Wie is God – Dag 6
Die Een wat roep
Bybelteks(te)
EKSODUS 3
God openbaar Hom aan Moses
Die roeping wat Moses van God ontvang om sy volk uit Egipte te lei, was vir Moses op alle vlakke ʼn ontsaglike groot ervaring, en ʼn openbaring van hoe God werk. God, wat nie beperk word deur aardse grense nie, het Moses op ʼn bonatuurlike wyse geroep en hom van veewagter tot leier verhef.
Eksodus 3:1-5 beklemtoon elemente wat vandag vir baie mense vreemd is, ten spyte van die feit dat hulle geldig is in die lewe. Dit wissel van die gewone tot die goddelike: herder, kleinvee, God, wonderwerke, om geroep te word, respek en heilige grond.
Alhoewel stadsbewoners nie dikwels aan veewagters wat kleinvee oppas dink nie, sal ʼn besoek aan die meer landelike dele van die land dit duidelik maak dat baie mans en jeugdiges in die heuwels en langs die paaie steeds hierdie belangrike taak verrig. Moses, wat in die farao se paleis in Egipte grootgeword het, is nou ʼn veewagter wat sy skoonvader se kleinvee oppas. Hy het nie geweet dat hy eintlik opgelei word om God se uitverkore volk uit Egipte te lei nie en dat hy, as herder, hierdie groot getal mense deur die woestyn moes laat trek nie!
In hierdie stadium van sy lewe het sy status nie net van prins tot nederige herder geval nie, maar hy het ook weg van die huis gewerk om vir sy familie te voorsien. Sommige mense sal vandag heel moontlik hierby aansluiting vind. God roep hom terwyl hy ʼn nederige werk doen.
Moses sien ʼn wonderlike ding gebeur: ʼn bos wat brand, maar nie uitbrand nie. Hoekom? Want God is daar! Hy verander die natuurlike orde om Homself aan Moses te openbaar. God se teenwoordigheid in hierdie situasie maak dit ʼn buitengewone ervaring. God het geen grense nie en Hy is op die punt om iets buitengewoon in Moses se lewe te doen. Hy roep Moses op sy naam en beveel hom om sy sandale uit te trek. Moses is gehoorsaam want hy staan op heilige grond — hy deel grond met God! Vir sommige mense mag dit vreemd klink.
Is ons van die buitengewone in ons lewens bewus? Luister ons na God om te hoor wanneer Hy ons naam roep? Is jy gereed vir sy aanspraak op jou lewe of dink jy dat jy te gewoon is omdat jy nie ʼn begrip het van wie God is nie? Of moet jy soos Moses eers ver weg gaan om ʼn ontmoeting met Hom te hê? Ons kan reeds in ʼn heilige plek wees sonder om dit te weet.
Wie is God?
