Dagboek 2021 – 6 Desember

God het aan sy verbondsvolk beloof om Iemand te stuur wat hulle sal verlos. ’n Bevryder – Een wat deur God self Gesalfde genoem sal word. Iemand wat nie net hierdie volk nie, maar die ganse mensdom sal verlos. En in Hom sal God self by sy volk wees. Daarom sal hierdie Bevryder, Redder en Gesalfde Immanuel genoem word. Die belofte van ’n Messias het die harte van die volk warm gemaak. Hulle het bly hoop en glo dat God Hom sal stuur. Maar hulle het gewonder wanneer Hy sou kom.

Toe God ’n volgende keer die belofte van die Bevryder bring, was dit aan ’n meisie. Maria. En hierdie meisie, hierdie weerlose dogter wat die belofte ontvang, kon nie glo dat God haar gekies het om die moeder van die Verlosser te wees nie. Hierdie Maria is waarlik ’n geseënde mens. Nie net oor die rol en status as die moeder van die Messias nie, maar ook oor haar vertroue in die belofte van God.

Martin Luther het gesê: God het klein geword vir ons in Christus. Hy het ons sy hart gewys sodat ons harte gewen kan word. Kersfees gaan nie oor ons nie.Dit gaan oor God! Ons enigste taak is om God groot te maak! Of om selfs soos Maria deursigtig te wees om te sien hoe groot God eintlik reeds is.

Toe haar Seun grootgeword het, het Hy vissermanne geroep. Hulle is nie geroep om in hul vissersbootjies te bly nie, maar om Hom te volg. Hulle het nie geweet waarheen nie, nie geweet wat op hulle wag nie, of hoe alles gaan uitdraai nie, maar hulle het gevolg! Hulle was op reis net soos die moeder van hul Here.

Dit is wat dit beteken om Hom te volg in die Adventtyd. Ons gaan, ons weet nie heeltemal waarheen nie, maar ons weet alles sal uitwerk solank ons naby bly aan die Een vir wie ons volg. Nou gaan dit oor God.

Ds Quinten Schimper, Krugersdorp/Krugersdorp-Wes