Batho ba ba amantšhwago le Matswalo a Jesu – letšatši la 11
Batho ba ba amantšhwago le Matswalo a Jesu: Jesu
(Di)temana ya Bibele
LUKASE 2
Go boelwa Nasaretha
Go bonagala e le mo go swanetšego gore re rume tlhatlamano ya ditiragalo tša rena tša batho ba ba amantšhwago le matswalo a Jesu ka motho yo a amantšhwago le matswalo a Jesu – Jesu ka sebele.
Ge o e gaša mahlo la mathomo, temana ya 40 ga e bonagale e bolela tše ntši – fela gore Jesu o ile a gola. Le ga go le bjalo, mantšu ao a mmalwa a hlaloša ka fao Jesu wa motho a bego a le ka gona. Ke selo se tee go bolela gore o ile a belega bjalo ka ge ka moka re belege, se sengwe go laetša gore e be e le motho yo a feletšego bjalo ka mang le mang bophelong bja gagwe ka moka, a gola ka bogolo le bohlale, go swana le mošemane yo mongwe le yo mongwe.
Bontši bja rena re kwešiša gore Jesu o be a swanetše go gola ka sebopego; o be a swanetše go ba yo maatla, a tšofale, eupša re katana le kgopolo ya gore a gole semoyeng le kgopolong. E be e le Modimo. Modimo ga a gole semoyeng. Ka ge Jesu e be e le Modimo, Jesu o be a tla gola bjang semoyeng? Tsela ye nngwe ye Jesu a gotšego ka yona e bile bohlale. Se ke tlhohlo, gape. Jesu ke Modimo, gomme Modimo o tseba dilo ka moka. Jesu o be a tla ithuta bjang ge e ba ne e le Modimo?
Jesu, le ge e be e le Morwa wa Modimo, e be e le motho, gomme a tlamega ke go ithuta Bibele, le go ithuta thutatumelo, le go ithuta kobamelo bjalo ka ge re ithuta. Jesu e be e le motho yo a feletšego, bjalo ka rena, gomme karolo e kgolo ya go ba motho ke tshepetšo ya go ithuta. O ile a ithuta go go ja, go sepela, go bolela, go bala le go ngwala, le go obamela batswadi ba gagwe.
Botho bjo bo feletšego bja Morwa wa Modimo ke bjo tee bja dinnete tša go kgahliša le go makatša ka gare ga histori ya lefase. Jesu o na le mmele wo o feletšego wa motho, pelo, kgopolo, le thato – gomme se ruri ga se sebopego sa modingwana. O gotše bjalo ka ge re gola. O itemogetše bophelo bjalo ka rena. O belegetšwe lefaseng la borapolitiki ba sehlogo, moo batho ba phetšego ka bodiidi gomme batho ba go boifa Modimo ba nyatšwago. E bile motho ka mo go feletšego gore a kgone go re phološa ka mo go feletšego. Ka nnete ke Emanuele, Modimo o na le rena.
Eka wena le lapa la gago le be le Krisemose e monate.
