Dra vrug – Dag 17

Woorde kan soos lawa uit jou mond vloei en vernietig, of dit kan soos koel fonteinwater lafenis bring. Woorde is seker een van die belangrikste maniere om te verrraai aan wie jy behoort, want “wat by die mond uitkom, kom uit die hart.” (Matteus 15:18) Spreuke 4:23 leer ook vir ons: “Wees veral versigtig met wat in jou hart omgaan, want dit bepaal jou hele lewe.”

Waarom word daar in die Bybel soveel klem geplaas op wat ons sê? Miskien lê die antwoord by die Outeur van die woorde: God. Toe Hy woorde gebruik het, het Hy geskep. Alles in die hemel, die see, en op aarde het vorm en lewe gekry. God se woorde voor die skepping van die eerste mense lê reeds hulle aard vas: “Laat Ons mense maak na ons beeld, na ons gelykenis …” (Genesis 1:26)

Is dit dan vreemd dat Hy ʼn skrywer inspireer om die volgende woorde neer te pen? “Dood en lewe is in die mag van die tong …” (Spreuke 18:21) Jy kan met dít wat jy sê, lewe of dood spreek. Verstaan mooi, woorde beskik nie oor magiese krag nie, maar het ʼn ongelooflike invloed op die mens se psige – dit besmet die hele liggaam: “Dit steek die hele lewe, van die geboorte tot die dood toe, aan die brand, en self word dit uit die hel aan die brand gesteek.” (Jakobus 3:6)

Is dit dalk waarom Paulus skryf dat ons gesprekke vriendelik moet wees en van goeie smaak moet getuig? Of dat ons die omstandighede van elke gesprek moet “lees” en net opbouende en goeie gesprekke moet voer? (Efesiërs 4:29). Kan dit wees dat bedrieglike en verkeerde gesprekke ons liefde vir die lewe kan steel en ons verhinder om ʼn goeie lewe te geniet? (1 Petrus 3:10).

Waarom hierdie klem op goeie gesprekke en goeie woorde? Ek en jy moet as beelddraers van God, sy koningskap in ons lewens sigbaar maak en ons woorde moet “… genade kan gee aan die wat dit hoor.” (Efesiërs 4:29) Ons is geskep as fonteine wat soet, drinkbare water moet voorsien aan ʼn wêreld wat dors is om waarheid en geregtigheid in aksie te sien.