Dagboek 2021 – 26 Mei

Die maagd sal swanger word en aan ’n Seun geboorte gee, en hulle sal Hom Immanuel noem, wat beteken: God is met ons.

Ons lees hierdie verhaal in die Evangelies, maar ons kan dit nie maklik verstaan nie: God, wat ewig en oral is, kom woon in die liggaam van ’n mens wat maar vir rondom 30 jaar lank op die aarde geleef het, en wat net op een plek op ’n keer kon wees. Maar hierdie onverstaanbare wonder is waaroor die Woord van die Here gaan: Die Woord vertel dat God self ’n mens geword het en by ons op die aarde kom woon het in ’n liggaam. ’n Liggaam wat soos ons liggame moeg geword het, koud gekry het, seergekry het, aan versoeking onderworpe was en die aardse dood tegemoet moes gaan. Hy het dit gedoen, sodat Hy kon sê: Ek weet, mensekind, wat dit beteken om swaar te kry soos julle; Ek weet wat dit is om seer te kry, om verwerp te word, om selfs hartseer en kwaad te word.

In ander woorde beskryf Johannes 1:1 en 14 God se koms na die wêreld: In die begin was die Woord daar, en die Woord was by God, en die Woord was self God. … Maar hierdie Woord het mens geword en onder ons kom woon, en ons het sy heerlikheid aanskou, ’n heerlikheid soos dié van die enigste Seun van die Vader, vol genade en waarheid.

Toe Jesus, die Woord, op aarde geleef het, het Hy met mense gepraat met ’n lewende stem, Hy het mense in die oë gekyk, aan hulle geraak, hulle geleer, en hulle genees. En hulle selfs uit die dood opgewek. So wil God mense, ook vir ons, aanraak, troos, gesond maak en red van sonde en dood. Al kan ons nie verstaan nie, ons kan hoor en glo: God het naby gekom, mens geword, Hy het by ons kom woon en werk.

Ds Milankie van der Walt, Namib-Suid