Bible Society of South Africa
Leesplanne
Dagboek 2021
Dagboek 2021 – 28 Desember

Dagboek 2021 – 28 Desember

Kersdag is verby – wat nou?

Bybelteks(te)

LUKAS 2

Die Kind Jesus by die tempel

41Jesus se ouers het elke jaar vir die paasfees Jerusalem toe gegaan. 42Toe Hy twaalf jaar oud was, het hulle weer soos gebruiklik daarheen gegaan vir die fees. 43En toe die feesdae verby was, het sy ouers die terugreis begin, maar die Kind Jesus het in Jerusalem gebly sonder dat hulle dit geweet het. 44Omdat hulle gedink het Hy is by die reisgeselskap, het hulle 'n dag lank gereis voordat hulle Hom onder die familie en bekendes begin soek het. 45Toe hulle Hom nie kry nie, het hulle omgedraai na Jerusalem toe op soek na Hom. 46Na drie dae het hulle Hom by die tempel gekry waar Hy tussen die geleerdes sit en na hulle luister en hulle uitvra. 47Almal wat Hom gehoor het, was verbaas oor sy insig en sy antwoorde. 48Toe sy ouers Hom sien, was hulle verslae, en sy moeder sê vir Hom: “Kind, waarom het jy so met ons gemaak? Kyk, jou vader en ek het met angs na jou gesoek.”

49Maar Hy antwoord hulle: “Waarom het u na My gesoek? Het u nie geweet dat Ek in die huis van my Vader moet wees nie?”

50Hulle het nie begryp wat Hy daarmee bedoel het nie.

51Hy het toe saam met hulle na Nasaret toe teruggegaan, en Hy was aan hulle onderdanig. Sy moeder het al hierdie dinge in haar hart bewaar.

52En Jesus het verstandelik en liggaamlik gegroei en in guns by God en die mense toegeneem.

LUKAS 2:41-52AFR83Maak oop in die Bybelleser

Ons weet bitter min van Jesus se kinderdae op aarde. Dit is asof die Evangelieskrywers hulle haas om by die hoofsaak van Jesus se koms na die aarde, sy lering en uiteindelik sy kruisdood en opstanding, uit te kom. Maar ons kan seker aanvaar dat Jesus as ’n tipiese Joodse seuntjie opgevoed is, saam met sy maats gespeel het en by sy ouers grootgeword het.

In hierdie gedeelte word een van die enkele insidente uit sy jeugjare vir ons deur Lukas weergegee, juis om iets daarmee te getuig. Jesus het in dié stadium, volgens Joodse gebruik, op die drumpel van volwassenheid gestaan, maar vir sy ouers was Hy maar steeds hul seuntjie. Hulle het geweet dat Hy vir groter dinge bestem was, maar dit was seker moeilik om toe te laat dat dit gebeur. Jesus was egter baie bewus van wat Hy op aarde kom doen het. Sy optrede daar by die tempel wys baie duidelik dat Hy sy Hemelvader se wens kom uitvoer het.

Dit bring ons by die vraag waarmee ons ons so ná Kersfees moet konfronteer: Is ons bereid om Jesus in ons gedagtes te laat “grootword”? Dit is tog so maklik om ons aan die Kersfeesbaba te verwonder sonder dat ons Hom wil toelaat om ons te verander.

Dit is eers as ons die Kindjie ook later hoor as Hy mense begin leer, Hom aan die kruis sien en die oop graf sien dat ons regtig aangeraak word en begin verander. Dit is asof Lukas vir ons wil sê dat dit goed en wel is om die Kersgebeure te geniet, maar ons moet Jesus ook toelaat om groot te word, om sy ware werk in ons te doen en ons in nuwe mense te omskep.

In kort beteken dit dat ons nie Kersfees-gelowiges mag wees nie, maar eerder mense wat aangegryp en verander is deur God se liefde soos Hy dit in Jesus Christus geopenbaar het.

Ds Pieter Smith, Emeritus

Bible Society of South Africav.4.26.9
VOLG ONS