Batamela kgauswi le Modimo – Letšatši la 9

O hloka bohlale bja eng lehono? O swanetše go rarolla mathata mošomong, goba go tobana le tlhohlo lenyalong la gago goba le o tee wa bana ba gago? O hloka bohlale go tseba ge e ba o ka thoma kgwebo ya gago, go tlogela mošomo gore o be le nako le bana ba gago, goba o hloka tlhahlo ya Modimo ge e ba o hloka go dira kgopelo ya mošomo o moswa goba go tšwela pele o šomela khamphani ye o šomago go yona ga bjale? Ekaba motho yo o ratanago le yena ke molekani wa gago wa bokamoso? Goba o hloka bohlale gore o ka dira eng go dira gore moratiwa wa gago a ikwe e le yo a kgethegilego ka letšatši la gagwe la matswalo? O boletše le Modimo ka ditlhohlo tše?

Gopola, ga go boemo bjo e lego bjo bogolo goba bjo bonnyane go Modimo go ka re hlahla. Ge selo se le bohlokwa go wena, se bohlokwa go Modimo. Go Jakobose 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.” Gomme go Diema 3:5-6 re bala gore: “O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela.”

Tumelo e bohlokwa bjang ge ke kgopela bohlale go Modimo?

E bohlokwa kudu. Go Baheberu 11:6 re bala gore: “Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago.” Ge re kgopela Modimo bohlale, re swanetše go tshepha gore o tla re hlahla. Dira nako ya go ka theeletša o homotše go tlhahlo ya Moya wo Mokgethwa. Ngwala se o se kwago gomme o rapele gore Modimo o tla se tiišetša. Lenaba ka mehla le tla leka go re dira gore re belaele, ka gona netefatša gore o šireletša kgopolo ya gago go dikgopolo tše fošagetšego. Go Jakobose 1:6-7 re bala gore: “Fela ge le kgopela le be le tumelo, e sego pelaelo, ka gobane yo a belaelago o swana le lephoto la lewatle le le akgaakgwago gape le tšokotšwago ke phefo. Motho yo mobjalo, wa pelo tše pedi, wa go hloka mahlakantšho go tšohle tše a di dirago, a se ke a gopola gore Morena a ka mo fa selo.”

Go thweng ge eba ke naganne gore ke kwele gabotse, gomme bjale ke lemoga gore ke be ke fošitše?

Go na le mogau go sehla se sengwe le se sengwe gomme Modimo o tseba pelo ya gago. Go Baroma 8:28 re bala gore: “… go ba ba ratago Modimo dilo ka moka di šomela go ba hola …” Ga go sepheto se se fošagetšego se se kago baka gore seemo se hloke tharollo, ke gore Modimo a palele ke go se fetola. Ke Modimo wa menyetla ya bobedi. Dula kgauswi le Yena le go nyaka sefahlego sa Gagwe. O ka makatšwa ke ka fao dilo di kago fetoga.

Baeletši ba go loka ba bohlokwa bjang tshepetšong ya go tšea dipheto?

Go Diema 15:22 go ngwetšwe gore: “Wa go se kgopele maele o palelwa mererong, wa go a kgopela yena o a atlega.” Lega go le bjalo, netefatša gore batho ba o bolelago le bona ba na le tswalano le Modimo, le gore ba tshwenyegile ka wena. Modimo a ka tiišetša tsela ya gago goba go e fetoša ka keletšo ya baeletši. Ba kgethe ka bohlale.

Gopola go leboga …

Go Bafilipi 4:6-7 re bala gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.” Go e na le go belaela le go balabala, botša Modimo gabotse se o se hlokago, gomme o thome go leboga le go tumiša Yena e sa le pele. Go Mo laetša gore o bea tumelo le tshepo ya gago go Yena.

O hloka bohlale mabapi le eng lehono? A re batameleng kgauswi le Modimo, re kgopele Yena bohlale gomme re thome go leboga Yena e sa le pele. Re ka makatšwa ke mejako ye e bulegilego le ye e tswaletšego tseleng ge Modimo a re šireletša. Modimo a go šegofatše.