Bible Society of South Africa
Leesplanne
Dagboek 2021
Dagboek 2021 – 4 April

Dagboek 2021 – 4 April

Skok en ongeloof

Bybelteks(te)

MATTEUS 28

Jesus het opgestaan

1Na die sabbatdag, toe dit die Sondagmôre begin lig word, het Maria Magdalena en die ander Maria na die graf gaan kyk.

2Skielik was daar 'n geweldige aardbewing. 'n Engel van die Here het van die hemel af gekom, na die graf toe gegaan, die klip weggerol en daarop gaan sit. 3Sy voorkoms was so blink soos weerlig en sy klere so wit soos sneeu. 4Van skrik vir hom het die wagte gebewe en soos dooies geword.

5Toe sê die engel vir die vroue: “Julle moet nie bang wees nie. Ek weet julle soek Jesus wat gekruisig is. 6Hy is nie hier nie, want Hy is uit die dood opgewek, soos Hy gesê het. Kom nader en kyk: daar is die plek waar Hy gelê het. 7Gaan gou en sê vir sy dissipels: ‘Hy is uit die dood opgewek, en Hy gaan julle vooruit na Galilea toe. Daar sal julle Hom sien.’ Dit is wat ek vir julle moes sê.”

8Hulle het toe haastig van die graf af weggegaan, bang maar baie bly, en hulle het gehardloop om dit aan die dissipels te vertel.

9Skielik het Jesus daar voor die vroue gestaan en hulle gegroet. Hulle het nader gekom, sy voete gegryp en Hom aanbid. 10Toe sê Jesus vir hulle: “Moenie bang wees nie. Gaan sê vir my broers hulle moet na Galilea toe gaan, en daar sal hulle My sien.”

Die berig van die wagte

11Terwyl die vroue op pad was, kom party van die wagte in die stad aan en vertel vir die priesterhoofde alles wat gebeur het. 12Die priesterhoofde het saam met die familiehoofde vergader en die volgende plan gemaak. Hulle het vir die soldate 'n groot som geld gegee 13en gesê: “Julle moet sê: ‘Sy dissipels het in die nag gekom en sy liggaam gesteel terwyl ons geslaap het.’ 14En as die goewerneur daarvan hoor, sal ons hom tevrede stel en sorg dat julle nie bekommerd hoef te wees nie.”

15Die wagte het toe die geld gevat en gemaak soos hulle voorgesê is.

Hierdie storie word tot vandag toe onder die Jode vertel.

MATTEUS 28:1-15AFR83Maak oop in die Bybelleser

Hoekom gaan ’n mens na die graf van ’n geliefde toe? Eintlik maar om te treur. Jy verwag nie om jou geliefde weer te sien nie. Ook nie die vroue wat die Sondagmôre na Jesus se graf toe gaan nie. Hulle het ook nie ’n oop, leë graf verwag nie. Daarom verstaan ’n mens hul skok wanneer iemand skielik vir hulle sê: Ek weet julle soek Jesus wat gekruisig is. Hy is nie hier nie, want Hy is uit die dood opgewek, soos Hy gesê het.

Matteus vertel hoe hulle toe haastig van die graf af weggaan: bang maar baie bly. Jy sien hulle in jou geestesoog hardloop, vassteek, omkyk, vir mekaar kyk, weer hardloop. Dan staan die Here self skielik voor hulle. Jy kan jou net indink hoe hulle van skok versteen. Maar Jesus stel hulle gerus: Moenie bang wees nie. Gaan sê vir my broers hulle moet na Galilea toe gaan, en daar sal hulle My sien.

Aan die ander kant die ongeloof. Die wagte het hulle behoorlik wit geskrik. Maar daar móét ’n ander verklaring wees. Die Joodse priesterhoofde en familiehoofde betaal daarom die wagte om te vertel dat hulle in die nag aan die slaap geraak het, en toe het Jesus se dissipels gekom en sy liggaam gesteel.

Tot vandag toe word hierdie twee verhale oor Jesus se opstanding vertel: die skokkende verhaal wat getuig van die verrassende ontmoeting met die lewende Here, en die verhaal van ongeloof wat hierdie getuienis met fopnuus wil verdoesel. Fopnuus ontstel mense; die goeie nuus dat Jesus lewe, gee mense nuwe hoop. In ’n wêreld vol fopnuus het ons goeie nuus om te deel:

Ons juig weer oor ’n leë graf, ’n steen wat weggerol is,
 u heerlikheid, triomf en krag waarvan die aarde vol is!
 O seën hierdie Paasfeestyd.
 Die engele het daar verskyn; vertel van al u werke.
 Die vroue haas hul van die tuin, hul vreugde ken geen perke.
 Die Heer het waarlik opgestaan en Hy het ons vooruit gegaan.
 Loof Hom, die Heer, die Sterke!
 (Gesang 404)

Dr Wouter van Wyk, Sinodaal

Bible Society of South Africav.4.26.9
VOLG ONS