Bible Society of South Africa
Benescke Janse van Rensburg

Batamela kgauswi le Modimo – Letšatši la 3

Batamela kgauswi le Modimo dinakong tša leswiswi

(Di)temana ya Bibele

DIEMA 15

3Mahlo a Morena a mo gohle,

a lebeletše ba babe le ba ba lokilego.

DIEMA 15:3NSO00Bula go Mmadi wa Bibele

BAHEBERU 4

13Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena.

BAHEBERU 4:13NSO00Bula go Mmadi wa Bibele

2 BAKORINTE 12

9Yena a mphetola ka go re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna.

2 BAKORINTE 12:9NSO00Bula go Mmadi wa Bibele

JEREMIA 31

25Ka gona motho o tla re: ‘Ke ile ka robala, ka tsoga, ka lebaleba, ka kwa ke lapologile.’

JEREMIA 31:25NSO00Bula go Mmadi wa Bibele

[Bokamorago: Mengwaga e mmalwa ya go feta, mmadi – yo e lego mohlologadi le mme wa go se be le molekani – o rometše emeile mo a rilego bophelo bja gagwe bo thata. Kgatelelo le boikarabelo bja go ba bobedi mme le tate go bana ba gagwe di be di ipha maatla. O, go feta moo, ngwetše gore o ikwa o ka re Modimo o mo lebetše gomme ga a tsebe gore o tla kgona go emelana le kgatelelo ye nako e kae.] Ekaba le wena o ikwa o tantšwe ka gare ga sehla se se thata sa bophelo bja gago, bjalo ka mmadi yo?

Go be go le leswiswi le lesoleso sethokgweng. Modumo o mongwe le o mongwe o be o tšhoša kudu mošemane wa mengwaga e 13 gomme a swanela ke go lwantšha tumo ya go ka tšhabela go motse wa kgauswi. Letšhogo le be le mo thibela. Gape, kgonagalo ya go lewa ke dihlong ya go ema bjalo ka motho yo a paletšwego pele ga setšhaba, ge letšatši le hlaba. Go be go le setlwaedi, setšhabeng sa gabo, gore bašemane ba mengwaga e 13 ba tla fetša bošego bja letšatši la matswalo a bona sethokgweng. Ge ba kgonne go dira se, e tla ba banna.

Ge letšatši le hlaba mesong e latelago, mošemane o bone monna godimo ga leswika a le kgole. E be e le tatagwe yo, a swere sethunya ka letsogong la gagwe, a dutšego bošego ka moka a mo letile le go mo šireletša go kgonagalo efe goba efe ya kotsi.

Ke selo se se swanago go rena maemong a leswiswi, a go tšhoša maphelong a rena. A ka tla ka sebopego sa tlhalo, moratiwa a ipolaya, kgateletšego ya monagano, mathata a ditšhelete, go se šome goba boemo moo boikarabelo bo tšhošetšago go re imela. Maemong a bjalo, le rena re hloka go tšhabela go batho gore ba re šireletše. Lega go le bjalo, nnete ke gore Modimo o kgauswi kudu le rena go feta ka mo re naganago, a re letile le go re šireletša. Go Diema 15:3 re bala gore: “Mahlo a Morena a mo gohle …” Gape, go Baheberu 4:13 re bala gore: “Ga go sebopiwa se se širegelago Modimo.”

Le ge lenaba le leka go hlola mathata maphelong a rena, Modimo a ka se dumelele selo sefe goba sefe seo re ka palelago go emelana le sona. Go 2 Bakorinte 12:9 O re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Gomme go Jeremia 31:24 Modimo o holofetša gore: “Ke tla lapološa ba ba lapilego, ka khoriša bohle ba ba swerwego ke tlala.”

A re beeng kholofelo ya rena go Modimo ka nako ya dihla tša leswiswi tša bophelo, re tseba gore A ka se tsoge a re tlogetše, ebile a ka se tsoge a re lahlile. Ge mahlasedi a pele a letšatši, ka sebopego sa katlego, a tšwelela, le rena, bjalo ka mošemane sethokgweng, re ka gadima morago le go lemoga gore Modimo o be a na le rena nako ka moka, a re šireleditše le go re šetša. Modimo a go šegofatše.

Bible Society of South Africav.4.28.1
RE HWETŠE GO