Dagboek 2021 – 31 Maart

Hoe gebeur dit dat ’n vertroueling ’n verraaier word? Dikwels bied konflik ’n vrugbare bedding vir sameswering en verraad. Konflik vind plaas wanneer daar botsende belange op die spel is.

Hoewel die Evangelie nêrens verduidelik wat Judas gemotiveer het om sy leermeester te verraai nie, vertel Matteus hoe die konflik tussen Jesus en die leiers van die Joodse volk die grond vir Judas se verraad voorberei het. Hulle het ’n tyd en geleentheid gesoek om Hom gevange te neem en dood te maak, maar hulle wou dit stil-stil doen sodat dit nie ’n openbare oproer veroorsaak nie. Toe een uit Jesus se binnekring kom aanbied om Hom in hul hande oor te lewer, was dit die ideale geleentheid om ontslae te raak van die Persoon wat soveel konflik veroorsaak.

Tog is dit ironies hoe Matteus hul onsekerheid met Jesus se voorafkennis kontrasteer. Die Joodse leiers begin slinkse planne beraam, maar wil dit nog nie tydens die paasfees tot uitvoer bring nie. Wanneer Judas van die priesterhoofde af vertrek, is hy nog maar op die uitkyk vir ’n geleentheid om Jesus te verraai. En tog sê Jesus reg aan die begin van die hoofstuk die Seun van die mens sal tydens die paasfees oorgelewer word om gekruisig te word. Hy weet presies wat om te verwag.

Wat bring mense daartoe om God te verwerp? Dikwels is dit ’n konflik van belange – wat ek begeer, is in stryd met God se wil. Soms soek ek ’n verskoning om my eie kop te volg en my eie begeertes na te jaag ongeag die skade wat dit aan ander doen. Soms doen die geleentheid hom net voor dat ek myself kan verryk, al weet ek dat my optrede nie met God se wil versoen kan word nie. Maar God ken ons. Juis daarom moes die Seun van die mens gekruisig word.

In Gesang 510 sing ons van God se onbeskryflik groot genade vir ’n wegloopkind wat sy eie kop gevolg het – totdat God hom weer teruggebring het na die vaderhuis. Kom ons bid vir elke wegloopkind.

Dr Wouter van Wyk, Sinodaal