Hy is altyd by jou – Dag 4
ʼn Ongemaklike bondgenootskap
Bybelteks(te)
JESAJA 7
JESAJA 8
Jesaja se seun as teken
JESAJA 8
2 KONINGS 16
In gister se Vers-ʼn-dag het ons van Jesaja se profesie oor die val van die bondgenootskap tussen Sirië en Israel gelees (Jesaja 7:7-9). Nou profeteer hy weer oor dieselfde geleentheid. Jesaja vat ʼn stuk leer en skryf daarop met ʼn pen: “Plunder en roof is naby” (Jesaja 8:1). Dit was ʼn openbare boodskap wat almal kon lees en verstaan. Jesaja het op daardie stadium nie geweet dat dit die naam sou wees van sy seun wat nog gebore moes word nie.
Plunder-en-Roof-is-Naby is die langste naam in die Bybel en die betekenis daarvan spreek vanself. Die seuntjie wat hierdie naam gekry het sou almal aan die boodskap van die Here herinner. Binne ʼn paar maande sou die Assiriërs Damaskus en Samaria binneval en op alles van waarde beslag lê.
Plaas jouself in koning Agas se skoene. Gister het ons gelees dat hy besluit het om eerder die koning van Assirië as vir God te vertrou. Hy het die goud en silwer in die paleis gevat en vir die Assiriese koning gegee om hom om te koop om sy vyande, Sirië en Israel, vir hom te verslaan (2 Konings 16:8). Die Koning van Assirië het aan sy versoek voldoen en ek kan my indink dat Agas heel tevrede met homself was. Agas kon egter nie die Assiriërs beheer nie en hulle geweld en verwoesting lei uiteindelik ook tot die vernietiging van Juda.
Maar hoekom het Jesaja die seuntjie se naam op ʼn stuk leer geskryf vir almal om te sien nog voor sy geboorte? Jesaja se profesie was ʼn bewys dat die Here in beheer is – nie Agas se strategieë of die militêre mag van die Assiriërs nie.
Was jy al in ʼn soortgelyke posisie as koning Agas? Was daar al ʼn geval waar jy jouself of iemand anders vertrou het en dit het goed uitgewerk? Miskien het jy toe gedink dinge het reg verloop danksy die invloed van iemand anders en nie danksy die krag van God nie.
Vandag, net soos in die tyd van Jesaja, word onbeheerbare omstandighede steeds deur God beheer. Moenie by God se vyande aansluit bloot omdat dinge in die toekoms kan verander nie. God bly in beheer in elke situasie en in alle omstandighede.
