Batamela kgauswi le Modimo – Letšatši la 6

Ge o ka tsoga mesong ya gosasa, gomme wa lemoga gore matlakala a Bibele e nngwe le e nngwe lefaseng ga a na selo, o ka ikarabela bjang? Ke tše kae tša dikholofetšo tša Modimo tše o di bolokilego pelong ya gago?

Moago wa kereke o be o tletše la go falala ge moreri, Charles Spurgeon, a eya pulpiting go yo thoma tirelo ya Sontanga. Dilo ka moka di sepetše go ya ka thulaganyo ya ka mehla. Lega go le bjalo, o makaditše phuthego, ka ge a sa bala Bibele pele a thoma thero ya gagwe. Ga se a kgoma Bibele pulpiting gomme a bolela mantšu a gore: “Ke sotšwe gore ke tsopola kudu go tšwa Bibeleng gomme ga ke bolele ka mo go lekanego ka thutamahlale.” Homola nakwana. “Go ba gona, re na le mohlologadi phuthegong yo a lahlegetšwego ke morwa wa gagwe a nnoši. O nyaka go tseba gore o ile go mmona gape. A re lebeleleng thutamahlale ya gona. Ekaba o tla mmona gape? O kae yena? Ekaba lehu ke pheletšo ya tšohle, goba go na le se sengwe ka morago ga lehu?”

Go bile le setu phuthegong ge Spurgeon ka go nanya a lebelela lehlakore le tee la moago go ya go le lengwe. “Ekaba go na le dikarabo?” Gwa ba le setu go ya pele, eupša ga go a ba le yo a emeletšego a bolela se sengwe. Morago ga metsotso e mmalwa, a tšea Bibele, a e bula gomme a re: “Bjale a re bone se Lentšu la Modimo le se bolelago ka se.”

Dinnete tše tharo ka Lentšu la Modimo:

• Modimo ke Lentšu: Go Johanese 1:1 re bala gore: “Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo.”

  • Lentšu le hebetšwa ke Modimo: Go 2 Timotheose 3:16 go ngwetšwe: “Mangwalo a Makgethwa ka moka a ngwadilwe ka go huetšwa ke Modimo, gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo …”

  • Lentšu ke khamphase ya bophelo bja rena: Go Pesalome 119:105 go ngwetšwe: “Lentšu la gago ke lebone la go ntlhahla, ke seetša tseleng ya ka.”

Lentšu la Modimo le a phela le na le maatla, le hebeditšwe ke Modimo ka morero wa go re hlahla go ya boyong bja rena, go re ruta ka toko le go hlagolela boitshwaro bja maleba. Dikholofetšo tša Modimo ke sebetša kgahlanong le ditlhaselo tša lenaba. Bibele gape e gona go re thuša go tseba Modimo bokaone.

Ekaba o nyaka go tseba Modimo kgauswi kudu? Thoma go bala Lentšu la Gagwe gomme o lokologe go kgopela Moya wo Mokgethwa go le kwešiša. O ka makala ge o utolla lerato la Modimo go wena le tumo ya Gagwe go ka ba karolo ya bophelo bja gago. Modimo a go šegofatše.