Batho ba ba amantšhwago le Matswalo a Jesu – letšatši la 1

A ngwaga o boima gakaakang. Magareng ga boemo bjo bo fetoga-fetogago bja politiki le ekonomi bobedi ka Afrika Borwa le dinageng tše dingwe le dikatano tše mpsha bophelong bja ka, ke nagana gore go bolokegile go ka bolela gore e bile ngwago o boima go nna. Gomme ke nagana gore ga ke tee. Ditaba tše mpe tše di sa felego le terama yeo letšatši le lengwe le le lengwe go bonalago le e tliša e ntlogetše ke thekesela.

Bjalo ka Bakriste, go bohlokwa go ikgopotša gore ga go se se diregilego, goba se tlago direga, seo se makatšago Modimo. Re hloka go dira nako ya go tšea kgato go ya morago le go lebelela lefase ka mmono wa go ya go ile gape.

A re lebelele Krisemose ya pele le batho bao ba bego ba le fao. Wa pele ke Sakaria.

Dilo di be di sa mo sepelele gabotse. Yena le mosadi wa gagwe Elisabetha ba be ba tšofala , gomme ba se na ngwana. Go be go na le kgobogo e kgolo e e bego e sepedišana le go se be le bana gomme o be a e ja ke dihlong kudu.

Nakong e ntši ya ngwaga, Sakaria le Elisabetha ba be ba dula motsaneng o monyenyane “nageng ya dithaba ya Judea”, (Lukase 1:39), ntle le ge Sakaria a be a le mošomong Tempeleng. O be a sa tuma gape a se be bohlokwa le go bonwa bjalo ka lešilo la naga. Go feta moo, ba be ba phela dinakong tše boima nakong ya pušo e šoro ya Heroda o Mogolo (37 go ya go 4 BC).

Sakaria o be a ka tlogela go rapela gabonolo, a befela, gomme a tlogela go šomela Modimo yo a bego a sa mo fe ngwana. Eupša se ga se ka fao kanegelo ya Sakaria e felago ka gona. Re a tseba gore Modimo o arabile dithapelo tša gagwe le go itaetša go botega ka go mo šegofatša ka morwa, Johanese Mokolobetši, yoo a bego a tla tsebagatša go tla ga Jesu.