Dagboek 2021 – 26 Oktober

Gesondheid is ’n belangrike faset van ons lewens. Ons elkeen hoop en bid vir ’n gesonde lewe. Niemand wil graag ongesond wees nie. Ons doen daarom moeite met ons leefstyl. Ons raadpleeg dieetkundiges om te leer wat ons mag eet en hoeveel om te eet. Ons sien persoonlike instrukteurs wat ons help met verpersoonlikte oefenprogramme sodat ons die regte oefeninge en die regte hoeveelheid oefening kan doen. Ons neem vitamienaanvullings en besoek ons dokters gereeld. Verskeie huishoudings besit ’n bloeddrukmeter en ’n suikertoetser. Ons vrees siektes en virusse soos ebola, voëlgriep, varkgriep en Covid-19 wat die mensdom bedreig. Maar ons vergeet dikwels om ons gesondheid aan die Here toe te vertrou.

Ons leer in Psalm 23 om ons hele lewe, daarom ook ons gesondheid, aan die Here toe te vertrou. Psalm 23 fokus op die wisseling van voorspoed en teëspoed: Eerstens word verwys na tye wanneer dit goed gaan. Dan is dit maklik om die Here se sorg te erken. Dan weer kom daar tye wanneer dit sleg gaan, soos tye van siekte en doodsgevare. In hierdie tye is dit dalk moeiliker om die Here se sorg raak te sien. Gelukkig kom daar weer tye om oor dankbaar te wees en oor die uitkoms fees te vier! Die Here is ons Herder in voorspoed en in teëspoed, in oorvloed en gevaar, in siekte en gesondwees.

Ek mag die Here vertrou met my gesondheid. Die Skepper van hemel en aarde is ook die Skepper van my liggaam, daarom kan ek die Here volkome vertrou met my gesondheid en my hele lewe, wat ook al gebeur. Selfs wanneer ons ernstig siek is en mag sterf, vrees ons nooit dat God ons verlaat nie. Vertrou vandag weer die Here met jou gesondheid en met jou lewe.

Gebed

Hemelse Vader, dankie dat ek U mag vertrou met my gesondheid. Seën my en my geliefdes asseblief met die gesondheid wat ons nodig het. Amen.

Ds Michael Müller, Klerksdorp-Wilkoppies