Batho ba ba amantšhwago le Matswalo a Jesu – letšatši la 5

Re na le go bolela kudu ka Maria go feta Josefa. Ge e le gabotse, ga se papago Jesu wa madi gomme re na le go nagana ka yena bjalo ka monna yo a netefaditšego gore batho ka moka ba fihla Betlelehema.

Pego ya Mateu ya matswalo a Jesu e akaretša temana ye e re fago tsebo ya ka fao Josefa a ka bego a itemogetše Krisemose yeo ya pele. Ke monna yo a kwago mmeeletšwa wa gagwe a mmotša gore o imile. Go feta moo, o mmotša gore o imišitše ke Moya wo Mokgethwa. Batho ba kua Palestina ya ngwagakgolo wa pele ba be ba tseba, bjalo ka ge re tseba, ka fao bana ba dirwago ka gona gomme Josefa o be a sa kgolwe kanegelo ya gagwe. Wena o ka e kgolwa?

Gopola Josefa a patlame bolaong bošego ka moka a robegile pelo, a nyamme, a befetšwe gomme a nagana ka dikgetho tša gagwe. Go ela hloko boemo, Josefa o be a na le ditokelo ka moka go ka hlala Maria. Balaodi ba Bajuda ba ka ba ba bolaile Maria ka go mo kgatla ka maswika (Doiteronomio 22:23,24). Josefa o swanetše a be a rata Maria kudukudu, ka gobane o tšere sephetho sa go hlala Maria ka siphiring gore a se mo goboše.

Eupša Modimo o tsena ka gare ga boemo. Ge morongwa wa Morena a bolela, torong, le Josefa mabapi le boitšhupo bja Jesu, Josefa ga a dikadike go fetola maano a gagwe gomme a nyala Maria (Mateu 1:21). Maria o be a tseba ka kgonthe, eupša Josefa a dumela di sa kgonege ka toro fela le lentšu la Maria.

Josefa o re ruta gore re eme re tie ge dilo di le boima le go obamela ka potego le ge re sa kwešiše. O re laetša ka fao re kago tšwela pele ka tumelo le ge go re swanela kudu go ka dira dilo tša rena.