1 KONINGS 15

₁En in die agttiende jaar van koning Jerobeam, die seun van Nebat, het Abia oor Juda koning geword.

₂Hy het drie jaar in Jerusalem geregeer; en die naam van sy moeder was Maäga, die dogter van Abisalom.

₃En hy het gewandel in al die sondes van sy vader wat hy voor hom gedoen het; en sy hart was nie volkome met die Here sy God soos die hart van sy vader Dawid nie.

₄Maar ter wille van Dawid het die Here sy God vir hom 'n lamp in Jerusalem gegee deur sy seun ná hom te verwek en Jerusalem in stand te hou,

₅omdat Dawid gedoen het wat reg was in die oë van die Here, sonder om af te wyk van alles wat Hy hom beveel het, al die dae van sy lewe, behalwe in die saak van Uria, die Hetiet.

₆En daar was oorlog tussen Rehabeam en Jerobeam, al die dae van sy lewe.

₇En die verdere geskiedenis van Abia en alles wat hy gedoen het, is dit nie beskrywe in die Kroniekboek van die konings van Juda nie? Daar was ook oorlog tussen Abia en Jerobeam.

₈En Abia het ontslaap met sy vaders, en hy is begrawe in die stad van Dawid; en sy seun Asa het in sy plek koning geword.

₉In die twintigste jaar dan van Jerobeam, die koning van Israel, het Asa koning van Juda geword.

₁₀En hy het een-en-veertig jaar in Jerusalem geregeer; en die naam van sy moeder was Maäga, 'n dogter van Abisalom.

₁₁En Asa het gedoen wat reg was in die oë van die Here net soos sy vader Dawid:

₁₂hy het die manlike tempelprostitute uit die land laat wegtrek en al die drekgode verwyder wat sy vaders gemaak het.

₁₃Ja, selfs sy moeder Maäga het hy as gebiedster afgesit, omdat sy 'n afgryslike voorwerp vir Asjera gemaak het; en Asa het die afgryslike voorwerp omgekap en in die dal Kidron verbrand.

₁₄Die hoogtes is wel nie afgeskaf nie, maar Asa se hart was volkome met die Here al sy dae.

₁₅En hy het die heilige gawes van sy vader en sy heilige gawes in die huis van die Here gebring: silwer en goud en allerhande voorwerpe.

₁₆En daar was oorlog tussen Asa en Baesa, die koning van Israel, al hulle dae.

₁₇En Baesa, die koning van Israel, het teen Juda opgetrek en Rama gebou om niemand van Asa, die koning van Juda, te laat uit- of ingaan nie.

₁₈Toe neem Asa al die silwer en die goud wat oorgebly het in die skatkamers van die huis van die Here en die skatte van die huis van die koning, en gee dit in die hand van sy dienaars; en koning Asa het hulle gestuur na Ben-Hadad, die seun van Tabrimmon, die seun van Hesjon, die koning van Aram wat in Damaskus gewoon het, om te sê:

₁₉Daar is 'n verbond tussen my en u, tussen my vader en u vader; kyk, ek stuur 'n geskenk van silwer en goud; gaan verbreek u verbond met Baesa, die koning van Israel, dat hy kan optrek, weg van my af.

₂₀En Ben-Hadad het geluister na koning Asa en die owerstes van sy leërmagte teen die stede van Israel gestuur, en Ijon en Dan en Abel-Bet-Maäga en die hele Kinnerot met die hele land Naftali verwoes.

₂₁En net toe Baesa dit hoor, het hy opgehou om Rama te bou en in Tirsa gebly.

₂₂Toe roep koning Asa die hele Juda op — niemand was vry nie — en hulle het die klippe en balke van Rama, waarmee Baesa gebou het, weggedra; en daarmee het koning Asa Geba in Benjamin en Mispa gebou.

₂₃En die res van die verdere geskiedenis van Asa en al sy magtige dade en alles wat hy gedoen het, en die stede wat hy gebou het, is dit nie beskrywe in die Kroniekboek van die konings van Juda nie? Maar in die tyd van sy ouderdom het hy aan sy voete gely.

₂₄En Asa het ontslaap met sy vaders en is by sy vaders begrawe in die stad van sy vader Dawid; en sy seun Josafat het in sy plek koning geword.

₂₅En Nadab, die seun van Jerobeam, het koning geword oor Israel in die tweede jaar van Asa, die koning van Juda, en hy het twee jaar oor Israel geregeer.

₂₆En hy het gedoen wat verkeerd was in die oë van die Here, en gewandel in die weg van sy vader en in sy sonde waarmee hy Israel laat sondig het.

₂₇Maar Baesa, die seun van Ahia, van die huis van Issaskar, het 'n sameswering teen hom gesmee, en Baesa het hom verslaan by Gibbeton wat aan die Filistyne behoort, terwyl Nadab en die hele Israel besig was om Gibbeton te beleër.

₂₈So het Baesa hom dan gedood in die derde jaar van Asa, die koning van Juda, en koning geword in sy plek.

₂₉En sodra hy koning was, het hy die hele huis van Jerobeam omgebring; hy het van Jerobeam niks laat oorbly wat asemhaal nie, totdat hy hom verdelg het, volgens die woord van die Here wat Hy gespreek het deur die diens van sy kneg Ahia, die Siloniet —

₃₀vanweë die sondes van Jerobeam wat hy gedoen en waarmee hy Israel laat sondig het, deur sy geterg waarmee hy die Here, die God van Israel, geterg het.

₃₁En die verdere geskiedenis van Nadab en alles wat hy gedoen het, is dit nie beskrywe in die Kroniekboek van die konings van Israel nie?

₃₂En daar was oorlog tussen Asa en Baesa, die koning van Israel, al hulle dae.

₃₃In die derde jaar van Asa, die koning van Juda, het Baesa, die seun van Ahia, oor die hele Israel koning geword in Tirsa, vier-en-twintig jaar lank.

₃₄En hy het gedoen wat verkeerd was in die oë van die Here en gewandel in die weg van Jerobeam en in sy sonde waarmee hy Israel laat sondig het.