Batamela kgauswi le Modimo – Letšatši la 14

Ekaba o kgauswi le go rola mošomo ka gobane o kwele go lekane ka moetapele wa gago wa go se loke goba mošomi-gotee wa go hloka mekgwa? O sa bona mošomo o o lego go wona bjalo ka mpho go tšwa go Modimo goba o thoma go o tšeela fase?

Pele megala ya dillathekeng e eba gona ka bontši, rakhemisi yo a dulago torotswaneng o be a theeletša dipoledišano tše batho ba bego ba e ba le tšona, ge ba be ba bolela ka megala ya batho bohle ye e bego e le ka ntle ga mojako wa khemisi.

Letšatši le lengwe, poledišano ya mošemane e sepetše ka tsela ye: “Thobela, mohlomphegi. Ke founa go botšiša ge eba poso ya mošomi wa ka serapeng e sa le gona? Oh, le šetše le thwetše motho? O kgotsofatša ke mošomo wa gagwe? Ke a leboga.” Rakhemisi o ile a kwela mošemane bohloko gomme a ya go yena a re: “Ke maswabi ga o sa hwetša mošomo, morwa.” Mošemane, lega go le bjalo, a myemyela gomme a fetola: “Aowa, ke hweditše mošomo. Ke be ke nyaka go tseba gore ba sa thabiša ke mošomo wa ka.”

Kanegelo ye e dirile gore ke nagane: E sa le wa ba ka gare ga lefelo la boiketlo mošomong wa gago wa bjale, goba go sa le bohlokwa go wena go ka dira mošomo wa gago ka potego le bothakga? Ke neng la mafelelo mo o netefaditšego gore mongmošomo wa gago o kgotsofatša ke mošomo wa gago? Mo ke melawana e mehlano ya kgwebo go tšwa Lentšung la Modimo:

MOLAWANA WA 1: ŠOMA EKE MODIMO KE MOTHWADI WA GAGO
• Baefeso 6:6-7: “Seo le se se direle gore ba le bone mme ba le rete, eupša ka dipelo tšohle tša lena le dire se se nyakwago ke Modimo, ka ge le le makgoba a Kriste. Le ba šomele ka dipelo tše ditšhweu mo nkego le šomela Morena, e sego batho.”

MOLAWANA WA 2: KGOPELA BOHLALE GO MODIMO
• Jakobose 1:5: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.”

MOLAWANA WA 3: ITSHWARE KA POTEGO BOEMONG BJO BONGWE LE BJO BONGWE
• Doiteronomio 25:15-16: “Le se ke la hlalefetšana ge le šomiša dikeloboima le dikelo. Le šomiše dikeloboima le dikelo tša mmakgonthe tše di tshephegago, gore le tle le phele nako ye telele nageng ye Morena Modimo wa lena a le fago yona. Morena o hlaswa batho ba ba hlalefetšago.”

MOLAWANA WA 4: O SE KE WA TŠWAFA
• Diema 14:23: “Go katana go tlišetša motho moputso, go etiša leleme pele gona go a mo diitša.”

MOLAWANA WA 5: DIRA MODIMO KAROLO YA DITHULAGANYO TŠA GAGO
• Diema 16:3: “Gafela Morena tše o di dirago, gomme o tla atlega mererong ya gago.”

A re batameleng kgauswi le Modimo lefelong la mošomo, re le gare re ikgopotša ka mehla gore ke Mothwadi wa rena. A re mo dire karolo ya sepheto se sengwe le se sengwe sa rena, go netefatša gore re eteletše pele ke Moya wo Mokgethwa ge re tšea dipheto. Gomme ge o ikhwetša boemong mo tsela ya bomenetša e bonagalago e kgahliša, gopola gore Modimo o bona tšohle. Tšea dipheto tše di bontšhago potego. Modimo a go šegofatše.