Bible Society of South Africa
Leesplanne
Dagboek 2021
Dagboek 2021 – 5 November

Dagboek 2021 – 5 November

Jesus regeer oor alles

Bybelteks(te)

EFESIËRS 1

Paulus se gebed

15Daarom, vandat ek gehoor het van julle geloof in die Here Jesus en van julle liefde vir al die gelowiges, 16hou ek ook nie op om God vir julle te dank nie. Wanneer ek in my gebede aan julle dink, 17bid ek dat die God van ons Here Jesus Christus, die Vader aan wie die heerlikheid behoort, deur sy Gees aan julle wysheid gee en Hom so aan julle openbaar dat julle Hom werklik kan ken. 18Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het, 19en hoe geweldig groot sy krag is wat Hy uitoefen in ons wat glo. Dit is dieselfde kragtige werking van sy mag 20wat Hy uitgeoefen het toe Hy Christus uit die dood opgewek en Hom in die hemel aan sy regterhand laat sit het: 21hoog bo elke mag en gesag, elke krag en heerskappy, en wat daar ook al sprake van mag wees, nie net in hierdie bedeling nie, maar ook in die bedeling wat kom. 22Ja, aan Hom het God alles onderwerp, Hom bo alles verhef en Hom aangestel as hoof van die kerk. 23Die kerk is sy liggaam, die volheid van Hom wat alles in almal vervul.

EFESIËRS 1:15-23AFR83Maak oop in die Bybelleser

Jesus Christus word verhoog en verheerlik. Aan die regterhand van God beklee Hy die heersersposisie. Hy ontvang van God alle mag in die hemel en op die aarde. Vanuit hierdie posisie tree Hy vir ons in.

Sy intrede beteken dat Hy ons bewaar teen alle vyande. Terwyl Hy ons plek berei en die erfenis wat Hy namens ons verkry het in bewaring hou, is Hy steeds by ons teenwoordig. Hy is op ’n nuwe manier by ons. Nie meer as een onder ons nie, maar op ’n kragtige wyse oral deur sy Gees. Dit is ons troos: Jesus Christus regeer oor alles en almal. Op ’n kragtige manier is Hy in die wêreld werksaam. Met dieselfde krag waarmee Hy uit die dood opgewek is, is Hy in gelowiges teenwoordig en werksaam.

Die gebeure in die wêreld en die ellendige toestand van die wêreld, laat mense wonder oor Jesus se regering. Baie mense het vrae oor waarom God bepaalde goed toelaat om te gebeur. Waarom is daar dan nog lyding en vervolging, honger en gevaar?

Die gelowige is daarvan oortuig dat God deur die opstandingkrag van Christus so in ons lewens en in die wêreld werksaam is, dat niks ons ooit van sy liefde kan skei nie. Ons beleef baie dade van uitredding, veilige bewaring, hulp in moeilike tye, genesing, oorwinning vir die waarheid, versoening … noem maar op. In die geloof herken ons God se reddende regterhand. Ons weet God regeer deur sy Seun tot ons heil. Hy regeer doelgerig en is met ons, sy kerk en die wêreld op pad na ’n volmaakte bestemming wat Hy vir ons voorberei.

Miskien moet ons minder probeer om self te regeer en Christus toelaat om deur sy Gees in ons lewens, in die kerk en in die wêreld te regeer. Ons sal dan beleef dat Christus deur sy oneindige mag die ganse heelal gebruik in belang van sy liggaam, die kerk waarvan Hy die hoof is.

Ds Willem Kok, Potchefstroom

Bible Society of South Africav.4.26.9
VOLG ONS