Batamela kgauswi le Modimo – Letšatši la 17

Mengwaga e mmalwa ya go feta ke ikhumane ke le ka gare ga bjo tee bja maemo a thata ao batswadi ba bantši ba lekago go a efoga ka dinako ka moka! Morago ga leeto go ya mabenkeleng, ke be ke le gare ke tlema morwedi wa ka, Joalé, yo a bego a nale mengwaga e mebedi ka nako yeo, go setulo sa gagwe sa ka koloing gomme ka bea dinotlelo tša koloi setulong sa pele gore ke tla tseba mo ke di beilego. Go fihla lebakeng le, dilo di be di sepela ka thelelo. Lega go le bjalo, ge ke tswalela lemati la morago gore ke tsene ka pele, ke kwile modumo wa alamo! Ka metsotswana, ke eme ka ntle gomme morwedi wa ka le dinotlelo di le ka gare ga koloi.

Ka kwa mokokotlo wa ka o tonya ka lebaka la letšhogo, gomme ka nagana ka dikgopolo tše ntši go ka bula lemati – gaešita le go thuba lefestere. Moleti o tlile go nna go ka thuša. A mpotša gore o tla kgopela balaodi ba gagwe go ka founela motho yo a kgonago go bula mamati a a notletšwego go tla a tlo nthuša. Se se ka be se tšere lebaka la iri. Go nna, iri e be e le e ntši kudu, ka ge mafestere ka moka a koloi a be a notletšwe. Ge ke be ke le kgauswi le go lla, ka welwa ke kgopolo e botse. Bolela le ngwana wa gago. Ka poifo le tlalelo ya ka, ga se ka nagana ka go dira seo. Ke tantše šedi ya Joalé gomme, ka lefestere, ka mo hlahla kgato le kgato go ka ipofolla, a namele ka pele ga koloi gomme a tlanya konope go alamo go bula mamati! Ke palela ke go hlaloša kimologo ye ke e kwelego ge ke mo gokara morago ga fao.

Tiragalo ye e nthutile thuto ya semoya. Lefaseng, rena bjalo ka badumedi re ka bapetšwa le morwedi wa ka ka koloing, ge Modimo a eme ka ntle. Le ge A na le maatla le [ka tsela e swanago, nkabe ke thubile lefastere goba go bitša motho yo a kgonago go bula mamati a a notletšwego] go phethagatša se se swanetšego go dirwa le semeetseng, O kgetha go re šomiša bjalo ka didirišwa tša gagwe go bontšha lerato le mogau wa Gagwe lefaseng. Re, ka gona, hloka go obamela le go latela tlhahlo ya Gagwe. Potšišo ke gore: Ekaba o a obamela ge A go bitša?

Go 1 Bakorinte 3:9 re bala gore: “Gobane rena re badirišani mošomong wa Modimo, gomme lena le tšhemo ya Modimo, ebile ke lena moago wa Modimo.” Go ngwetšwe go Baroma 6:13: “Le gona le se ke la gafela ditho tša lena sebe, ya ba tša go dira bokgopo. Le upše le ikgafele Modimo le le ba le tsošitšwego bahung la phela, gomme ditho tša lena le di gafele go dira boloki.” Gomme go 2 Timotheose 2:20-21 re bala gore: “Ka ntlong ya mohumi dibjana ga se tša gauta le tša silibera fela, eupša le tša kota le tša letsopa di gona; dingwe ke tša go šomišwa ka matšatši a magolo, dingwe ke tša mehleng. Ge motho a ka kgaogana le dipolelo tša lefeela tše di se nago borapedi, e tla be e le wa go šomišwa ka matšatši a magolo; o tla be a ikgafile mme e le wa mohola go mong wa gagwe, a ikemišeditše go dirišwa medirong yohle ye mebotse.”

Ke eng se Modimo a go kgopelago gore o se dire lehono? Ekaba se a go imela gomme o ka re sehlabelo e ka ba se segolo kudu? Goba o a boifa gore o ka se be le bohlale bja go ka phetha protšeke? Gopola, Modimo o go lebeletše gomme O tla go hlahla kgato le kgato ka Moya wa Gagwe wo Mokgethwa, go fihlela o fetša. A re duleng re botega. Ke a kgola gore O na le myemyelo e kgolo sefahlegong sa Gagwe ge re botega. Modimo a go šegofatše.