Dagboek 2021 – 22 Maart

Die gedeelte begin met verwysing na die vyeboom waaraan geen vrugte was nie aangesien dit nie vyetyd was nie, en sluit ook af met verwysing na die vyeboom wat die volgende oggend verdroog het van sy wortels af. Markus is geneig om soos hier ’n raam om sy gedagtegang te plaas, waar die gebeure met die vyeboom iets vertel van wat tussenin beskryf word, naamlik die gebeure in die tempel. Daarom is dit belangrik vir die leser om in gedagte te hou dat die vyeboom slegs soos ’n gelykenis hanteer word, want die behandeling van die vyeboom, hoe onbillik dit ook al mag klink, word ingespan om oor die tempel ’n mening uit te spreek.

Die slotsom is dus besonder reguit en op die man af. Jesus is eintlik nie besig om die tempel te reinig soos die opskrif van die gedeelte lui nie. Hy vee die totale tempelgebeure en alles wat daarmee saamhang met een veeg spreekwoordelik van die tafel af. Jesus verwys na die profeet Jeremia (7: 11) se uitspraak wat gewaarsku het dat dit die Here se tempel is en dat die tempel sodanig hanteer moet word. Die noem van die Naam van die Here waarborg en voorkom nie dat, soos Jeremia dit stel, die tempel verword tot ’n rowerspelonk nie. In die eerste twee dae van Jesus se laaste week tree Jesus radikaal op, maar elke keer in die lig van ’n profetiese verwysing uit die verlede. Daardeur word aangedui dat Jesus se optrede nie dié van ’n revolusionêr is nie, maar volgens die Skrifte, soos dikwels vermeld word.

So radikaal as wat die verdroging van die vyeboom was, net so radikaal is Jesus se oordeel oor die tempeldiens wat in dié tyd hoogty gevier het. Hy doen dit deur lyding, deur die dood, sy dood as antwoord van God op die geweld van die wêreld, tekenend van die ja vir God vir elkeen wat in Hom glo. Die verdroogde vyeboom sê dit: Glo in God, in Jesus Christus die herboude tempel na drie dae (vgl Joh 2: 19).

Dr Barry van Wyk, Emeritus/Waterberg/Zoutpansberg