A ka kgona … – letšatši la 18

Banyakišiši kua Yunibesithi ya Stirling kua Scotland ba hweditše gore dikukuno hlogong ka kgwele ya maoto, tšeo di tlwaelegilego go papadi ye, di ka baka go lahlegelwa ke kgopolo magareng ga diphesenete tše 41 le diphesente tše 67 go ya go diiri tše 24 ka morago ga fao.
Maphelong a rena, re itemogela dikatlego le mehlolo go tšwa go Modimo. Re mo leboga ka tšona. Lega go le bjalo, ge re itemogela “kukono” ka sebopego sa tlhohlo e mpsha (ditšhelete, maphelo, ditswalano, mošommo) gantši re na le go ba bjalo ka babapadi ba kgwele ya maoto bao ba “lahlegelwago ke kgopolo”. Re tsepelela kudu go tlhohlo moo re lebalago ka se Modimo a re diretšego sona nakong ya go feta.

Modimo o tsebile gore batho ba rena ba ka lahlegelwa ke kgopolo gabonolo. Ke ka lebaka leo a laetšego Baisraele, leboelela, go aga aletare goba monyumente. Ka ntle le go ba gopotša mabapi le seo A se dirilego, ka kgonthe seo gape se matlafaditše tumelo ya bona ge ditlhohlo tše mpsha di ba tlela.

Go Eksodose 17, re bala ka ntwa ya Baisraele le Baamaleke. Moshe o be a swanetše go emiša matsogo gore Baisraele ba fenye ntwa. Ba ile ba fenya. Go Eksodose 17:15 re bala gore: “Moshe a aga aletare, a e rea leina la “Morena ke sefoka sa ka.’’ ” Noa a aga aletare morago ga go tšwa ka gare ga areka a tšwela ntle nageng ye e omilego. Joshua a aga aletare ge ba tsena Nageng ye e Holofeditšwego. Gideone a aga aletare (Baahlodi 6:26-27). Samuele (1 Samuele 14:25), Saulo (1 Samuele 15:35), Dafida (2 Samuele 24:18-19) le Eliya (1 Dikgoši 18:31-32) gape ba ile ba aga dialetare. Nako le nako aletare e be e emela seo Modimo a ba diretšego sona.

Go Pesalome 77:12,14 re bala gore: “Ke nagana ka tšohle tše o di dirilego; ke gopodišiša ditiro tša gago tše maatla … Ke wena Modimo, Modiramehlolo; o bontšhitše baditšhaba maatla a gago…”

Ke “kukuno” efe yeo o itemogetšego yona morago. E ka ba o fokola ka bolwetši bja go “lahlegelwa ke kgopolo” goba o lebelela morago gomme wa gopola dikatlego tša go feta? O ka gopola katlego ya ditšhelete nakong ya go feta ye Modimo a go filego yona? O ka gopola ditswalano tše Modimo a di lokišitšego?O ka gopola bolwetši bjo A go fodišitšego bjona goba katlego ye Modimo fela a kago go fa yona? A re lebeleleng go feta tlhohlo gomme re tsepelele gape go Modimo. Ga a fetoge. Ge tlhohlo e tšwelela, re ka tseba gore karabo e tseleng le yona! Modimo a go šegofatše.

Mošomo wa letšatši: Hwetša pene le pampiri gomme o ngwale lenaneo la dikatlego le mehlolo wena le balapa la gago le itemogetšego tšona. Nakong ye e tlago ge o hwetša “kukuno”, ka go bolokega o ka tšea lenaneo gomme o ikgopotše ka yo Modimo e lego yena. Ga a fetoge.