Bible Society of South Africa
Leesplanne
Dagboek 2021
Dagboek 2021 – 30 Oktober

Dagboek 2021 – 30 Oktober

Ek is ’n Koningskind

Bybelteks(te)

GALASIËRS 3

23Voordat hierdie geloof gekom het, is ons deur die wet gevange gehou en bewaak totdat die tyd van die geloof sou aanbreek. 24Ons was dus onder die toesig van die wet totdat Christus sou kom, sodat ons deur te glo, vrygespreek sou word. 25Maar nou dat die tyd van die geloof gekom het, staan ons nie meer onder die toesig van die wet nie.

26Deur hierdie geloof in Christus Jesus is julle nou almal kinders van God, 27want julle almal wat deur die doop met Christus verenig is, het nou deel van Christus geword. 28Dit maak nie saak of iemand Jood of Griek, slaaf of vry, man of vrou is nie: in Christus Jesus is julle almal één. 29En as julle aan Christus behoort, is julle ook nakomelinge van Abraham en erfgename kragtens die belofte van God.

GALASIËRS 3:23-29AFR83Maak oop in die Bybelleser

Deur geloof in Jesus Christus is ons met God versoen: Ons is kinders van God die Vader en diensbaar aan God. Christus het hierdie voorreg vir ons moontlik gemaak deur sy kruisdood en opstanding. Die Here het deur sy hemelvaart sy koningskap bevestig. Hy is die goeie Koning wat sy lewe afgelê het vir ons, sy kinders. Hy bewerk ons vryspraak. Hy is ook die Koning wat regeer tot in alle ewigheid.

Ons bely daarom dankbaar die Here as Koning en Verlosser. As kinders van God word ons vrygespreek van sondeskuld en die ewige dood as straf. Ons word volgens Galasiërs 3: 23 vrygestel van die wet, wat ons voorheen gevange sou hou.

Wie vrygespreek is, vrees nie meer straf nie en beskou ook nie swaarkry of verlies as straf nie. Wie oordeel verdien het en vrygespreek is, waardeer die vryheid en die prys daarvan, en leef elke dag dankbaar in diens van God en medemense.

Gebed

Here, dankie dat ek u kind mag wees. Mag ek in dankbaarheid bewus wees van u teenwoordigheid, heerskappy en soewereiniteit. Amen.

Ds Michael Müller, Klerksdorp-Wilkoppies

Bible Society of South Africav.4.26.9
VOLG ONS