Bible Society of South Africa
Leesplanne
Dagboek 2021
Dagboek 2021 – 27 Desember

Dagboek 2021 – 27 Desember

Kersdag is verby – wat nou?

Bybelteks(te)

LUKAS 2

Simeon en Anna by die tempel

25Daar het destyds 'n man met die naam Simeon in Jerusalem gewoon. Hy was getrou aan die wet en vroom, en het uitgesien na die koms van die Verlosser van Israel. Die Heilige Gees was op Simeon 26en het aan hom bekend gemaak dat hy nie sou sterwe voordat hy die Gesalfde van die Here gesien het nie. 27Deur die Gees gelei, het hy opgegaan na die tempel toe. Toe die ouers die Kindjie Jesus bring om vir Hom die gebruiklike bepaling van die wet na te kom, 28het Simeon Hom in sy arms geneem en God geprys en gesê:

29“Here, laat u dienaar nou

in vrede gaan volgens u woord,

30omdat my oë u verlossing gesien het

31wat U gereed gemaak het

voor die oë van al die volke:

32'n lig tot verligting van die nasies

en tot eer van u volk Israel.”

33Sy vader en moeder was verwonderd oor die dinge wat van Hom gesê is.

34Simeon het hulle geseën en vir Maria, sy moeder, gesê: “Kyk, hierdie Kindjie is bestem tot 'n val en 'n opstanding van baie in Israel en tot 'n teken wat weerspreek sal word. 35So sal die gesindheid van baie mense aan die lig kom. En wat jou betref, 'n swaard sal deur jou siel gaan.”

LUKAS 2:25-35AFR83Maak oop in die Bybelleser

In die Kerk het ons die gebruik om gedurende die tyd ná Kersfees ’n slag behoorlik na te dink oor hoe Jesus se verskyning op aarde ons raak. Ons praat van Epifanie, wat sigbaar word beteken. God het sigbaar deur sy Seun in ons stukkende en siek wêreld ingetree om ons te verlos. Dít behoort ons ten diepste te raak.

Ons het gelees hoe die koms van Jesus Christus die ou Simeon, ’n gelowige man van Jerusalem, eeue gelede aangeraak het. Jesus se ouers het hul Kindjie na die tempel in Jerusalem geneem om dit wat die wet voorgeskryf het, na te kom. Daar ontmoet Simeon hulle, en hy sê iets merkwaardig.

Nadat hy God geprys het, sê hy dat hy nou gereed is om te sterf, want hy het nou vrede in sy hart. Hy het, soos baie ander gelowiges van sy tyd, verwag dat God die Verlosser sou stuur, en nou het dit gebeur. Deur sy Gees het God Simeon verseker dat die Kindjie die Een is wat moes kom om die mensdom se sondeskuld weg te neem. Simeon glo dit so onwrikbaar dat dit hom vrede laat beleef, want hy glo dat ook sy saak met God nou reg is.

Wanneer ons God die kans gee om deur sy Woord en sy Gees in ons te werk, sal ons ook iets van hierdie vrede kan beleef. Dit is nie ’n vrede omdat alles op aarde skielik net reg geword het nie. Dit is in elk geval nie moontlik nie. Maar die vrede wat ou Simeon beleef het en wat ons ook kan beleef, is ’n geskenk van God. Dit laat ons rustig wees en vrede ervaar ten spyte van alles, goed en sleg, wat om ons en met ons gebeur. Dit is die vrede wat oor ons kom omdat ons vas glo dat Jesus Christus ook ons saak met God reggemaak het.

Die Kersgebeure verseker ons dat God se belofte van Verlossing waar geword het.

Ds Pieter Smith, Emeritus

Bible Society of South Africav.4.26.9
VOLG ONS