Bible Society of South Africa
Leesplanne
Dagboek 2021
Dagboek 2021 – 4 Mei

Dagboek 2021 – 4 Mei

Krisisgebore visie

Bybelteks(te)

PSALMS 46

God is vir ons 'n toevlug

1Vir die koorleier. Van die Koragiete. Op die wysie van “Jong Vroue”. 'n Lied.

2God is vir ons 'n toevlug en 'n beskerming;

Hy was nog altyd bereid om te help in nood.

3Daarom is ons nie bang nie,

al gee die aarde pad,

al skuif die berge tot in die dieptes van die see,

4al druis en skuim die waters van die see,

al skud die berge deur sy onstuimigheid. Sela

5Oor die strome van die rivier is daar blydskap in die Godstad,

in die heilige woning van die Allerhoogste.

6God is daar; die stad sal nie wankel nie.

God sal hom help nog voor die môre kom.

7Nasies kan raas en koninkryke wankel,

maar as God sy stem laat hoor,

smelt die aarde weg.

8Die Here, die Almagtige, is by ons,

die God van Jakob is vir ons 'n beskutting. Sela

9Kom kyk wat die Here gedoen het,

watter ontsettende dinge Hy op die aarde tot stand bring:

10die oorloë oor die hele aarde laat Hy ophou,

pyle en boë verbreek Hy, spiese slaan Hy stukkend,

oorlogswaens verbrand Hy met vuur.

11Bedaar en erken dat Ek God is,

hoog bo die nasies, hoog bo die aarde.

12Die Here, die Almagtige, is by ons,

die God van Jakob is vir ons 'n beskutting. Sela

PSALMS 46AFR83Maak oop in die Bybelleser

Baie geleerdes meen dat Psalm 46 ’n beskrywing is van die gebeure waarvan ons in Jesaja 34-37 lees. Plaas jouself in die skoene van ’n verdediger van Jerusalem. Die stad word beleer deur Sanherib se weermag en hulle beplan om met dagbreek die stad aan te val. Die situasie lyk wanhopig. Maar wonder bo wonder is die vyand se kamp die volgende oggend verlate. Tot vandag is die rede vir Sanherrib se skielike terugval onbekend. Maar vir die Psalmdigter is die saak duidelik. God het die stad gered. God is vir ons ’n toevlug en ’n beskerming; Hy was nog altyd bereid om te help in nood (vers 2).

Psalm 46 is geskryf te midde van onrus en ’n oorlog wat die bestaan van die volk Israel bedreig het, maar dit beskryf ’n beeld van vrede oor die hele aarde en die vernietiging van alle wapens (vers 10). Wat het hierdie visie geïnspireer? Nie die een of ander politikus of magtige oorlogsheld nie, maar God wat sal intree. Die mens is nie die enigste speler in die wêreldgeskiedenis nie. God bepaal die toekoms van die wêreld.

Die wonder van die evangelie is dat swaarde reeds in ploegskare gehamer word. Met die koms van die Here Jesus het God finaal ingegryp in die wêreld se geskiedenis. Sy vrederyk is aangekondig. Daarom kan ons ons gespartel stopsit. Ons kan bedaar en erken dat Ek God is (vers 11).

Ds Willem Dreyer, Delareyville

Bible Society of South Africav.4.27.6
VOLG ONS