A ka kgona … – letšatši la 12

Mmadi o ngwetše tše di latelago go nna: “Benescke, ke a rapela, eupša ga ke hwetše dikarabo. Go bonala eke Modimo ga a nkwe. Ke kganyoga go phela kgauswi le Yena, eupša ka nako ye nngwe go bonala eke go na le se se nthibelago. Ke bala Bibele gape ke a rapela, eupša monagono wa ka o a ralala gomme ke katana le go kwešiša Bibele. O ka kgona go nthuša?”
Potšišo ya kgonthe e swanetše e be: Ke ka lebaka la eng re bala Bibele? Go nolofatša boikwelo bja go ba le molato? Ka gobane re dumela gore ke “selo sa maleba” go se dira? Gobane re hloka bohlale goba tebo? Goba ka kgonthe re ka re re bala Bibele ka morero o tee wa go ka tseba Modimo bokaone?

Go Johanese 1:1 re bala gore: “Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo.” Gomme go 2 Timotheose 3:16-17, re bala gore: “Mangwalo a Makgethwa ka moka a ngwadilwe ka go huetšwa ke Modimo,a gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo, gore motho yo a ineetšego Modimo e be yo a kgonago gape a loketšego go dira mediro yohle ye mebotse.”

Bibele ke mpho ya Modimo go rena ka moka. Ke sesepediši moo re utollago semelo sa Gagwe se se sa fetogego seo se dirago gore re ikwe re bolokegile. Re utolla maatla a Gagwe ao a hlohleletšago tumelo ya rena; potego ya Gagwe ye e re tlatšago ka kholofelo; lerato le mogau tša Gagwe tše di se nago dipeelo, eupša gape le kahlolo ya Gagwe ye e phethagetšego. Ka bogoneng bja Moya wa Gagwe wo Mokgethwa, Bibele e fetošwa go puku ye e tlwaelegilego go ya go Lentšu la Modimo le maatla, le le phelago (Baheberu 4:12). Dikholofetšo tša Gagwe di ba dibetša tša rena kgahlonong le lenaba leo le sa bonwego. Ke lebone la rena ge dilo ka moka go re dikologa di fetoga leswiswi; khamphase ya rena ge re lahlegelwa ke tsela, le llere ya rena ye re e namelago go tšwa ka gare ga molete wa go se be le kholofelo woo ka dinako tše dingwe o re tšhošetšago go ka re metša.

E ka ba lenaba le nyaka gore re bale le go kwešiša Bibele? Aowa. E ka ba le nyaka gore re kwe lentšu la Modimo? Le ga nnyane. Ga, lega go le bjalo, go makatše gore betho ba bantši ba paka gore ba katana, nako le nako, le dikgopolo tša go lelera ge ba rapela goba go bala Bibele, le gore ba a robala ge ba leka go rapela. E ka ba se mohlomongwe ke leano la lenaba go re beela kgole le Modimo?

Mo ke dikgato tše tharo tše o kago di leka ge o katana go kgokagana le Modimo. Kgato ya pele: e ba le lenaneo la go bala Bibele. Kgato ya bobedi: kgopela Moya wo Mokgethwa go ba Mohlahli wa gago le go šireletša kgopolo ya gago nakong ya gago le Modimo. Kgopela Yena go go hlalošetša Lentšu. Gomme kgato ya boraro: hwetša puku ya go ngwalela. Ge o fetša go bala temana go tšwa Bibeleng, ipotšiše gore e go utollela eng mabapi le semelo sa Modimo. Se ngwale fase. Ge o naganišiša gantši ka semelo sa Gagwe, ke mo tumelo ya gago e tlo golago (Baroma 10:17).

Gopola, Modimo o re hlodile gore re be le tswalano le Yena. O nyaka go kgokagana le rena go feta kganyogo ya rena ya go ka kgokagana le Yena. A re bulegeng go Yena lehono le go theetša ge A bolela. Modimo a go šegofatše.

Mošomo wa letšatši: Hwetša lenaneo la go bala Bibele inthaneteng. Kgopela Moya wo Mokgethwa go ba mohlahli wa gago ge o bala. Ngwala fase dipharologantšho tša Modimo le go naganišiša ka tšona. Mo leboge ka Yo e lego Yena go wena.