Batamela kgauswi le Modimo – Letšatši la 19

Mengwaga e mmalwa ya go feta, ke bile le polelo ka bohlokwa bja thapelo le go itima dijo go lenaneo la ka la radio. Go bile le dikarabo tša go kgahliša. Motheeletši o mongwe o rile mokgwa wo ga o sa dirišwa. Eupša bontši bja batheeletši, lega go le bjalo, ba pakile gore ba itemogetše bogona bja Modimo maphelong a bona ka tsela e mpsha, nakong ya go itima dijo le go rapela. Magareng ga mabopaki a, mo batheeletši ba bego ba paka ka dikatlego tša ditšhelete, kimollo go bohloko bja maikutlo, manyalo ao a tsošolotšwego, kgateletšego ye e fodišitšwego, ditšhaba tše di fetošitšwego, bana ba ba lokollotšwego ditlemong tša temalelo ya diokobatši, gomme motheeletši o pakile gore o bile le ngwana nakong ya ge a itima dijo, morago ga ge dingaka di rile go ka se kgonege gore a be le bana ba e lego ba gagwe. Se ke se Modimo a kago se dira.

Ekaba ke go itima dijo mo go dirilego phapano? Aowa. Go be go le Modimo. Go itima dijo e be e le fela monyetla le mokgwa wo motho goba batho ba thomilego go se sa šetša tlhohlo gomme ba tsepelela go Modimo. Ge ba dira seo, ba itemogetše dipelo tša bona di thoma go kiba le pelo ya Modimo. Seo se dirile phapano.

Ke eng go itima dijo? Go itima dijo ke go se je dijo (ka dinako tše dingwe meetse gape) go nyaka sefahlego sa Modimo. Ga se fomula ya maleatlana goba tsela ya ka pela ya go fokotša boima. Ga se tsela ya go ka fekeetša Modimo go re fa se re se nyakago. Ke sehla moo re nyakago bogona bja Modimo, go sa šetšwe gore re amogetše katlego goba aowa.

Ekaba Bibele e kgothaletša go itima dijo? Ka Bibeleng ka moka, re bala ka badumedi ba itima dijo go nyaka sefahlego sa Modimo. Estere o itimile dijo matšatši a mararo a phuphuthela kgoši gore Bajuda ba se bolawe; Daniele le bagwera ba gagwe ba itimile dijo matšatši a 21, ge ba le kgolegong, ba nyaka bohlale; Jesu o itimile dijo matšatši a 40 pele a thoma mošomo wa Gagwe, le gaešita Pukung ya Ditiro, re bala gore badumedi ba itimile dijo le go rapela pele go tšewa dipheto tše kgolo.

O itima bjang dijo? Go Mateu 6:16-18 Jesu o re: “Ge le ikona dijo le se ke la itira tše nkego le nyamile la etša baikaketši. Bona ba šošobanya difahlego gore ba bonwe ke batho gore ba ikona dijo. Ruri, ke le botša gore ke gona ge ba hweditše moputso wa bona ka botlalo. Wena ge o ikona dijo, o hlape mahlo, o tlole moriri, gore batho ba se ke ba lemoga gore o ikona dijo – go tsebe fela Tatago yo a sa bonwego. Gomme Tatago, yo a bonago tše di dirwago ka sephiring, o tla go putsa.”

Ekaba o nyaka katlego lapeng la gago, lefelong la gago la mošomo, maemong a gago a ditšhelete, goba gaešita lenyalong la gago? Go Markose 9:29, barutiwa ba botšiditše Jesu gore ka ka lebaka la eng ba be ba palela ke go leleka memoya ye mebe. Ke Jesu fela yo a bego a kgona go dira se. A fetola ka gore mehuta ye mengwe ya memoya e ka lelekwa fela ka thapelo le go itima dijo. Ga se mohlomongwe nako ya gore o be le nako ya go itima dijo mo o tlago nyaka sefahlego sa Modimo? Go sa šetšwe gore o amogela katlego goba aowa, ke a go netefaletša, o tla fetoga ge pelo ya gago e thoma go kiba le ya Gagwe. Modimo a go šegofatše.