ons ons teëstanders verslaan,

in u Naam sal ons dié oorwin wat teen ons opstaan.

7Op my boog vertrou ek nie

en my swaard sal my die oorwinning nie gee nie,

8want dit is U wat ons die oorwinning oor ons teëstanders gegee het

en ons vyande die aftog laat blaas het.

9Ons het God die hele dag deur geprys

en sy Naam altyddeur geloof. Sela

10Tog het U ons nou verstoot en ons in die skande laat kom.

U trek nie meer saam met ons leërs uit nie.

11U laat ons vlug voor ons teëstanders;

ons vyande plunder na hartelus;

12U lewer ons uit: ons is soos slagskape.

U verstrooi ons onder die nasies;

13U gee u volk sommerso weg, vir niks;

daar steek geen voordeel vir U in nie.

14U stel ons bloot aan die veragting van ons bure,

aan die spot en beskimping van almal rondom ons.

15U maak ons tot 'n bespotting onder die nasies,

'n minagting onder die mense.

16Ek gaan dag vir dag gebuk onder die skande,

en die smaad is op my gesig te lees,

17want ek hoor net die spottaal van die vyand

en die godslastering van dié wat op wraak uit is.

18Al hierdie dinge het oor ons gekom,

hoewel ons U nie vergeet het nie

en aan u verbond nie ontrou was nie.

19Ons het nie afvallig geword nie

en van u pad nie afgewyk nie.

20Tog het U ons verwoes;

ons land het 'n puinhoop geword;

U het die donker oor ons laat toesak.

21As ons die Naam van ons God nie aangeroep het nie

en 'n vreemde god om hulp gevra het,

22sou God dit dan nie kon vasstel nie?

Hy ken immers die geheime van die hart.

23Dit is oor U dat die dood ons gedurig tref,

dat ons soos slagskape behandel word.

24Kom ons te hulp! Waarom slaap U, Here?

Word tog wakker! Moet ons nie vir altyd verstoot nie!

25Waarom draai U u rug vir ons?

Waarom steur U U nie aan ons ellende en smaad nie?

26Ons is tot in die stof verneder,

ons is teen die grond.

27Kom ons tog te hulp

en bevry ons, dat so u troue liefde blyk.

PSALMS 44AFR83Maak oop in die Bybelleser

Verlede Sondag in die kerklike jaar was biddag vir die gesaaides en dankdag vir die oes. ’n Biddag vir die wintergewasse wat geplant word en ’n dankdag vir die somergewasse wat geoes word. Dit is ’n belangrike dag, want dit nooi ons uit om te reflekteer oor die voorsienigheid van God.

In Psalm 44 ontmoet ons iemand wat verslae staan, want dit lyk of God hom finaal in die steek gelaat het. Hy is verslae, want hy ken die geskiedenis van die volk en hoe God in die verlede vir Israel gehelp en voorsien het (verse 2-4). Verder weet hy ook dat die volk nie van die Here afgedwaal het nie (verse 18-22). Enige persoon wat al ooit die waagspel gespeel het deur ’n saadjie in die grond te druk, weet: Soms bly die reën weg of die ryp kom te vroeg. Daar is nie verduidelikings nie, dis maar net deel van boer. Maar hoe maak ons sin van hierdie gebeure? Hoe maak ons as dit lyk of God sy gesig vir ons wegdraai?

Ons maak soos die Psalmdigter. Ons roep tot die Here! Kom ons te hulp! Waarom slaap U, Here? Word tog wakker! (vers 24). Dit klink vir ons amper Godslasterlik om so direk met God te praat. Maar dit is een van die kenmerke van die Klaagpsalms. Dit draai nie doekies om nie. Dit weergalm met dieselfde angs waarmee Christus geroep het aan die kruis: My God, my God, waarom het U My verlaat?

Ons hoef nie ons woede en wanhoop vir die Here weg te steek nie. Die stompheid van die Psalmdigter is nie bedoel as ’n belediging nie, maar juis as ’n teken van die intimiteit van die verhouding tussen hom en God. Daarom hoef ons nie bang te wees dat ons rou emosies God gaan verdryf nie. Ten spyte van die Psalmdigter se protes, is hy nie van plan om sy geloof op te sê nie. As dit voel of God sy gesig van jou wegdraai, bring dan juis jou klaagliedere na die Here as ’n geloofsbelydenis.

Ds Willem Dreyer, Delareyville

Bible Society of South Africav.4.26.9
VOLG ONS