Bible Society of South Africa
Leesplanne
Dagboek 2021
Dagboek 2021 – 24 November

Dagboek 2021 – 24 November

Hy kom weer! Glo jy dit?

Bybelteks(te)

JOHANNES 14

Jesus gaan na sy Vader toe

1“Julle moet nie ontsteld wees nie. Glo in God; glo ook in My. 2In die huis van my Vader is daar baie woonplek. As dit nie so was nie, sou Ek nie vir julle gesê het Ek gaan om vir julle plek gereed te maak nie. 3En as Ek gegaan het en vir julle plek gereed gemaak het, kom Ek terug en sal julle na My toe neem, sodat julle ook kan wees waar Ek is. 4En julle ken die weg na die plek waarheen Ek gaan.”

5Tomas sê toe vir Hom: “Here, ons weet nie waarheen U gaan nie; hoe kan ons dan die weg daarheen ken?”

6Jesus het vir hom gesê: “Ek is die weg en die waarheid en die lewe. Niemand kom na die Vader toe behalwe deur My nie. 7As julle My ken, sal julle my Vader ook ken. En van nou af ken julle Hom en sien julle Hom.”

8Toe sê Filippus vir Hom: “Here, wys vir ons die Vader, en dit is vir ons genoeg.”

9En Jesus sê vir hom: “Ek is al so lank by julle, en ken jy My nie, Filippus? Wie My sien, sien die Vader. Hoe kan jy dan sê: ‘Wys vir ons die Vader’? 10Glo jy nie dat Ek in die Vader is en die Vader in My nie? Die woorde wat Ek met julle praat, praat Ek nie uit my eie nie; maar dit kom van die Vader wat in My bly en sy werke doen. 11Glo in My omdat Ek in die Vader is en die Vader in My; of anders, glo op grond van die werke self.

12“Dít verseker Ek julle: Wie in My glo, sal ook die dinge doen wat Ek doen; en hy sal nog groter dinge as dit doen, omdat Ek na die Vader toe gaan. 13Wat julle ook al in my Naam vra, sal Ek doen, sodat die Vader deur die Seun verheerlik kan word. 14As julle My iets in my Naam vra, sal Ek dit doen.”

JOHANNES 14:1-14AFR83Maak oop in die Bybelleser

Jesus begin hierdie gesprek oor sy weggaan met dié woorde: Julle moet nie ontsteld wees nie. Dit was eintlik die emosie wat die dissipels elke keer ervaar het wanneer Jesus oor sy weggaan gepraat het. Dit is een van die emosies wat ons ervaar wanneer ons weet ons gaan iets verloor. Sy volgende woorde is woorde wat hulle dadelik gerus moet stel. Trooswoorde: Ek kom terug om julle te kom haal! Sy weggaan is net tydelik. Vir ’n kort rukkie sal hulle hierdie seer en verlies ervaar, maar daarna sal hulle saam met Hom wees in sy Vader se huis waar daar woonplek is vir baie. Hy gaan om die plek gereed te maak.

Hierdie besef van dit wat in die toekoms gaan gebeur, kan emosies ligter maak. Die verwagting van Christus se wederkoms moes hul ontsteltenis en gevoel van verlies verlig. Die toekoms gaan soveel beter wees. ’n Toekoms waar die teenwoordigheid van God baie meer direk ervaar sal word. Jesus sê dat Hy hierdie pad na God toe moontlik maak. Hy is die weg, die waarheid en die lewe. Deur sy kruisiging het Hy dit vir ons ’n moontlikheid gemaak.

Vir sy dissipels was hierdie tussentyd ondenkbaar. Daarom bied Hy die versekering van sy wederkoms. Asof Hy wou sê: Hou daaraan vas, dan sal hierdie tussentyd met alles wat kan gebeur, leefbaar wees.

Hul verdere vrae is vrae waardeur hulle probeer om vastigheid en sin te kry. Wanneer die mat onder ons uitgeruk word, soek ons iets om aan vas te gryp. Jesus se antwoord gaan oor wie Hy is en sy verhouding met sy Vader. Dalk sal dit vir ons genoeg wees om hierdie perspektief te behou wanneer ons deur moeilike tye gaan. Hierdie ervaringe is deel van ’n tussentyd. Christus het ons verhouding met God herstel. Leef in hierdie verhouding. Onthou dat Christus se weggaan beteken dat Hy vir jou plek gereed gaan maak. En sy belofte is dat Hy weer gaan kom om jou na Hom te neem.

Glo jy dit?

Ds Manda le Roux, Weskus

Bible Society of South Africav.4.26.9
VOLG ONS