A ka kgona … – letšatši la 20

Mengwaga ye mmalwa ya go feta ke ile ka hlakana le Glynis Grant, dikgwedi tše senyane morago ga ge bahlakodi ba babedi ba ba hlasetše legaeng la bona. Ba mo thuntšha hlogong gomme ba mo tlogela gore a hlokafale. Seo se nkgahlilego, go e na le tšhereletšo ye e phagametšego tlhago, e be e le tumelo ya Glynis go Modimo le ka fao a sa kago a swara sekgupi go bao ba mo hlasetšego. Morago, ka amogela emeile go tšwa go yena. Mo ke setsopolwa sa yona:

“Morago, ke ile ka ya lehung kua Gouda (moo go thubja go diragetšego gona mengwaga ya go feta). Ga ke sa dula fao. Ge ke fihla toropong, motho o mongwe a mpotša gore yo a nthuntšego o lokolotšwe ka morago ga mengwaga ye lesomo kgolegong. Moyeng wa ka, ka ikwa gore ke nyaka go kopana le yena gomme ke mmotše gore ke mo lebaletše.

Motho yo mongwe o ile a nkiša kua go lesogana leo. Ge ke ema pele ga gagwe, ke ile ka mmotšiša gore o a tseba gore ke mang. A re, “Aowa mme.” Ka mmotša gore, “Ke Mohumagadi Grant. Mosadi yo o mo thuntšego.” Mahlo a gagwe a tlala letšhogo gomme ka kgona go bona gore o be a sa iketla. Ka bea seatla sa ka kgareng ya gagwe gomme ka re, “Go lokile. Ke šetše ke go lebaletše mengwaga ye 13 ya go feta. Ka lemoga gore go be go na le thulano e kgolo ka gare go yena ka ge mahlo a gagwe a be a tletše ka megokgo. A inamiša hlogo ya gagwe gomme a re, “Mme, seswantšho seo se raloka kgopolong ya ka letšatši le lengwe le le lengwe … Ke maswabi ka se ke go dirilego sona.” Ka batamela pele gomme ka mo gokara, ka re, “Ke a go lebalela.” A šikinya hlogo a le gare a lla. Ka ikwela nakwana ya pholo.

Lekgarebe la pele la lesogana le be le eme kgauswi. O be a na le dikgwedi tše tshela a imile ge a be a e ya kgolegong. Ke ile ka bona gore o sa mo swaretše sekgopi ka seo a mo dirilego sona le morwedi wa gagwe. Ka bolela le bona ka bobedi ka mabapi le bohlokwa bja dikgetho. Ka ba hlalošetša gape gore sepheto sa ka sa go lebalela lesogana mengwaga ya go feta se nthušitše go phema bophelo bja lehloyo le pefelo. Ka re le bona ba ka itemogela bjona, eupša tebalelo e bohlokwa. Moo mosadi mathomong o be a dikadika, mafelelong a lebelela ka gare ga mahlo a lesogana. A mo gokarela gomme le ge megokgo e be e elela dithameng tša bona, a kgopela tebalelo gomme a mo lebalela. Tsošološo ya direga nakong yeo.

Tseleng ya go boa go tšwa Gouda, ka leboga Modimo ka kopano ye bjale ka ge gape ke lemogile gore ge Morwa a re lokolotšwe, re lokolotšwe ka nnete. Ke mo fa letago ka moka!”

Go Johanese 8:36 re bala gore: “Ge le ka lokollwa ke Morwa wa Modimo, gona le tla lokologa ka nnete.” Go Doiteronomio 30:19 go ngwetšwe: “Bjale ke le fa go ikgethela bophelo goba lehu, tšhegofatšo ya Modimo goba thogako ya gagwe, gomme ke bitša legodimo le lefase go tlo hlatsela gore le kgetha eng. Kgethang bophelo, gore lena le ditlogolo tša lena le tle le phele.”

Modimo a ka kgona gomme o nyaka go re fa ka moka bophelo bjo bo feletšego. Senotlelo ke go lebalela. Ge go le boima ka nnete, Modimo a ka go fa sebete sa gore o tšee kgato ya pele. A re kgetheng bophelo gore gape re amogele tokologo. Modimo a go šegofatše..

Mošomo wa letšatši: Dira lenaneo la batho ba o hlokago go ba lebalela – goba mohlomongwe yoo a hlokago go go lebalela. Kgopela Modimo bohlale le menyetla go dira khutšo. Go bohlokwa ka dinako ka moka!