Dagboek 2021 – 5 Desember
Vrede, vrede, nogmaals vrede!
Bybelteks(te)
LUKAS 1
Sagaria se loflied sou by baie van Lukas se hoorders aanklank kon vind, ook by ons. Ja, ons verwag ook die Verlosser, nes die volk van ouds. Wag dat Hy vrede sal bring in ’n wêreld wat dit so broodnodig het. In Adventtyd gaan dit om die Gees van God wat in die realiteit van die wêreld inbreek en die mens se hart kom verander. Dat God deur die Persoon van Jesus neerdaal en vrede bring in ’n tyd van onvrede en onmin.
Hierdie lied herinner die leser aan al God se beloftes in die verlede: ’n belofte aan Dawid dat iemand uit sy nageslag die Messias sal wees. Die beloftes aan die volk van redding uit die mag van die vyande. Die belofte van verlossing uit alle gevaar. En hierdie beloftes bied dan uiteindelik vir die leser die vryheid om God lief te hê en God in heiligheid te dien.
Dit wat Sagaria hier sing, verkondig dat hierdie beloftes van God in die geboortes van Johannes en Jesus sal aanbreek:
In Johannes deur in die lig van God se aangesig te wandel sodat die deur na sy teenwoordigheid al wyer sal oopgaan. In Jesus deur die redding en versoening wat sy uiteindelike kruisdood sou bring, en veral in sy hier-wees en naby-wees as Immanuel.
Dit is wat Johannes die Doper met sy bediening sou verkondig; dit is waaroor Sagaria gesing het. Vrede! Hierdie Jesus-kind wat op pad is, sal vrede bring vir alle mense. Johannes die Doper sou die weg voorberei sodat die mense ontvanklik sou wees wanneer die vrede op pad is. God het in Christus die vrede wat ontbreek het, herstel. Vrede tussen God en mens, vrede ook tussen mens en mens.
Leef in die vrede van Jesus! Al wag ons nog op sy koms, het ons reeds die vrede wat Hy gebring het. Ons leef daarin en moet dit met ander deel. Die vrede wat Christus bring, is immers vrede met God self.
Ds Quinten Schimper, Krugersdorp/Krugersdorp-Wes
