Batamela kgauswi le Modimo – Letšatši la 11

[Ka lekga le lengwe, o tee wa babadi o ngwetše emeile ka mantšu a: “Ka Pherekgong lenyaga, ke hlasetšwe ntlong ya ka ka foroko ya ka serapeng gomme ka tlogelwa gore ke hwe. Modimo o phološitše bophelo bja ka, eupša ga bjale ke na le poifo ya gore motho yo a ntlhasetšego a ka boa. Ke phela bjalo ka mogolegwa ntlong ya ka ka gobane ke a boifa go tšwela ntle. Dintho tša ka di gare di a fola, eupša bošego, ke a tsoga ge ke ekwa modumo o monnyane. Ke kgopela o nthuše!”]

Ekaba le wena o na le poifo ye e golofatšago bophelong bja gago? Ekaba o boifiša ke bokamoso bja naga ya rena, gore wena goba moratiwa wa gago a kago hwetšwa a na le bolwetši bjo šoro, gore se sengwe se ka direga go bana ba gago, goba molekani wa gago a ka se botege? O boifa gore o ka lahlegelwa ke mošomo wa gago gomme wa pelela ke go hlokomela ba lapa la gago?

Poifo ke e nngwe ya dithulusi tše di šomago gabotse tše lenaba le di šomišago go golofatša batho. E dira gore ke nagane ka setšhelo se se nago le sekontiri se seso, sa go fiša se se tšhelwago go motho. Ge sekontiri se se kgomarelago se oma, motho a ka se šuthe gomme mafelelong o a hlokafala. Ka tsela ye e swanago, poifo e re dira gore re iketle. E re tšeela lethabo le khutšo ya rena, le go re dira gore re ipeele thoko go batho ba bangwe le Modimo. Ka go realo, go bohlokwa gore re hwetše poifo maphelong a rena, gore re kgone go e fenya.

Ke ka lebaka la eng re swanetše go hwetša dipoifo tša rena? Go 1 Petrose 5:8, re a gopotšwa gore lenaba o phaphaila bjalo ka tau ye e bopago, o nyaka ditsela tša go re hlasela. Jobo ke mohlala wa se. Sathane o be a nyaka go mo fediša, eupša ga go a ba le le le tee la maano a Sathane leo le atlegilego ka ge Modimo a beile lebota la tšhireletšo go dikologa Jobo, lapa la gagwe le dithoto (Jobo 1:10).

Jobo, lega go le bjalo, o be a na le bofokodi: poifo ya gore se sengwe se ka hlaga go lapa la gagwe goba dithoto. Sathane a bona seo gomme ge a hwetša monyetla wa go leka tumelo ya Jobo, a mmetha mo a tsebilego gore o tlo kwa bohloko kudu (Jobo 3:25).

Go e na le go nagana ka poifo e e itšego mapahelong a rena goba go bolela ka yona go batho bohle bao ba tlago theeletša, re hloka ke go thoma go mpshafatša dikgopolo tša rena gomme ka boomo re e iše go Modimo. Re hloka gape go gopodišiša dikholofetšo tša Modimo tabeng ye le go di bolela ka tumelo, ge re tlelwa ke poifo. Se ke sebetša se se šomago kudu kgahlanong le ditlhaselo tša lenaba.

Lentšu la Modimo le bolela eng ka maemo a a boifišago? Go Jesaya 54:18 re bala gore: “ ‘Eupša wena ga go sebetša se o tlago hlaselwa ka sona sa go gobatša. Bohle bao ba go pharago ka molato tshekong o tla ba bontšha gore ke bona ba nago le molato. Ke ka moo ke tlago dira gore bahlanka ba ka ba bolokege, ka dira le gore ba fenye.’ O realo, Morena.” Go Pesalome 91 re bala gore: “O ka se boife dikotsi tša bošego, goba go hlaselwa mosegare … ka gobane Morena ke setšhabelo sa gago, Yogodimodimo o mo dirile sebo sa gago, O ka se welwe ke kotsi … Modimo o tla laela barongwa ba gagwe gore ba go hlokomele, ba go šireletše gohle mo o yago gona.” Gomme wena, bjalo ka mmadi yo a rometšego emeile, o boifa go robala bošego, bala mantšu go Pesalome 3:5: “Ke a sekama ka robala, ka ba ka tsoga, gobane Morena o lala a ntšhireleditše.” Modimo o a re šireletša ge re robala. O a re šireletša ka gobane ga A potume (Pesalome 121).

Poifo e ka se fele ka bošego bjo tee, eupša ke a go netefaletša, ge o mpshafatša kgopolo ya gago letšatši le letšatši le go thoma go bolela Lentšu la Modimo maemong a gago a a boifišago, o tla itemogela ka fao tumelo e tlago thoma go gola gomme poifo e tla fokotšega gomme ya fela, ka mo go feletšego, ge nako e tšwela pele. A re batameleng kgauswi le Modimo ka gare ga poifo ya rena, re tseba gore ga A romele fela barongwa ba gagwe go re šireletša, eupša gape O bea leboto la mollo go re dikologa, baratiwa ba rena le dithoto tša rena. Modimo a go šegofatše.