Batamela kgauswi le Modimo – Letšatši la 1

Mathomong a 2015, ke botšišitše batheeletši ba lenaneo la ka la radio go ka aba tše dingwe tša dithulaganyo tša bona tša Ngwaga o Moswa ka go romela SMS. Bontši bja batheeletši, ka ntle le go nyaka go phela bophelo bja go phela gabotse mmeleng, ba bile le tumo ya go ka aga tswalano ya kgauswi le Modimo. Se se dirile gore ke nagane. O batamela bjang kgauswi le Modimo? O itemogela bjang bogona bja Gagwe ka mo go bonagalago bophelong bja gago? Gomme o ka ba le nnete bjang gore ka kgonthe ke Modimo yo a go hlahlago go dira dipheto tše bohlokwa?

Ke lemogile gore Jakobose 4:8a ke e nngwe ya ditemana tša go tuma e badumedi ba e tsopolago gantši bjalo ka tlhohleletšo, ge motho yo mongwe a bolela ka tumo ya gagwe ya go ba kgauswi le Modimo: “Batamelang Modimo, gomme le yena o tla le batamela.” Se ke nnete; lega go le bjalo, o badile neng la mafelelo karolo ya bobedi ya temana? “Hee, lena badiradibe, lesang go dira dibe! Itlhwekišeng dipelo, mapelopedi tenang!” (Jakobose 4:8b).

Karolo ya bobedi ya temana e bohlokwa go itemogeleng karolo ya pele. Ka lebaka la eng? Ka gobane ga go le o tee wa rena yo a kago batamela kgauswi le Modimo le go tseba lentšu la Gagwe maphelong a rena, ge ka boomo re dula sebeng. Ka lebaka la eng? Ka gobane Modimo ke yo mokgethwa gomme ka mehla re swanetše go katanela go ba ba bakgethwa gore re kgone go ema ka boitshepo bogoneng bja Gagwe. Sebe se re tšeela boitshepo bja go tsena bogoneng bja Gagwe.

Ekaba seo se ra gore re swanetše re be ba ba phethagetšego pele re eya go Modimo? Aowa. Ka moka re dirile sebe. Se ke ka lebaka leo Jesu e hlokafetšego sefapanong. Gomme, ka tumo ya go ba ba bakgethwa kudu, Moya wo Mokgethwa o thoma tshepetšo maphelong a rena moo sebe, se se bakago mapheko tswalanong ya rena le Modimo, se tlošwago gomme boitshepo bja rena bja go ka ema bogoneng bja Modimo bo a tsošološwa.

Ke eng se se thibelago kelelo ya Moya wo Mokgethwa bophelong bja gago lehono? Tswalano ya ka ntle ga lenyalo, tumelelano ya ditšhelete ye e sego molaong, go befela ka bjako, go belaela, go rata lesebo, go galefa, pelo ye e sa lebalelego, temalelo, goba go palela ke go laola nako? Ke neng la mafelelo mo o išitšego dilo tše go Modimo gomme wa mo kgopela gore A go lokolle?

Gopola, tumo ya Modimo ya tswalano le wena ke e kgolo go feta ya gago. Le ke lona lebaka le A re hlodilego. A re batamele go Yena lehono ka tsebo ya gore letsogo la Gagwe le šetše le otlologetše go rena. O tla le tšea? Modimo a go šegofatše.