Bible Society of South Africa
Leesplanne
Dagboek 2021
Dagboek 2021 – 31 Desember

Dagboek 2021 – 31 Desember

Oujaarsdag – hoe kyk ons terug?

Bybelteks(te)

LUKAS 12

Die sorge van die lewe

22Verder het Jesus vir sy dissipels gesê: “Daarom sê Ek vir julle: Moet julle nie bekommer oor julle lewe, oor wat julle moet eet nie, of oor julle liggaam, oor wat julle moet aantrek nie. 23Die lewe is tog belangriker as kos en die liggaam as klere. 24Kyk na die kraaie: hulle saai nie en oes nie; hulle het geen spens of skuur nie, maar God sorg vir hulle. Julle is tog baie meer werd as voëls. 25Trouens, wie van julle kan deur hom te bekommer sy lewe met een uur verleng? 26As julle nie eens so 'n klein dingetjie kan regkry nie, waarom bekommer julle julle oor die ander dinge?

27“Kyk hoe groei die lelies: hulle swoeg nie en hulle maak nie klere nie, maar Ek sê vir julle: Selfs Salomo in al sy prag was nie geklee soos een van hulle nie. 28As God die gras van die veld, wat vandag nog daar is en môre in die vuur gegooi word, só mooi maak, hoeveel te meer sal Hy julle versorg, julle kleingelowiges! 29Julle moet julle ook nie gedurig afvra wat julle gaan eet of drink nie, en julle moenie besorg wees nie. 30Dit is alles dinge waaroor die ongelowiges in die wêreld begaan is, maar julle het 'n Vader wat weet dat julle dit nodig het. 31Beywer julle vir sy koninkryk, dan sal Hy julle ook hierdie dinge gee.

32“Moenie bang wees nie, klein kuddetjie, want dit was die wil van julle Vader om die koninkryk aan julle te gee.

33“Verkoop julle besittings en gee bydraes vir die armes. Skaf vir julle 'n beurs aan wat nie leeg raak nie, 'n onuitputlike rykdom in die hemel, waar geen dief dit kan bykom en geen mot dit kan verniel nie. 34Waar julle skat is, daar sal julle hart ook wees.”

LUKAS 12:22-34AFR83Maak oop in die Bybelleser

Op Oujaarsdag wil ’n mens terugkyk na die afgelope jaar en jouself afvra of dit ’n goeie jaar was. Die bril waardeur jy na die afgelope jaar kyk, gaan bepaal hoe dit vir jou lyk. Jy kan daarna kyk deur die bril van aardse goed, soos jou bankbalans, jou gesondheid en jou geluk. Dan gaan dié dinge ook bepaal hoe goed of sleg die jaar vir jou lyk.

In die gedeelte wat ons gelees het, hoor ons egter hoe Jesus ’n ander bril vir ons wil gee waarmee ons na ons omstandighede kan kyk, naamlik die bril van die koninkryk van God. Jesus het juis na die aarde gekom om hierdie anderse koninkryk hier te kom vestig. Deur sy openbare optrede en deur sy lering wys Hy dat aardse dinge nie altyd die belangrikste hoef te wees nie. Deur sy kruisdood en opstanding verlos Hy ons om ook so anders te kan dink en doen.

Jesus sê sekerlik nie dat aardse dinge glad nie meer mag te tel nie, maar wat Hy wel sê, is dat daar belangriker sake is wat ons gesindheid behoort te bepaal. Jesus wil dus hê dat ons wat in Hom as Verlosser glo, ander prioriteite sal hê: Ons kan anders na ons omstandighede kyk.

Ons kan raaksien watter ontsaglike voorreg dit is om nou al deel van God se koninkryk op aarde te mag wees. Ons kan raaksien dat ons ook met ons optrede kan help om die koninkryk in diepte en getalle te laat groei. Met ons ingesteldheid, woorde en dade kan ons ons beywer vir God se koninkryk.

Met Kersfees nog vars in ons gedagtes, kan die afgelope jaar vir ons heeltemal anders begin lyk as ons deur die bril van God se koninkryk daarop terugkyk. En as ons deur dieselfde bril vorentoe kyk na die komende jaar, sien ons nuwe uitdagings om ons te beywer vir God se koninkryk.

Ds Pieter Smith, Emeritus

Bible Society of South Africav.4.26.9
VOLG ONS