Hoeveel gebede word deur jou beantwoord? 26 Augustus 2022

Hoeveel mense se gebede word deur jou beantwoord? Jy is hier vir ’n rede, nie om ’n suurstofvraat te wees en maar te probeer om die lewe te geniet nie. Want God is ’n God met ’n doel wat daarvoor ’n lewensplan met elkeen van ons het.

God werk deur mense en die doel waarvoor jy bestem is maak saak. Maar dit maak net sin as jy op jou bestemming se reisplan fokus en dit leer verstaan. God se lewensplan vir ons omvat en bou aan belangrike aspekte van my en jou en ander se lewens.

Jou bestemming gee ook rigting en betekenis aan jou lewe. Dit bied inhoud aan die verwagting. En tesame met jou gawes, talente en dit wat jy daarmee doen, word jou identiteit bepaal – dit waaraan jy jouself reg verstaan en waarvoor jy ook erken en waardeer word. Wanneer ons mekaar sodanig aanvul, skep dit stabiliteit en vervulling op ons gesamentlike lewenspad.

Daarom is jy betekenisvol en jou lewe word van betekenis namate jy jou doel vervul – dit waarvoor jy geskep is. En God se plan met jou raak nie net jouself nie – dis ook belangrik vir ander – en hulle s’n vir jou.

En op hierdie pad gebruik Hy omstandighede en ervarings in jou lewe om die goeie in jou te ontwikkel en selfs die negatiewe te omskep in ’n plus, soos byvoorbeeld in die lewe van Josef (Genesis 50:20) – om die bereiking van jou lewensdoel te dien. Dus, as jy nog onvervuld voel, gee aandag aan die proses waarmee Hy besig is.

Gebed: Skepper-God, Wonderbare Raadsman, Ewige Vader, lei my asseblief in u lig op hierdie pad. Gee my asseblief insig en begrip en help my om reg te beantwoord aan u doel. In die Naam van Jesus Christus, Amen.