Batamela kgauswi le Modimo – Letšatši la 10

Go bapa le siling ya Kapele ya Sistine, kua Toropongkgolo ya Vatican, o tla hwetša seswantšho sa Michelangelo, The Creation of Adam. Seswantšho se se bontšha monna, Adamo, a otlollela monwana wa gagwe go letsogo le le otlologilego la Modimo. Nako le nako ke ge ke lebelela seswantšho, se nkgopotša tumo ya Modimo go laetša maatla a Gagwe go batho ba go tlwaelega. Lehono, ke nyaka go le abela bopaki bja yo mongwe wa bašomi-gotee wa ka kua Radio Tygerberg 104fm, Lorrein Katzke, go se.

Lorrein: “Bošego bjo bongwe ke le tseleng ya go ya gae morago ga mošomo, ke ile ka theeletša molaetša radiong. Moreri o be a bolela ka sehlogo ‘Ga go se se palelago Modimo’. Lebakeng le lengwe, o boletše ka lerato le ka mo go kwagalago go batheeletši, ka pelo e e tletšego tumelo ka tlase ga tlhahlo ya Moya wo Mokgethwa: ‘Mme, monna wa gago o go file dipampiri tša tlhalo tše o swanetšego ke go di saena. Eupša ga o nyake, ka gobane o sa dumela gore Modimo a ka bušetša lenyalo la lena. Ke re go wena bošegong bjo, ga go se se palelago Modimo.’

“Lefoko la go latela le dirile gore ke thothomele, ge ke itemogela bogona bja Moya wo Mokgethwa ka koloing ya ka, ge moreri a re: ‘Gomme wena mme, yo a lego ka koloing ka lengwalo la ngaka ka gare ga mokotla wa gago wa go atha. O swanetše ke go le saena go dumelela dingaka go tima metšhene ye e phedišago ngwana wa gago. Ke re go wena bošegong bjo: Ga go se se palelago Modimo. A ka fodiša ngwana wa gago.’

“Dikgwedi tše mmalwa morago, ke bile le kopano le mme le morwa bao ba bego ba tlile radiong go tlo nea bopaki lenaneong la ka, Turning Point. Ke be ke sa tsebe selo ka bona, ka ntle le gore ba na le bopaki. Go bile semaka se segolo ge ke kopana le bona lefelong la go amogela baeng, gomme mme a mpotša gore morwa wa gagwe o be a le ka gare ga kotsi e šoro ya koloi dikgwedi tše mmalwa tša go feta. Boemo bja gagwe bo ile bja mpefala kudu moo dingaka di mmeditšego sepetlele. Ba mo file lengwalo la tumelelo gore a le saene, gore ba kgone go tima metšhene ye e bego e phediša mošemane, ka ge ba be ba se na kholofelo ya gore o tlo fola. Ge a le tseleng ya go ya gae go yo bolela le monna wa gagwe, a bulela radio gomme a theeletša thero yeo moo moreri a gopoditšego batheeletši gore ga go se se palelago Modimo.

“Ge a fihla gae, mosadi o boditše monna wa gagwe ka lengwalo le thero. Mmogo ba tšere sepheto sa go se saene lengwalo, eupša go tshepha Modimo go ba direla mohlolo. Letšatši le le latelago, dingaka tša ema di maketše ka phetogo ya semeetseng ya boemo bja mošemane. Nakong ya dibeke o be a tlo ya gae – a fodile ka mo go feletšego. Ga go tumišwe Modimo.”

Lorrein o nepile. Modimo o tseba tlhohlo e nngwe le e nngwe maphelong a rena. O a kwa ge re llela go Yena – gomme O nyaka go re bontšha bogolo le maatla a Gagwe. Go Jeremia 32:27 Modimo o re: “Tseba, nna Morena, ke nna Modimo wa nama yohle. A go ka ba le selo se se mpalelago?” Go Jesaya 41:13 re bala gore: “Gobane nna, Morena Modimo wa lena, ke a le tiiša, ke le hlahla ka letsogo ke re: ‘Se boifeng, ke a le thuša.’ ” Gomme go Baefeso 3:20-21, re a gopotšwa gore Modimo a ka dira go feta ka mo re kgopelago goba go nagana: “Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, a a tumišwe …”

Ke eng tlhohlo ya gago lehono? E iše go Modimo. Batamela kgauswi le Yena, o tseba gore o šetše a otlolletše letsogo la Gagwe go wena. Katlego ya gago e kgauswi go feta ka mo o naganago. Modimo a go šegofatše.