Vriendskap – dag 6

Miskien onthou jy hierdie verhaal. Net ná die grootste oomblik in Elia se lewe toe hy die priesters van Baäl op die berg Karmel verslaan het, begin koningin Isebel om die profete van die Here dood te maak. Sy dreig selfs om Elia dood te maak.

Elia vlug vir sy lewe. Hy eet nie. Hy drink nie. Hy slaap baie. Hy wens hy was dood. En die ergste van alles is dat hy volkome alleen voel. Die Here gee vir hom brood en water, en Hy stuur ʼn engel om hom te bemoedig.

“Word wakker!” sê die engel. Elia het opgestaan, geëet en 40 dae en nagte geloop tot by die berg Horeb. Daar het die Here vir hom gesê dat hy nie alleen is nie. Daar is nog baie wat Hom liefhet en nie almal is boos nie. Alles is nie verlore nie. Die Here het hom ook na Elisa gelei en toe Elia by hom kom, het hy sy mantel op Elisa gegooi. Elisa het alles laat staan en Elia gevolg.

En so het ʼn legendariese vriendskap begin – uniek onder die Ou Testamentiese profete. Die Here het toegelaat dat Elisa uiteindelik vir Elia opvolg. Maar die Here het veel meer as dit gedoen. Die Here het nie net vir Elia ʼn opvolger gegee nie, maar ook ʼn ware vriend. Elisa het Elia liefgehad en het genoeg begrip vir hom gehad om hom te kon help en bemoedig.

Soms is jou kosbaarste vriendskap met iemand buite jou ouderdomsgroep. ʼn Vriendskap met iemand baie ouer of jonger as jy kan jou uitkyk op die lewe verbreed. Ouer vriende is dikwels ons mentors, soos Elia vir Elisa was. Tyd wat ons aan ʼn jonger vriend bestee, gee ons ʼn doel vir vandag en hoop vir môre.