Batamela kgauswi le Modimo – Letšatši la 13

“Tswii, tswii …” Ekaba o kwa legotlo ka gare ga kakanyo ya gago? O dula fase, wa ngwaya ditsebe tša gago gomme gateetee wa thekeselela morago … pelo ya gago e kgaotša go kiba gomme meriri molaleng wa gago e a emelela, ka gobane modumo wa tswii wa legotlo o fetogile go bopa ga go thiba ditsebe. Legotlo le fetogile drakone, e ikemišeditše go go metša.

Se ke tsela ya sebe maphelong a rena. Mathomong, re nagana gore re kgona go bogela dibidio tša batho ba robalana goba go petšha ka tšhelete goba go nwa bjala bjo bontši letšatši le letšatši. Goba re dumela gore re laola “setswalle se se thibetšwego” le motho yo mongwe ka ntle ga lenyalo la rena, goba sefelapelwana sa rena goba go rata lesebo. “Tswii, tswii …” gomme pele re tseba, re ka gare ga marofa a drakone ye e nyakago go re bolaya.

Lehodu lona le tlela go utswa le go bolaya le go lobiša (Johanese 10:10). O tseba mafokodi a rena gomme o tla tšwela pele go re leka ge re sa dire selo ka seo. Go Sefela sa Difela 2:15, re bala gore ka dinako tše dingwe diphukubje tše “di se nago kotsi” di ka baka tshenyo e kgolo ka dirapeng tša merara, ge di ka se tlošwe ka nako.

O ka dira eng ka teko?

1) Amogela mafokodi a gago: Go Jakobose 4:7 re bala gore: “Bjale ge, ikokobetšeng go Modimo. Elwang le Diabolose, gomme yena o tla le tšhaba.” Ge re bolela le Modimo ka mafelo maphelong a rena ao re katanago go ona, re tšea kgato ya pele ya go fenya teko. Kgopela Yena go go matlafatša bofokoding bja gago gore o kgone go lwantšha teko. Go Baheberu 2:19 re bala gore: “Gomme bjale a ka thuša ba ba lekwago, ka ge le yena (Jesu) a ile a lekwa ka go hlokofatšwa.”

2) Rapelela tšhireletšo: Go Mateu 6:13, Jesu o ruta barutiwa ba gagwe go rapela gomme o re, magareng ga tše dingwe, re swanetše go rapela letšatši le letšatši: “O se re iše molekong, o upše o re phološe bobeng.” Go na le maatla thapelong.

3) Tšhabela teko: Josefa o tšhabile go mosadi wa Potifare ge a leka go mo gokeletša (Genese 39). O ka gomme o swanetše go dira bjalo ge o lekwa. Go fa mohlala, bea sellathekeng fase gomme o ye ka ntle ge o lekwa go ka romela molaetša ka WhatsApp, ka maikemišetšo a a fošagetšego, go motho wa ka ntle ga lenyalo. Ka boomo bolela selo se sebotse ge o na le tumo ya go ka seba. Goba lahlela ka ntle bjala motseng wa gago, ge o tseba gore o ka lekwa go ka bo nwa ge letšatši le dikela.

Ekaba go na le mogau ge o wele ka lebaka la teko?

Go 1 Johanese 1:9 re bala gore: “Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle.” Ge ka nnete o fetoga le go furalela sebe, o tla itemogela tebalelo ya nnete le mogau go tšwa go Modimo.

A re batameleng kgauswi le Modimo ka gare ga diteko le go kgopela Yena go re matlafatša. A re lateleng mohlala wa Jesu ka go ithekga ka Lentšu la Gagwe le go lwantšha lenaba. Re ka se lokollwe fela marofeng a drakone, eupša lenaba le tla re tlogela. Modimo a go šegofatše.