Die rol van bome in die Bybel – Dag 18

Psalm 45 het ʼn inleiding waar ons meer inligting oor die lied vind. Ons lees in vers 1 dat Psalm 45 ʼn lied van die liefde is. Dit is ʼn huwelikslied vir die koning. Die psalm vertel ons nie wie die koning is nie, maar sommige kommentare sê dit was heel moontlik koning Salomo. Lees ʼn mens egter die psalm deur, besef jy gou dat hierdie gedig na meer as ʼn aardse koning verwys en wel na die ewige koning — Koning Jesus.

Mirre-olie was baie belangrik in bybelse tye. Dit was ʼn duur olie wat van die mirreboom bekom is deur die bas te sny. Die gomagtige harpuis skei ʼn ligte geel vloeistof af wat gedroog word en dan rooibruin klonte so groot soos ʼn okkerneut vorm. Die olie word daarvan gedistilleer. In die tyd van Ester het toekomstige koninginne ʼn jaar se voorbereiding ondergaan voordat hulle gekroon is (Ester 2:12). Dit het ʼn behandeling van ses maande met mirre-olie ingesluit.

Die sterrekykers het vir Jesus mirre gebring toe hy gebore is (Matteus 2:11). Aan die kruis wou hulle vir Hom wyn gee met mirre (Markus 15:23-24). Sy doodskleed was doeke en sy liggaam is met geurolie, ʼn mengsel van mirre en aalwyn, behandel (Johannes 19:39-40).

As ons al hierdie dinge in ag neem, kry ons ʼn mooi prentjie van ons Koning Jesus, die bruidegom wat sy bruid kom haal. Sy klere is deurtrek met die geur van mirre, aalwyn en kaneel — simbole van sy menslike geboorte, sy dood en begrafnis wat noodsaaklik was voordat Hy die Satan kon oorwin. En ons, die Kerk, is die bruid van die Koning! Hy is die Vriend in wie ons veilig is en die ewige oorwinning behaal het. Sy troon sal tot in alle ewigheid bestaan. As die onderwerp van sy liefde, hoef ons nooit bang te wees nie. Wie kan so ʼn bruidegom weier?