Dagboek 2021 – 27 April

Skynheiligheid is die een ding wat van die Christelike geloof ’n klug maak. Skynheiligheid is ’n woord wat ons dikwels hoor en dalk self gebruik. Wat sê hierdie woord? In kort beteken skynheiligheid dat ’n mens mooi goed sê, maar minder mooi goed doen. Dit beteken ook dat jy bepaalde dinge van ander mense verwag, terwyl jy dit self nie doen nie.

In die ou dae het die mense padtekens “predikante” genoem, want hulle het geredeneer dat daardie padtekens nou wel die regte pad aanwys, maar dat hulle nie self daardie pad “loop” nie. Hulle staan op een plek vasgeplant. Dit is waaroor Paulus dit in sy eerste Timoteus-brief het. Hy, as ouer man, waarsku Timoteus, ’n jong man, teen skynheiligheid.

Die raad wat hy vir Timoteus gee, is: Wees ’n voorbeeld! Lees “voor-beeld”. Wees self opreg, gaan self uit vóór die mense met wie jy te doen kry. Wys hulle die pad. Al is dit hoe moeilik, wys hulle hoe ’n mens se woorde en jou dade hand aan hand behoort te gaan, wys hulle wat Christelike liefde prakties beteken, wys hulle wat egte geloof van ’n mens vra, en wys hulle wat reinheid in lewenswandel in die praktyk beteken.

Want, sê Paulus, al hierdie dinge het jy verniet ontvang, en jy moet dit nie verwaarloos en ongebruik in jou lewe laat rondlê nie. Lééf wat jy praat, sodat mense selfs in jou jong lewe groei en vooruitgang kan sien. Soos wat ’n mens spierontwikkeling kan sien wanneer iemand liggaamsbou beoefen, so moet daar ook groei en ontwikkeling in geesbou wees.

Sedert ons nie meer besondere apostels het nie, is elke gelowige nou ’n wegwyser, alle gelowiges is nou getuies van Christus. En elke getuie moet waak teen skynheiligheid. Los die splinter in die oog van iemand anders en wees self werklik heilig, werklik toegewyd, en laat jou woorde en dade dieselfde taal praat. Altyd, oral. Anders maak ons van die Christelike geloof ’n klug, en dit mag tog nie.

Dr Christo van der Merwe, Emeritus